ހިޔާ ފެލެޓްގެ ކުލި ކުޑަކުރަން ގޮވާލައި ސިލްސިލާ މުޒާހަރާތަކެއް

ހުޅުމާލޭ ދެ ވަނަ ފިޔަވަހީގައި އަޅާފައިވާ ހިޔާ ފްލެޓުތަކުގެ ކުލި ކުޑަކޮށްދޭން ގޮވާލައި ކޮންމެ ރެއަކު ސިލްސިލާ މުޒާހަރާތަކެއް ބާއްވަން، އެ ފްލެޓުތަކުގައި ދިރިއުޅޭ މީހުން ތަމްސީލުކުރާ ޖަމިއްޔާ ކަމަށްވާ ހިޔާ ޔޫނިއަނުން ފަށައިފި އެވެ.

މައްސަލައިގެ ފެށުން - ހިޔާ ފްލެޓުތަކުގައި މީހުން އާބާދުވާން ފެށީ ޖުލައި 2021ގަ އެވެ. އެ ފްލެޓުތައް ހަވާލުކުރީ ފްލެޓު ލިބޭ ފަރާތުން އަމިއްލައަށް ފިނިޝިން މަސައްކަތް ކުރާ ގޮތަށް ކަމަށް ވާއިރު، އެޕާޓްމަންޓެއްގެ މަހު ކުއްޔަކީ، މެއިންޓަނެންސް ފީއާ އެކު 8،500ރ. އެވެ. އެގޮތުން:

ވީ ކިހިނެއް؟ - ކުލި ކުޑަކޮށްދޭން ގޮވާލައި ހިޔާ ޔޫނިއަނުން ދަނީ މިދިޔަ ހޯމަ ދުވަހު ރެއިން ފެށިގެން ސިލްސިލާ މުޒާހަރާތަކެއް ބާއްވަމުންނެވެ. ރޭ ވެސް އެ ސަރަހައްދުގައި މުޒާހަރާކޮށްފައިވެ އެވެ.

ތަފްސީލު - ހިޔާ ޔޫނިއަންގެ އޮފިޝަލަކު މިއަދު 'ދައުރު'އަށް ވިދާޅުވީ ރޯދަ މަހު ފަހު ދިހައާ ޖެހެންދެން ކޮންމެ ރެއަކު ސިލްސިލާ މުޒާހަރާތައް ބޭއްވުމަށް ހަމަޖެހިފައިވާ ކަމަށެވެ. އޭގެ ފަހުން ވެސް މައްސަލައެއް ހައްލެއް ނުލިބޭ ނަމަ މުޒާހަރާތައް މެދުނުކެނޑި ބޭއްވުމާ މެދު ގޮތްތަކެއް ނިންމާނެ ކަމަށް އޭނާ ވިދާޅުވި އެވެ.

"އަޅުގަނޑުމެންގެ ޑިމާންޑަކީ އެކަށީގެންވާ އަގަކަށް ކުލި ކުޑަކޮށްދިނުން. މިހާރު ކަނޑައަޅާފައިވާ އަގަކީ ފްލެޓް ލިބުނު ގިނަ މީހުންނަށް މާ ބޮޑު އަދަދެއް،" އޭނާ ބުންޏެވެ.

އެނގުން މުހިންމު - މި މަހުގެ ކުލި މި މަސް ނިމެންދެން އެއްވެސް ޖޫރިމަނާއަކާ ނުލާ ބަލައިގަންނަން އެޗްޑީސީން ވަނީ ނިންމާފަ އެވެ. ނަމަވެސް، އަންނަ މަހުން ފެށިގެން ކޮންމެ މަހަކު ވެސް، ޖޫރިމަނާއާ ނުލައި ކުލި ދެއްކޭނެ އެންމެ ފަހު ތާރީހަކީ ކޮންމެ މަހެއްގެ ވެސް 10 ވަނަ ދުވަހެވެ.

ދިގު މުއްދަތަކަށް ކުލި ނުނަގާ ގޮތަށް ހަމަޖައްސައިދީފައި އޮތުމަށް ފަހު މި މަހު ކުލި ނަގަން ފެށުމާ އެކު ބައެއް މީހުން މިހާރު ވެސް ކުލި ދައްކަމުން އަންނަ ކަމަށް އެޗްޑީސީން މީގެ ކުރިން ވަނީ ބުނެފަ އެވެ. ނަމަވެސް، ހިޔާ ޔޫނިއަން ޖަމިއްޔާއިން ވަނީ ކުލި ނުދެއްކަމަށް ހިޔާގެ ރަށްވެހިންނަށް ގޮވާލާފަ އެވެ. އެގޮތަށް ގޮވާލާތީވެ، އެޗްޑީސީން ވަނީ އެކަން ކުށްވެރިކޮށް، ފިޔަވަޅު އަޅާނެ ކަމުގެ އިންޒާރު ދީފަ އެވެ.