'ބުޅާ ހިފާ' ބިދޭސީ މީހާ އިމިގްރޭޝަނަށް ހާޒިރުވާން އަންގައިފި

މާލޭގެ އެކި ތަންތަނުގައި އުޅޭ ބުޅާ ހިފައިގެން ގެއަށް ގެންދާ ކަމަށް ތުހުމަތު ކުރާ ބަންގްލަދޭޝް މީހާ، އިމިގްރޭޝަނަށް ހާޒިރުވުމަށް އަންގައި އެ ތަނުން މިއަދު ނޯޓިސް ނެރެފި އެވެ.

ވީ ކިހިނެއް؟ - ރާއްޖޭގައި ގަވައިދާ ހިލާފަށް އުޅޭ، އަރަފާތު ހުސެން ނަމަކަށް ކިޔާ މި މީހާގެ ވާހަކަ ސޯޝަލް މީޑިއާގައި ދެކެވޭތާ ދުވަސްކޮޅެއް ވެއްޖެ އެވެ. މާލޭގައި ގިނައިން ބުޅާ އުޅޭ، މޭރީ ބްރައުން ރެސްޓޯރަންޓްގެ ފަހަތުގައި އޮންނަ ޕާކިން ސަރަހައްދުގައި އޭނާ ބުޅާ ހިފަން އުޅޭ ތަން ބައެއް މީހުން ވީޑިއޯކޮށް، ސޯޝަލް މީޑިއާގައި އާއްމުކޮށްފައިވެ އެވެ.

ތަފްސީލް - ބައެއް މީހުން، ކޮތަޅެއް ހިފައިގެން އޭނާ ބުޅާ ހިފަން އުޅެނިކޮށް ހިފަހައްޓައި ސުވާލު ވެސް ކޮށްފައިވެ އެވެ. އަދި އޭނާ ދިރިއުޅޭ ގެ ކައިރިން ބުޅަލުގެ ގުނަވަންތައް ފެނުމާއި ބުޅާ ރޯ އަޑު އެ ގެ ކައިރިން އިވޭ ކަމަށް ބުނެ އެވެ.

ބުޅަލުގެ ހައްގުގައި މަސައްކަތް ކުރާ ޖަމިއްޔާ، ފީލައިން ވެލްފެއާއިން ވަނީ މި މައްސަލަ ވަރަށް ގިނަ ފަހަރު ސަރުކާރުގެ ސަމާލުކަމަށް ގެނެސްފަ އެވެ.

އިމިގްރޭޝަނުން މިއަދު ބުނީ، މި ބިދޭސީ މީހާގެ މައުލޫމާތު ލިބުމުން އޭނާ ދިރިއުޅޭ ގެއަށް ދިޔައިރު އެ ތަނުގައި އޭނާ ނެތް ކަމަށެވެ. އެހެންވެ، ބިދޭސީ މީހާ ހޯދަން ނޯޓިސް ނެރުނީ ކަމަށް އެ ތަނުން ބުންޏެވެ.

އުމުރުން 32 އަހަރުގެ މި މީހާއަކީ އޭނާގެ ގޭގައި ކާއެއްޗެހި ހަދައިގެން ވިއްކާ މީހެކެވެ. އެގޮތުން، ގޭގައި ބާގާ ފަދަ ކާތަކެތި ހަދައި ފިހާރަތަކަށް ވިއްކައިގެން އާމްދަނީ ހޯދަ އެވެ.