ބުޅާ މަހުން ކާތަކެތި ހަދާ ކަމަށް ތުހުމަތު ކުރާ މީހާ ހައްޔަރުކޮށްފި

މާލޭގެ އެކި ތަންތަނުގައި އުޅޭ ބުޅާ ހިފައިގެން ގެއަށް ގެންގޮސް، އޭގެ މަސް ބޭނުންކޮށްގެން ކާއެއްޗެހި ހަދައިގެން ވިއްކާ ކަމަށް ބުނާ މީހާ ހޯދައި އޭނާ އިމިގްރޭޝަންގެ ބެލުމުގެ ދަށަށް ގެންގޮސްފި އެވެ. 

ވީ ކިހިނެއް؟ - ބުޅާ މަހުން ކާބޯތަކެތި އުފައްދާ ކަމުގެ ތުހުމަތުގައި ބަންގްލަދޭޝްއަށް ނިސްބަތްވާ ހުސެއިން އަރަފާތު، 32 ހޯދަން އިމިގްރޭޝަނުން އިއުލާން ކުރީ އިއްޔެ އެވެ. 

އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު މިއަދު ވިދާޅުވީ އަރަފާތު ހޯދައި އޭނާ މިހާރު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށެވެ. 

ތަފްސީލް - އިމިގްރޭޝަނުން މިއަދު ބުނީ އަރަފާތު ހައްޔަރުކުރީ އިމިގްރޭޝަންގެ އިންޓެލިޖެންސަށް ލިބުނު މައުލޫމާތުގެ އެހީގައި ފުލުހުންގެ އެހީތެރިކަމާ އެކު މިއަދު ހިންގި އޮޕަރޭޝަނެއްގައި ކަމަށެވެ. އޭނާ ހައްޔަރުކުރުމަށް ފަހު އިމިގްރޭޝަނުން ވަނީ އޭނާގެ ފޮޓޯ އާންމުކޮށްފަ އެވެ. އެ ފޮޓޯއިން ފެންނަ ގޮތުގައި: 

ފުލުހުންގެ ބަސް - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ އަރަފާތު ހައްޔަރުކުރީ މިއަދު ހެނދުނު 10:30 އެހާކަންހާއިރު ކަމަށެވެ. އަދި އޭނާ ހައްޔަރުކުރީ މާލެއިން ކަމަށް ވެސް ފުލުހުން ބުންޏެވެ. 

އެނގުން މުހިންމު - ފުލުހުން ވެސް ވަނީ އެ މައްސަލައިގެ ތަހުގީގެއް މިހާރު ފަށައިފަ އެވެ. 

އިމިގްރޭޝަނުން ބުނެފައި ވަނީ އަރަފާތު ރާއްޖޭގައި އުޅެނީ ވެސް ގަވައިދާ ހިލާފަށް ކަމަށެވެ. އޭނާ އަކީ ދިރިއުޅޭ ގޭގައި ބާގާ އާއި ސަބްމެރިން ފަދަ ކާތަކެތި ހަދައި ފިހާރަތަކަށް ވިއްކައިގެން އާމްދަނީ ހޯދާ މީހެއް ކަމަށް ސޯޝަލް މީޑިއާގައި މީހުން އަންނަނީ ބުނަމުންނެވެ.