އަރަފާތުގެ ނަޖިސް ބަދިގެ: ހަޑިމުޑުދާރު ހާއްޔެއް، ކުނިވަހާއި ފުޅަ

ބަންގްލަދޭޝްގެ އަރަފާތު ހޮސައިން، 32،ގެ މައްޗަށް ތުހުމަތު ކުރަނީ މާލޭގެ މަގުމަތީގައި އުޅޭ ބުޅާތައް ހިފައި މަރާލުމަށް ފަހު އެ ބުޅަލުގެ މަސް ބޭނުންކޮށްގެން ތަފާތު ކާނާ ތައްޔާރުކޮށް ވިއްކާ ކަމަށެވެ. މިއީ އިއްޔެއާ ހަމައަށް ވެސް ރާއްޖޭގައި މީހަކު ކޮށްފާނެ ކަމެއް ކަމަށް، ދިވެހިންގެ ސިކުނޑިއަށް ގަބޫލުކުރެވިފައިވާ ކަމެއް ނޫނެވެ.

އެހެންވެ، އަރަފާތުގެ މައްޗަށް ކުރެވުނު ތުހުމަތުން އެންމެން ތިބީ މިއަދު ސިހިފަ އެވެ. ބިދޭސީން ހިންގާ ވިޔަފާރިތަކާއި އެ މީހުން އުފައްދާ ކާތަކެތީގެ ނުތާހިރުކަމުގެ ވާހަކަ އެންމެން މިއަދު ދައްކަނީ އެވެ. 

އަރަފާތު ކާބޯތަކެތި ތައްޔާރު ކުރަމުން އައީ، ގަލޮޅު ސަހަރާ މަގުގައި ހުންނަ ރަނައުރާގެއާގެ ހަނި ގޯޅި ތޭރޭގައި ލަކުޑިން ތިން ބުރިއަށް ހަދާފައި ހުންނަ ބައިގަ އެވެ.  ގާތްގަނޑަކަށް ހަތަރު ފޫޓު، ހަތް ފޫޓުގެ ޖާގައެއް ކޮންމެ ބުރިއެއްގައި ހުރިއިރު އެންމެ ތިރީ ބައި ބޭނުން ކުރަނީ ކެއްކުމަށެވެ. 

އެތަނަށް ވަނުމުން ފުރަތަމަ ވެސް ނޭފަތުގައި ޖެހުނީ މަސް ކުނި ވަހެވެ. ފުރިޖުގެ އެންމެ މަތީ ބައިގައި ކުޅުކުޅު ފަޔާއި ފުރެންދެން މަސް ލާފައި ހުއްޓެވެ. ތިރީ ބައިގައި އެކި ބާވަތުގެ ތަރުކާރީ ހުއްޓެވެ. ބައެއް ތަކެތި ހުރީ ހަލާކުވެފަ އެވެ.

މަސް ކޮށަނީ ޑީފްރިޖް މަތީގައި ފިލާގަނޑެއް ބާއްވައިގެން އޭގަ އެވެ. އެ ހިއްލާލައި ޑީފްރިޖް ހުޅުވާލިއިރު ފުރެންދެން މަސް ހުއްޓެވެ. އެއާ އެކު، މުޅި ތަނުން ދުވަމުން ދިޔަ މަސް ކުނިވަސް އިތުރަށް ގަދަވި އެވެ. 

ދެވަނަ ބުރިއަކީ ކާ އެއްޗެހި ތައްޔާރު ކުރުމަށް ބޭނުންކުރާ ތަކެތި ބަހައްޓާފައި ހުންނަ ތަނެވެ. އެތަނުގެ ތެރޭ ވަރަށް ކުޑަ ފާހަނައެއް ވެސް ހުއްޓެވެ. ލާ އަންނައުނު ފަދަ ތަކެތި ވެސް އެބައިގައި ހުރިއިރު ކައްކަން ބޭނުންކުރާ ގޭސް ފުޅިތައް ވެސް ރައްކާކުރަނީ، އެ ތަނުގަ އެވެ. އަވައްޓެރިން ބުނާ ގޮތުގައި 10 ވަރަކަށް ގޭސްފުޅި އެތާ ތެރޭ ހުއްޓާ ފެނިފައިވެ އެވެ. އެ ފުޅިތައް މިހާރު ހުރީ ހަނި ގޯޅިތެރެއަށް ނެރެފަ އެވެ. 

ތިން ވަނަ ބުރީގައި ވެސް ކާއެއްޗިހި ތައްޔާރުކުރަން ބޭނުންކުރާ އެކި ޒާތުގެ ތަކެތި ކޭސްކޭސް ޖަހާފައި ހުއްޓެވެ. އެތަން އޮތީ ގުދަނެއްހެން އެއްވެސް ތަރުތީބެއް ނެތި އެކި ތަންތަނަށް ތަކެތި އުކާލައިފަ އެވެ. ތިން ވަނަ ބުރީގައި އިތުރު ޑެކެއް އަޅާފައި ނިދުމަށް ބޭނުންކުރާ ތަނެއް ހަދާފައި ހުއްޓެވެ. ބުޅާތައް ބައިތިއްބަނީ އެތަނުގައިކަން އެތަނުން ދުވި ވަހުން އެނގެ އެވެ.

މުޅި ތަނުން ވެސް ފެނުނީ ހަޑިމުޑުދާރުކަމާއި ނަޖިސްކަމެވެ. ތަނުގައި ދުވަނީ ތަތްމުޑުވަހެވެ. 

"ދިހަ ވަރަކަށް ފުޅި ގޭސް އެބަ ގެންގުޅޭ، އެހެންވީމަ ކިހާ ނުރައްކާ ކަމެއް މިއީ. އެހެންވެ އެ ކަންތަކުގައި ޕޮލިހަށް އަންގައިފިން. ސިޓީ ކައުންސިލުން ވަރަށް ގިނަ ދުވަސް ދުވަހު އައިސްފި. ހެލްތު [މިނިސްޓްރީ]ގައި ވެސް މައްސަލަ ޖައްސައިފިން. އެކަމަކު މިކަން ނުއެއް ހުއްޓުވުނު،" އެ ގޯޅި ތެރޭގައި ދިރިއުޅޭ އަންހެނަކު އޭނާގެ ވާހަކަ ފެށީ އެ ހިސާބުންނެވެ.

އޭނާ ބުނި ގޮތުގައި ފުލުހުންނަށް ގުޅުމުން ބުނަނީ އެމްއެންޑީއެފްއަށް ގުޅުމަށެވެ. އެމްއެންޑީއެފްއަށް ގުޅުމުން ބުނަނީ ފުލުހަށް ގުޅުމަށެވެ. 

"މި މައްސަލަ ބޮޑުވެގެން ޓަކި ނުޖަހާ އެންމެ އިދާރާއެއް ވެސް ނެތް. ދެން މިކަން ހައްލުކުރަން ދާނެ ތަނެއް ނެތް،" އޭނާ ބުންޏެވެ.

މީގެ ތިން އަހަރު ކުރިން، އަރަފާތަށް އެތަން ކުއްޔަށް ދީފައި ވަނީ، ދިރިއުޅުމަށެވެ. ނަމަވެސް ބަދިގެ ހިންގައިގެން ކާބޯތަކެތި ތައްޔާރުކުރާތާ އަހަރަކަށް ވުރެ ގިނަ ދުވަސް ވެފައިވާ ކަމަށް އެ ގޯޅިތެރޭގައި ދިރިއުޅޭ މީހުން ބުނެ އެވެ.

"ކައްކާތީވެ، ހޫނުވެގެން ޖެހިގެން ހުންނަ ކޮޓަރިތަކުގެ އެތެރެ ހުންނަނީ ހަލާކުވެފައި. ބޭރުން ދާއިރު، އެ ކޮޓަރީގެ ފާރުގައި އަތް ޖައްސާނުލެވޭ ހޫނުކަމުން،" އަންހެން މީހާ ކިޔައިދިނެވެ.

ފުރަތަމަ ކައްކަމުން ދިޔައީ ވައި ބޭރުކުރާނެ އެއްވެސް ވަސީލަތެއް ނެތި އެވެ. ނަމަވެސް މި ފަހުން، ޝަކުވާ ކުުރުމުން ބޭރަށް ދުންހޮޅިއެއް ވަނީ ލައިފަ އެވެ. 

އަލިފާނުގެ ހާދިސާއެއް ހިނގައިފި ނަމަ، ރައްކާތެރިވާން ސަލާމަތީ ގޮތުން އެއްވެސް ވަސީލަތެއް ނެތެވެ. އެެފަދަ ކަމެއް ހިނގައިފި ނަމަ، އެ ގޯޅިގަނޑުގައި ހުންނަ ހުރިހާ ގެއަކަށް އޭގެ އަސަރުކޮށް ހިތާމަވެރި ހާދިސާއެއް ހިނގުމުގެ ފުރުސަތު ވަރަށް ބޮޑެވެ.

އެ ގޯޅިގަނޑުގައި ދިރިއުޅޭ އެންމެން ވެސް ތިބީ އަލިފާނުގެ ހާދިސާއެއް ހިނގާފާނެތީ ބިރުންނެވެ. 

މިދިޔަ އެއް އަހަރު ތެރޭ އަރަފާތު ކާބޯތަކެތި ހަދައި ވިއްކުމުގެ ބޮޑު ވިޔަފާރިއެއް ހިންގި އިރު އެ ގޯޅި ތެރެއިން އޭގެ ކުރިއަކުން ބުޅަލެއް ނުފެނެ އެވެ. ބުޅާތައް ފެންނަން ފެށީ މި ފަހުުން ކަމަށް ގޯޅިގަނޑު ތެރޭ ދިރިއުޅޭ މީހަކު ބުންޏެވެ.

އަވައްޓެރިންނަށް ބުޅާ ރޯ އަޑު އިވުމުގެ އިތުރުން ބޯބުރިކޮށްލާފައި އޮތް ބުޅަލެއް ވެސް ފެނިފައިވެ އެވެ.

އޭގެ ތެރެއިން އެކަކީ، އަަރަފާތު ދިރިއުޅެމުން އަންނަ ތަނާ ޖެހިގެން ހުންނަ އިމާރާތުގައި އުޅޭ މުހައްމަދު މުފައްސިރެވެ.

"ބުޅާ ރޯއަޑު އިވޭ...ހަތަރު ދުވަސް ކުރިން ޑަސްބިން ނެރުނު ގަޑީގައި ބޯ ބުރިކޮށްލާފައި އޮތް ބުޅަލެއް ފެނުނު،" މުފައްސިރު ކިޔައިދިނެވެ.

އޭނާ ކިޔައިދިން ގޮތުގައި، އަރަފާތު ބުޅާ ގެންގުޅެމުން އައީ ބޭރަށް ނުނެރެ، އޭނާ ކުއްޔަށް ދިރިއުޅުނު ތަނުގެ ތެރޭގަ އެވެ.

މުފައްސިރު ކިޔައިދިން ގޮތުގައި އަރަފާތު ގެންގުޅޭ ބުޅާތަކަށް ކާން ނުދޭތީ ބައެއް ފަހަރު ވައި ބޭރުކުރަން ހަދާފައި ހުންނަ ބާގަނޑުން ބޭރަށް ނުކުމެ ގޮވާ ހަދަ އެވެ. 

"ދެ ދުވަހު ދެ ބުޅާ ރޯވަރުން ދޫކޮށްލައިފިން އެ ބޮކްސް ތެރޭ އިންދާ،" އޭނާ ބުންޏެވެ.

އަރަފާތު ބުޅާ މަސް ބޭނުންކޮށްގެން ކާ އެއްޗެހި ތައްޔާރުކުރާކަން އަވައްޓެރިންނަށް ރޭކާލީ، އެ މީހުން ބުނި ގޮތުގައި، އޭނާ ބުޅާ ވަގަށް ނަގާ މައްސަލަ ފެންމަތިވެ، އިއްޔެ ބަޔަކު އެ ގެއަށް އައުމުންނެވެ.

އެކަން ގަބޫލުކުރަން އެ މީހުންނަށް އަދިވެސް ތިބީ ދަތިވެފަ އެވެ.

އޭނާ އެ ތަނުގެ ތެރޭ ބަތާއި ރިހަ ކައްކައިގެން ޕާރުސަލް ހަދައިގެން ވިއްކަ އެވެ. އަދި ސަބްމެރިން އާއި ސޭންޑްވިޗާއި ބާގާ ފަދަ އެކި ވައްތަރުގެ ތައްޔާރީ ކާނާ ވެސް އެތަނުގެ ތެރޭ ހަދަ އެވެ. އެ ތަކެތި އޭނާ ލަނީ ކަންމަތީ އެކި ފިހާރަތަކަށެވެ.

އާންމުކޮށް ކައްކަނީ ވެސް ދަންވަރު އެވެ. ބައެއް ދުވަސް ދުވަހު ހެނދުނު ވެސް ކައްކާ ކަމަށް އަވައްޓެރިން ބުންޏެވެ. 

އެ ބަދިގޭގައި އޭނާ ކައްކާއިންގެ ގޮތުގައި މުސާރަ ދީގެން މީހުން ވެސް ގެންގުޅެ އެވެ. 

"އެއިން ކައްކާއެއް މާކަ ގިނަ ދުވަހަކު މަޑެއް ނުކުރޭ. އަބަދުވެސް އެހެން ކައްކާއެއް ފެންނާނެ ދުވަސްގަނޑަކުން،" މުފައްސިރު ބުންޏެވެ.

އޭގެ އެއް ސަބަބަކީ، އެ މީހުންނަށް މުސާރަ ނުދިނުންކަން ފާހަގަކޮށް މުފައްސިރު ބުނިގޮތުގައި ބައެއް މީހުންނަށް ވަގު ޑޮލަރުން މުސާރަ ދިން މައްސަލައެއް މިފަހުން ފެންމަތިވި އެވެ.

"އިންޑޮނޭޝިއާ ކައްކާއެއް ގެންގުޅުނުއިރު، އެ މީހާ ބުނެގެން ބެލިއިރު މުސާރައަށް ދީފައި ހުރީ 50ގެ ވަގު ޑޮލަރު،" އޭނާ ބުންޏެވެ.

އަވައްޓެރިން އަރަފާތު ސިފަކުރީ އިންތިހާއަށް ރުޅިގަދަ، ވަރަށް ބޮޑު މަކަރުވެރިއެއްގެ ގޮތުގަ އެވެ. އޭނާގެ އުނދަގުލުން އެ މީހުން ސަލާމަތްވާން ބޭނުންވެފައި ތިބިތާ ކިތަންމެ ދުވަހެކެވެ.

އެންމެ ފަހުން އެ ހުރިހާ ކަމެއް ފަޅާއަރައި އިމިގުރޭޝަނުން އޭނާ ހޯދަން އިއްޔެ އިއުލާން ކުރި އެވެ. މިއަދު އޭނާ ހައްޔަރުކޮށްފައި ވަނީ ފިލައިގެން އުޅެނިކޮށެވެ.

އިމިގްރޭޝަނުން ބުނީ އޭނާ އަތުލައިގަތީ ސިފަ ބަދަލުކުރަން ބޯކޮށާ ސެލޫނެއްގެ ތެރޭގައި ބޯ ބާލަން ގޮސް ހުއްޓާ ކަމަށެވެ.