އެމްޑީޕީގެ ގައުމީ މަޖިލިހުން ފެނުނީ ނަޝީދާ މެދު އޮތް ރުޅިވެރިކަން

ކުރީގެ ރައީސް މުހައްމަދު ނަޝީދު ދެކެ އެމްޑީޕީގެ މިހާރުގެ ގައުމީ މަޖިލިސް ރުޅިއައިސް އޮތް މިންވަރު ރޭ އެ ފެނުނީ އެވެ. އެމްޑީޕީ ރޫޅާލައްވައި، ދަ ޑިމޮކްރެޓްސް ހެއްދެވި ނަމަވެސް، އަދިވެސް އެމަނިކުފާނުގެ އެދުން އޮތީ އެމްޑީޕީ ތެރޭގައި ވަކި ހިއްޕަވާލެއްވުން ކަމަށް ވިޔަސް، މި ވަގުތަށް އެމްޑީޕީ ގައުމީ މަޖިލިސް ފާޅުގައި، ރުޅިވެރިކަމާ އެކު، ބުނީ 'ނަޝީދު ނޫން ގޮތެއް' ކަމަށެވެ.

ރައީސް އިބްރާހިމް މުހައްމަދު ސޯލިހަށް ރިޔާސީ ދެވަނަ ދައުރެއް ލިބިވަޑައިނުގެން އިންތިހާބުގައި ނާކާމިޔާބީއާ ކުރިމަތިލެއްވިތާ އެންމެ ދެ ދުވަސް ތެރޭގައި ބޭއްވި ގައުމީ މަޖިލިހުގެ ޖަލްސާގައި، އެކި މެމްބަރުން ނަޝީދު ސިފަކުރެއްވީ މިހެންނެވެ؛ ކޮންމެ ގޮތަކުން ވިޔަސް ވެރިކަން ހޯދައްވަން ބޭނުންފުޅުވާ އަމިއްލަ އެދުން ބޮޑު ބޭފުޅެކެވެ. ރާއްޖޭގައި މިހާތަނަށް ނުއުފެދޭ ވަރުގެ ކޮރަޕްޓެޑް ބޭފުޅެކެވެ. ރައްޔިތުންގެ ކުރިމަތީގައި އެމްޑީޕީގެ އަގު ވައްޓާލެއްވި ބޭފުޅެކެވެ. 'ނިޒާމީ ބަގާބާތެއް' ގެންނަވަން އުޅުއްވާ ބޭފުޅެކެވެ. މޭ 6ގެ ބޮމުގެ ހަމަލާ ރައީސް އިބްރާހިމް މުހައްމަދު ސޯލިހުގެ އިސްތަށިފުޅުގައި އެޅުއްވި ބޭފުޅެކެވެ.

މިހާ ވަރަށް ރޭގެ ގައުމީ މަޖިލިހުގެ ބަހުސްގައި ނަޝީދަށް އެކި މެމްބަރުން ފާޑުކިއުއްވީ، އެމަނިކުފާނު ކުރައްވަން ބޭނުންފުޅުވާ ކޮންމެ ކަމެއް ފެއިލްކޮށްލަން އެމްޑީޕީގެ ހުރިހާ ބާރެއް މި ވަގުތު ބޭނުންކުރާނެކަން ދައްކަވަމުންނެވެ.

"ބޯޓު ދުއްވަ ދުއްވާ އޮއްވާ ލައިފް ޖެކެޓް ނާޅާ ކަނޑަށް ފުއްލާމީ އަމިއްލައަށް، ދެން އަޅުގަނޑުމެން އެއާ ހަވާލުވާން އުޅޭނެ ކަމެއް ނެތް،" ނަޝީދުގެ ނަންފުޅު ނުގެންނަވައި އެކަމަކު އެމްޑީޕީ ދޫކުރައްވައި ވަޑައިގަތް ވަޑައިގަތުމާ މެދު، މަޑުއްވަރީ ދާއިރާގެ ރައީސް އަދި އާރުޑީސީގެ މެނޭޖިން ޑިރެކްޓަރު މޫސާ އަލިމަނިކު (މޫކޭ) ވިދާޅުވި އެވެ.

"އަޅުގަނޑުމެންގެ ބޮލުގައި ނާޅުވާ ބަދުނާމެއް ނެތް. ވައްކަމުގެ ބޮޑު ނެޓްވޯކަކަށް މި ޕާޓީ ހަދައިފި. ކިޔާލި ގޮތުން ހީވޭ މަޖީދީ މަގުގައި ގޮއްވާލި ބޮމަކީ އަޅުގަނޑުމެން ހަދައިގެން ގެންގޮސް [ބާއްވާ] ގޮއްވާލި އެއްޗެކޭ. އެވަރަށް އަޅުގަނޑުމެންގެ ރައީސުލްޖުމްހޫރިއްޔާގެ ބޮލުގައި އެކަން އަޅުވައިފި."

ގައުމީ މަޖިލިހުގައި ނަޝީދަށް މިހާރު އެއްވެސް އިހުތިރާމެއް ނެތްކަން، ވާހަކަ ދެއްކެވި މެމްބަރުންގެ ބަސްމަގުން އެނގެ އެވެ. ރިޔާސީ އިންތިހާބުން އެމްޑީޕީ ބަލިވީ ސީދާ ނަޝީދުގެ ސަބަބުން ކަމަށް ގަބޫލުކުރުމާ އެކު، އެވަރުގެ ބޭފުޅަކަށް އެމްޑީޕީން ދެން ތާއީދުކުރުމުގެ ބޭނުމެއް ނެތްކަން، މެމްބަރުންގެ ވާހަކަތަކުން ސާފެވެ. ނަޝީދުގެ ހުރިހާ ފޯކަސްއެއް މިހާރު އޮތް، ވެރިކަމުގެ ނިޒާމް ބަދަލުކުރުމުގެ އާންމު ހިޔާލު ހޯދުމުގެ ވޯޓާ ގުޅޭ ގޮތުން، ހުރިހާ މެމްބަރުންހެން ވިދާޅުވީ 'ބަރުލަމާނީ ނޫން ގޮތެއް' ކަމަށެވެ.

ނަޝީދަކީ ސިޔާސީ ގޮތުން އެއްވެސް ވަރެއްގެ ލަދުފުޅެއް ނެތް ބޭފުޅެއް ކަމާ މެދު ޝައްކެއް ނެތެވެ. އިއްޔެ ރައީސް ސޯލިހަށް އިންތިހާބު ގެއްލުވާލައްވާފައި، މިއަދު ފޮނުއްވަނީ ގައުމީ މަޖިލިހުގެ ތާއީދު އޮތް ނަމަ ޕާޓީއާ ގުޅިވަޑައިގަތުމުގެ މެސެޖެވެ. އިއްޔެ ރައީސް ސޯލިހުގެ ނާގާބިލްކަމުގެ ވާހަކަ ދައްކަވާފައި މިއަދު ކުރައްވަނީ އެމަނިކުފާނަށް ތައުރީފެވެ.

އެކަމަކު ނަޝީދުގެ ތައުރީފާއި ހެޔޮ ބަސް އަޑުއެހުމުގެ މޫޑެއް އެމްޑީޕީގެ މިހާރުގެ ގައުމީ މަޖިލިހުގައި މިވަގުތު ނެތެވެ. އިންތިހާބީ ރައީސް ޕީއެންސީގެ ޑރ. މުހައްމަދު މުއިއްޒުގެ ވެރިކަން ދިފާއުކުރަން ވެސް، ނަޝީދަށް އެމްޑީޕީން ފުރުސަތު ދިނުމަށް ވުރެ، ގައުމީ މަޖިލިހަށް މި އޮތީ މުހިންމުވެފަ އެވެ. ބައެއް މެމްބަރުން ވިދާޅުވީ ދިވެހި ރައްޔިތުން ކުރިއަށް އޮތް ފަސް އަހަރަށް ރައީސަކު ހޮވާފައި ހުއްޓާ، ނިޒާމް ބަދަލުކުރަން ނަޝީދު އުޅުއްވަނީ ވެރިކަމުގެ އެދުމުގައި އެކަނި ކަމަށެވެ.

ދާންދޫ ދާއިރާގެ މެމްބަރު ޔައުގޫބު އަބްދުﷲ ވިދާޅުވި ގޮތުގައި ވަކި މީހަކު ވެރިކަމަށް ގެންނަން ކުރާ މަސައްކަތަކަށް އެމްޑީޕީން ތާއީދުކުރާކަށް ނުޖެހޭނެ އެވެ.

ރައްޔިތުން "ވަކި ގޮތެއް ނިންމައިފި. ކުރިއަށް އޮތް ފަސް އަހަރު ވެރިކަން ކުރާނީ ޑރ. މުއިއްޒޭ، ވެރިކަން ކުރަން ޖެހޭނީ ރިޔާސީ ނިޒާމަށޭ،" ޔައުގޫބް ވިދާޅުވި އެވެ.

"ވަކި ބޭފުޅަކަށް ތާއީދު ނެތީމާ ވެރިކަމަށް އާދެވޭ ފޯމިއުލާއެއް. އެ ބޭފުޅާއަށް ވެރިކަމަށް އާދެވޭނެ ގޮތަށް މަސައްކަތްކުރަން އެމްޑީޕީގެ މެމްބަރުންނަށް ލާޒިމެއް ނޫން."

އޭނާގެ ވާހަކަ އެހާ ހިސާބުން ނިންމައެއް ނުލައްވަ އެވެ. ނަޝީދަކީ އޭނާއަށް ފެނިވަޑައިގެންނެވި ކޮރަޕްޝަންގެ ކަންކަން އެންމެ ބޮޑު ބޭފުޅާ ކަމަށް ވެސް ސިފަކުރެއްވި އެވެ. ކޮރަޕްޝަނަކީ ހަމައެކަނި ފައިސާތަކެއް ވަގަށް ނެގުން ނޫން ކަމާއި ނުފޫޒު ބޭނުންކުރުމަކީ ވެސް ކޮރަޕްޝަންކަން، ފާހަގަކުރެއްވި އެވެ.

"އަޅުގަނޑު ނުދެކެން އެއަށް ވުރެ ބޮޑު ކޮރަޕްޓެޑް ބޭފުޅެއް އަޅުގަނޑުގެ ހަޔާތުގައި،" ދައުލަތުގެ ފައިސާ އާއި ވަސީލަތްތައް ބޭނުންކޮށްގެން ބަރުލަމާނީ ނިޒާމް ގެނެސް، ވެރިކަމަށް ވަޑައިގަނެވޭތޯ ނަޝީދު ކުރައްވާ މަސައްކަތްތަކަށް އިޝާރަތްކުރައްވާ، ޔައުގޫބް ވިދާޅުވި އެވެ.

ރޮޒައިނާ އާދަމްގެ ނަން އަތުވެއްޖެ ނަމަ، ނަޝީދުގެ ސަޕޯޓަރުން ވަރަށް ރުޅިއާދެ އެވެ. ރޭ އޭނާ ވާހަކަ ދެއްކެވީ އެ ރުޅި އަދި ބޮޑުވާނެ ގޮތަކަށް ކަމަށް ފެނެ އެވެ.

ރޮޒައިނާ ވިދާޅުވި ގޮތުގައި އެންމެ ބޭފުޅަކު ވެރިކަން ބޭނުންފުޅުވެގެން ކުރައްވާ މަސައްކަތަކަށް ދައުލަތުން 40 މިލިއަން ރުފިޔާ ހޭދަކުރާކަށް ނުޖެހެ އެވެ. ނިޒާމީ ވޯޓަށް އެ ހުސްކުރާ ފައިސާ، ރާއްޖޭގައި ތިބި ހާއްސަ އެހީއަށް ބޭނުންވާ މީހުންނާއި އެކަނިވެރި މައިންނަށް ސަރުކާރުން ބަހާލިޔަސް މާ ރަނގަޅުވާނެ ކަމަށް ވިދާޅުވި އެވެ.

"ރާއްޖޭގެ ރައްޔިތުން ބަރުލަމާނީއަކަށް ތާއީދެއް ނުކުރާނެކަން ސޯޝަލް މީޑިއާއަށް ބަލައިލިޔަސް، މީހުން އުޅޭ ވައިބަ ގްރޫޕްތަކަށް ބަލައިލިޔަސް އެބަ އެނގޭ. ފަސް ޕަސެންޓް ވެސް މި ވޯޓަކުން ނުލިބޭނެކަން،" ރޮޒައިނާ ވިދާޅުވި އެވެ.

އެހާ ތައީދު ނެތް ކަމެއް ކަން އެނގި ތިބެ، އެވަރުގެ ބޮޑު ހޭދައެއް ކޮށްގެން ވޯޓަކަށް ދަނީ ވަކި ބޭފުޅަކަށް ވެރިކަމަށް ވަޑައިގެންނެވެން އޮތް މަގަކީ ބަރުލަމާނީ ކަމަށް ވާތީ ކަން އޭނާ ފާހަގަކުރެއްވި އެވެ. ނަމަވެސް އެއީ ބޭކާރު ހަރަދެއް ކަމަށް ވިދާޅުވި އެވެ.

ހިންނަވަރު ދާއިރާގެ މެމްބަރު ޖީހާން މަހްމޫދު ސިފަކުރެއްވި ގޮތުގައި ނިޒާމީ ވޯޓަކީ ރާއްޖެއަށް ގެންނަން އުޅޭ 'ނިޒާމީ ބަގާވާތެކެ'ވެ. އެމްޑީީޕީއަކީ ބަގާވާތާ ދެކޮޅު ބަޔަކަށް ވާތީ، އެކަމާ ދެކޮޅު ކަމަށް ވެސް އޭނާ ވިދާޅުވި އެވެ.

"އިންތިހާބީ ރައީސަކު ހުއްޓާ، އިންތިހާބަކުން ސާފު ޖަވާބެއް ރައްޔިތުން ދީފައި އޮއްވާ، އިންތިހާބީ ރައީސަށް ހައްގުވާ ފަސް އަހަރުގެ މުއްދަތު ވެރިކަން ކުރުމަށް ފުރުސަތު ގެއްލުވާލުމަކީ އަސްލު ހަގީގަތުގައި ނިޒާމީ ބަގާވާތެއް ކަމަށް އަޅުގަނޑުމެން ދެކެނީ،" ޖީހާން ވިދާޅުވި އެވެ.

"ނިޒާމީ ބަގާވާތެއް ނުވަތަ ކޮންމެ ފަދަ ބަގާވާތަކީ ވެސް އަޅުގަނޑު ގަބޫލުކުރާ ގޮތުގައި މި ޕާޓީ ތާއީދުކުރާނެ އަދި ބައިވެރިވާނެ ކަމެއް ނޫން. އެހެންކަމުން އެމްޑީޕީ ބަގާވާތާ ދެކޮޅު، ނިޒާމީ ބަގާވާތާ ދެކޮޅު، ބަރުލަމާނީއާ ދެކޮޅު."

ރިޔާސީ އިންތިހާބު ގެއްލުމުން ރައީސް ސޯލިހާއި އެމްޑީޕީ މިވަނީ މި ވަގުތަށް 'މަގުމަތިވެފަ' އެވެ. މޫސާ އަލިމަނިކު ވިދާޅުވި ގޮތުން ނަމަ 'އަޅުގަނޑުމެން ވެސް މި ތިބީ މަގުމަތީގަ' އެވެ. އަދި 'އެ ބޭފުޅުން [ދަ ޑިމޮކްރެޓްސް] ވެސް ދެން ތިބެންވާނީ މަގުމަތީގަ' އެވެ.

"އިރާދަކުރެއްވިއްޔާ އަޅުގަނޑުމެން މަގުމަތީގައި ތިބެގެން ބޮޑުވާނީ. އެ ބޭފުޅުން މަގުމަތީގައި ތިބެގެން ހުލިވާނީ."

އެމްޑީޕީ ގައުމީ މަޖިލިހުގެ ރޭގެ ޖަލްސާއަކީ، މި ހުރިހާ ވާހަކަތަކަށް ބަލާއިރު، ނަޝީދާ ދެކޮޅަށް ދައްކާލި އެއްބައިވަންތަކަމެކެވެ. ބަރުލަމާނީއަށް ތާއީދުނުކުރަން އިއްތިފާގުން ނިންމީ އެވެ. އެހެންކަމުން އެމްޑީޕީ އޮތީ ނަޝީދުގެ ސިޔާސީ އެންމެ ބޮޑު ހުވަފެނުގައި ކުލަ ޖައްސައިދޭން ތައްޔާރަކަށް ނޫނެވެ. ނަޝީދާ ނުލައި ކުރިއަށް ދާ ގޮތަށެވެ.