215 ކިލޯ ޑްރަގު ގެންނަން އުޅުނީ ރާއްޖެއަކަށް ނޫން

މިދިޔަ މަހުގެ 15ގައި ފަޅު ރަށެއްގައި ފޮރުވާފައި ހުއްޓައި ފުލުހުން އަތުލި 215 ކިލޯގެ މަސްތުވާތަކެއްޗަކީ "ޓްރާންސިޓްޝިޕްމަންޓެއް"ގެ ގޮތުގައި ގެނައި އެއްޗެހިކަން އެނގިފައިވާ ކަމަށް ފުލުހުން ބުނެފި އެވެ.

ވީ ކިހިނެއް؟ - ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) އާއި ޑްރަގު އިންޓެލިޖެންސް ޔުނިޓާއި މެރިން ޕޮލިސް އަދި ރ. އަތޮޅު ޕޮލިސް ގުޅިގެން ހިންގި އޮޕަރޭޝަނެއްގައި އެ ޑްރަގުތައް އަތުލައިގަތީ ރ. ރާނބުގަލީގައި ހުރި ކަށިކެޔޮގަހެއްގެ ތެރޭގައި ފޮރުވާފައި ހުއްޓަ އެވެ.

އެ އޮޕަރޭޝަންގައި ފުލުހުން ދެ މީހަކު ހައްޔަރުކުރި އެވެ. އެ ދެ މީހުން ފުލުހުން ހައްޔަރުކުރީ "ފެށުން 2" ކިޔާ ލޯންޗެއްގައި ރ. މަޑުއްވަރިއަށް ވަތް ވަގުތު އެ ލޯންޗު ހުއްޓުވައި ބަލައި ފާސްކުރުމަށް ފަހު އެވެ.

އެ މައްސަލައާ ގުޅިގެން ހައްޔަރުކޮށްފައި ވަނީ:

ބުނީ ކީކޭ؟ - އެ އޮޕަރޭޝަނާ ގުޅޭގޮތުން، ޑީއީޑީގެ ހެޑް ސުޕްރިޓެންޑެންޓު އޮފް ޕޮލިސް އަހުމަދު ޝާކިރު 'ދައުރު' އަށް ވިދާޅުވީ، ތަހުގީގަށް މިހާތަނަށް ހޯދުނު މައުލޫމާތަށް ބަލާއިރު، އެއީ ރާއްޖެ އެތެރެކުރަން ގެނައި މަސްތުވާތަކެތި ކަމަށް ނުބެލެވޭ ކަމަށެވެ.

ޝާކިރު ވިދާޅުވީ ރާއްޖެއަކީ އަކީ މަސްތުވާތަކެތި ޓްރާންސްޕޯޓު ކުރުމުގައި ބޭނުންކުރާ "ޓްރާންސިޓް" ބަނދަރަކަށް ވެފައިވާ ކަމަށާއި 215 ކިލޯގެ ޑްރަގަކީ ވެސް އެހެން ގައުމަކަށް ގެންދަން މަސައްކަތް ކުރި އެއްޗެހި ކަމަށް ވަރަށް ބޮޑަށް ބުރަވެވޭ ކަމަށެވެ.

"ކަނޑުމަގުން ބޮޑެތި އަދަދުތަކުން މަސްތުވާތަކެތި އެތެރެކުރޭ. ބައެއް ގައުމުތަކުން ޓްރާންސިޓް ޑެސްޓިނޭޝަންއެއްގެ ގޮތުގައި ރާއްޖެ އެބަ ބޭނުންކުރޭ. އެތަކެތި ހިފައިގެން ރާއްޖެ އައިސް، ކަންޓްރީ އޮފް އޮރިޖިން ބަދަލުކޮށްލާފައި، އެހެން ބަޔަކާ ހަވާލުކޮށްލަނީ،" ޝާކިރު ވިދާޅުވި އެވެ.

ރާއްޖެ އަކީ މަސްތުވާތަކެތި އުފައްދާ ގައުމަކަށް ނުވާތީ، ރާއްޖޭން ދާ އުޅަނދެއްގައި މަސްތުވާތަކެތި ހުރެދާނެކަމަށް ވިސްނައި އެ އުޅަނދު ޗެކް ކުރުމުގެ ފުރުސަތު ވަރަށް ކުޑަ ކަމަށާއި އެހެންކަމުން ރާއްޖެ ޓްރާންސިޓް ޑެސްޓިނޭޝަނަކަށް ހަދައިގެން މަސްތުވާތަކެތި ޓްރެފިކް ކުރަން ވަރަށް ފަސޭހަކަން ޝާކިރު ފާހަގަކުރެއްވި އެވެ.

ތިން ދުވަސް ތެރޭގައި ފުލުހުން އިތުރު 100 ކިލޯގެ މަސްތުވާތަކެތި ވެސް ފަޅު ރަށަކުން ހޯދައިފަ އެވެ. ނަމަވެސް އެއީ އެއް ނެޓްވޯކެއްގެ ދެ ޝިޕްމަންޓްކަމަށް ގަބޫލުނުކުރެވޭ ކަމަށް ޝާކިރު ވިދާޅުވި އެވެ.

އޮޕަރޭޝަންގެ ތަފްސީލް - އިންޓެލިޖެންސް މައުލޫމާތަށް ބަލައި ފާސްކުރިއިރު ފުލުހުންނަށް ފެނުނު ތަކެތީގެ ތެރޭގައި ހިމެނެނީ:

އޭގެ އިތުރުން، އިންޓެލިޖެންސް މައުލޫމާތަށް ބަލައި ފުލުހުން ވަނީ އެ ސަރަހައްދުގެ ފަޅުރަށްތައް ބަލައި ފާސްކޮށްފަ އެވެ. އެ އޮޕަރޭޝަންގައި ރ. ބޮޑުފަރު ފިނޮޅުން ޕެޓްރޯލް ހުސްކުރި 20 ލީޓަރުގެ 63 ހަން ފެނިގެން، ހައްޔަރުކޮށްފައި ތިބި ދެ މީހުންނާ ފުލުހުން ސުވާލުކުރި އެވެ.

އެ މީހުން ބުނި ކަމަށް ފުލުހުން ބުނެފައިވަނީ، އެއީ އެ މީހުން މަސްތުވާތަކެތި ބަލާ ދާން ޓެސްޓު ދަތުރެއް ކުރަން ބޭނުންކުރި ޕެޓްރޯލް ހަންތަކެއް ކަމަށެވެ. އަދި އެ މީހުން އެތެރެކުރި މަސްތުވާތަކެތި ރ. ރާނބުގަލީގައި ހުންނާނެ ކަމަށް ބުނެ އެ ތަކެތި ދެއްކި ކަމަށް ފުލުހުން ބުނެފައިވެ އެވެ.

އެ މީހުން ދިން މައުލޫމާތަށް ބަލައި އެ ރަށް ފާސްކުރަމުން ދަނިކޮށް، އެ މީހުން ބުނި ކަށިކެޔޮގަހުގެ ތެރެއިން ފެނުނު 11 ގޯނީގައި ހުރި 215 ކިލޯ މަސްތުވާތެކެތި ފުލުހުން އަތުލައިގަތެވެ.

އެންގުން މުހިންމު - އެ އޮޕަރޭޝަންގައި އަތުލައިގަތް 215 ކިލޯގެ ޑްރަގަކީ މިހާތަނަށް ފުލުހުންގެ އޮޕަރޭޝަނެއްގައި އެއްފަހަރާ އަތުލައިގަތް އެންމެ ގިނަ އަދަދެއްގެ މަސްތުވާތަކެއްޗެވެ. އޭގެ ކުރިން އެންމެ ގިނައިން އަތުލައިގެންފައި ވަނީ ގދ. އަތޮޅުގެ ފަޅުރަށެއްގައި ފޮރުވާފައި ހުއްޓާ 149 ކިލޯގެ ޑްރަގެވެ.