ހަލީމަތު ލަމްހާ އަބްދުއްރަހްމާން ޝަރީއަތުގެ މަޖިލީހެއްގައި.
ލަމްހާގެ ގެއިން ފެނުނު އިންޖެކްޝަންގައި ހުރި ކެމިކަލް މޭރީގެ ލޭގައި ހުރި
ހަލީމަތު ލަމްހާ އަބްދުއްރަހްމާންގެ ގެއިން ފެނުނު ނުރައްކާތެރި އިންޖެކްޝަނެއްގައި ހުރި ކެމިކަލް، އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސްއޮނެޑް ޕިނެޑާގެ ލޭގައި ހުރި ކަމަށް ދައުލަތުން މިއަދު ކްރިމިނަލް ކޯޓުގައި ބުނެފި އެވެ.
މައްސަލައިގެ ފެށުން - ބިދޭސީ ނަރުހުގެ މަރުގެ މައްސަލައިގައި ލަމްހާގެ އިތުރުން ދެން ދައުވާ އުފުލާފައި ވަނީ އޭނާގެ ލޯބިވެރިޔާ ކަމަށް ބެލެވޭ ފިލިޕީންސްގެ ނަރުސް މާވިން އެސްވައި ވާގަސް އަށެވެ. މާވިން އަކީ މޭރީގެ ފިރިމީހާ އެވެ. ލަމްހާ އާއި މާވިން ވެސް މިހާރު ތިބީ ޝަރީއަތް ނިމެންދެން ބަންދުކޮށްފަ އެވެ.
އެ މައްސަލައިގައި ލަމްހާގެ ގެ ބަލައި ފާސްކުރި އިރު، އައިޖީއެމްއެޗްގެ ހުއްދަ ނެތި އެ ހޮސްޕިޓަލުން ނަގާފައިވާ "މީހެއްގެ ފުރާނަ ދުއްވާލެވޭ ވަރުގެ ބާރުގަދަ" މަނާ ބޭސްތަކެއް ވެސް ފެނިފައިވާކަން ވަނީ ހާމަވެފަ އެވެ.
ލަމްހާއަށް ކޮށްފައިވާ ދައުވާތައް:
-
އެނގި ހުރެ މީހަކު މެރުމުގައި ބައިވެރިވުމުގެ ދައުވާ
-
އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ
-
ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާ
ތަފްސީލް - އެ މައްސަލައިގައި މިއަދު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި ދައުލަތުގެ ވަކީލު އަހްމަދު ނައުފަލް ވިދާޅުވީ މޭރީ ހޮސްޕިޓަލަށް ގެންދިޔައިރު ނެގި ލޭގެ ޓޮކްސިކޯލޮޖީ ރިޕޯޓު ތައްޔާރުކުރަމުން އަންނަނީ ރާއްޖޭން ބޭރުން ކަމަށާއި ނަމަވެސް އެ ރިޕޯޓުގެ ނަތީޖާ އަނގަބަހުން ލިބިފައިވާ ކަމަށެވެ.
ބުނީ ކީކޭ؟ - އެ ރިޕޯޓުން ދައްކާ ގޮތުން، 'ސަކްސިނައިލްކޯލިން' ކިޔާ ކެމިކަލެއް މޭރީގެ ލޭގައި ހުރި ކަމަށް ފެނިފައިވާ ކަމަށް ދައުލަތުގެ ވަކީލު ވިދާޅުވި އެވެ.
އެއީ ލަމްހާގެ ގެއިން ފެނުނު ތިން އިންޖެކްޝަންގެ ތެރޭގައި ހިމެނޭ އެއް އިންޖެކްޝަންގައި ހުރި ކެމިކަލް ކަމަށާއި އެ އިންޖެކްޝަން ބޭނުންކޮށްފައި ހުރި ކަމަށް ވެސް ވަކީލު ވިދާޅުވި އެވެ. ތަހުލީލު ރިޕޯޓާ ހަވާލާދެއްވައި ވަކީލު ފާހަަގަކުރެއްވި ގޮތުގައި:
-
އެ އިންޖެކްޝަންގައި ހުންނަން ޖެހޭނީ 10 އެމްއެލް، ނަމަވެސް ފެނުނުއިރު އޭގައި ހުރީ 4 އެމްއެލް
-
އޭގެ ރަބަރު ސީލް ޓެމްޕާކޮށްފައިވާ ކަމަށް
[ލަމްހާ މޭރީއަށް] ރުޅިވެރިކަމާއި އިންޒާރު ދީފައިވޭ. އެހެންކަމުން، މޯޓިވް އޮތްކަން ސާފުކޮށް އެބަ އެނގޭ.
ލަމްހާގެ ގެއިން ދެން ފެނުނީ ޕްރޮޕޮފޯލް އަދި ޕޮޓޭސިއަމް ކްލޮރައިޑް އިންޖެކްޝަން އެވެ. އެ އިންޖެކްޝަންތަކާ ގުޅޭ ގޮތުން ދައުލަތުން ފާހަގަކުރި ގޮތުގައި:
-
އެއީ ހުއްދަ ނެތި ހޮސްޕިޓަލުން ބޭރު ނުކުރެވޭނެ އެއްޗެހި
-
އެއީ އެކުގައި ބޭނުންކޮށްފި ނަމަ މީހަކު މަރާލެވޭނެ އަދި މީހަކު ޕެރަލައިޒް ކޮށްލެވޭނެ އެއްޗެހި
-
ތަމްރީނުވެފައި ހުރި ނަރުހެއްގެ އަތުގައި އެފަދަ ނުރައްކާތެރި އެއްޗެހި ހުރެގެން ނުވާނެ
"މީހަކު މަރާލެވޭ ފަދަ އެއްޗެހި މި ހުރީ ލަމްހާގެ އަތުގައި،" ވަކީލު ވިދާޅުވި އެވެ.
ދައުލަތުން ބުނީ މޭރީ ގްރޭސްގެ ލެއިން ކެމިކަލް ފެނުނު އިރު، މޭރީގެ ހަށިގަނޑުން އިންޖެކްޝަން ޖަހާފައި ހުރި ނިޝާންތަކެއް ފެނުނު ކަމަށެވެ. ދައުލަތުން ބުނީ ލަމްހާގެ ބައިވެރިވުން މިކަމުގައި އޮތް ކަމާ އަދި ނިޔަތް އޮތްކަން ވެސް އެނގޭ ހެކިތައް އެބަހުރި ކަމަށެވެ.
"ރުޅިވެރިކަމާއި އިންޒާރު ދީފައިވޭ. އެހެންކަމުން، މޯޓިވް އޮތްކަން ސާފުކޮށް އެބަ އެނގޭ،" ވަކީލު ވިދާޅުވި އެވެ.
ދައުލަތުގެ ވަކީލު ވިދާޅުވީ:
-
މޭރީ މަރާލި ދުވަހު ލަމްހާ އެ ގެއަށް ވަދެފައިވާކަން ފެންނަ ވީޑިއޯ ފުޓޭޖުގެ އެނަލިސިސް ރިޕޯޓު މިހާރު ތައްޔާރުކޮށް ނިމިފައިވާ ކަމަށް؛ މާދަމާ އެ ރިޕޯޓު ހުށަހަޅާނެ ކަމަށް
-
މޮބައިލް ފޮރެންސިކް ރިޕޯޓު ވެސް ދެ ދުވަހެއްގެ ތެރޭގައި ހުށަހަޅާނެ ކަމަށް
-
މޭރީގެ ލޭގެ ޓޮކްސިކޯލޮޖީ އިތުރު ރިޕޯޓެއް ތައްޔާރުކުރަމުން އަންނަ ކަމަށް
-
މޭރީ އާއި މާވިންގެ ދަރިފުޅުގެ ފޮރެންސިކް ސައިކޮލޮޖިކަލް ރިޕޯޓެއް ވެސް ތައްޔާރުކުރަމުން އެބަދޭ؛ ފިލިޕީންސްގައި ތައްޔާރުކުރަމުން އަންނަ އެ ރިޕޯޓު ލިބޭނެ ވަކި ތާރީހެއް އަދި ނޭނގޭ ކަމަށް ދައުލަތުން ބުނި
ޕޯސްޓްމޯޓަމް އިން އެނގޭ ގޮތުގައި މޭރީ މަރުވީ ދަންޖެހިގެންނެއް ނޫންނެވެ. އޭނާ މަރުވީ ބޮލަށާއި ކަރަށް ދީފައިވާ އަނިޔާތަކުގެ އިތުރުން، ނޭވާ ހާސްކޮށްލާފައިވާލަން ޕޯސްޓްމޯޓަމް ރިޕޯޓުން ވަނީ ހާމަވެފަ އެވެ.
އެނގުން މުހިންމު - ދެ ލޯބިވެރިން ކަމަށް ބެލެވޭ މާވިން އާއި ލަމްހާއާ ދެމެދު ބަދަލުކުރި މެސެޖްތަކުގެ ތަފުސީލު، މީގެ ކުރިން ބޭއްވި އަޑުއެހުމެއްގައި ދައުލަތުން ހާމަކުރި އެވެ. އެ މެސެޖުތަކުގައި މީހަކު މަރުވެދާ ފަދަ ނުރައްކާތެރި ސިރިންޖުތަކެއް ބޭނުންކުރުމުގެ ވާހަކަތަކެއް ބަދަލުކޮށްފައި ހުރިކަން ވަނީ ހާމަވެފަ އެވެ.
މިއީ ދެ މީހަކު ގުޅިގެން މީހަކު މަރާލި މައްސަލައެއް ކަމަށާއި މޭރީ މަރާލީ ދުރާލާ އެކަމަށް ރާވައި ލަމްހާގެ ފުރިހަމަ ބައިވެރިވުމާ އެކުކަން ބުނެދިނުމަށް ދައުލަތުން އެ ދުވަހު ކޯޓުގައި މުހިންމު ވާހަކަތަކެއް ހާމަކުރި އެވެ. އެގޮތުން، ދައުލަތުން ބުނީ:
-
ލަމްހާ އާއި މާވިން ރައްޓެހިވެގެން އުޅޭކަން މޭރީ އަށް އެނގި، އެ ދެ އަންހެނުންގެ ދެމެދުގައި މައްސަލަތަކެއް ޖެހުނު ކަމަށް
-
މޭރީއަށް ލަމްހާ އިންޒާރުދިން ކަމަށް
-
މޭރީ މަރާލާން ރޭވީ މާވިން އާއި ލަމްހާއާ ދެ މީހުން ކަމަށް
-
މޭރީ މަރާލަން މާވިންއަށް މަގުފަހިކޮށްދިނުމަށް، މޭރީ މަރާލި ދުވަހު މޭރީ އާއި މާވިންގެ ދަރިފުޅު ލަމްހާގެ ގެއަށް ގެންދިޔަކަން
-
މޭރީ ބްރޭކަށް ގެއަށް ދިޔައީ އެ ދުވަހުގެ މެންދުރު 12:02 ހާއިރު ކަމަށް
-
މޭރީއަށް މާވިން ހަމަލާ ދިނީ އެ ވަގުތު ކަމަށް
-
މޭރީ މަރާލި ފަހުން ލަމްހާ ކުޑަކުއްޖާ ގޮވައިގެން އެ ގެއަށް ދިޔަ ކަމަށް
-
ލަމްހާ އެ ގެއަށް ވަދެ ގޭތެރޭގައި 20 މިނެޓު ހޭދަކުރި ކަމަށް
-
މޭރީ ދަންޖެހިފައިވާ ކަމަށް ބުނެ މާވިން އެމްބިއުލާންސަށް ގުޅީ ލަމްހާ އެ ގެއިން ނުކުމެގެން ދިޔަތާ އެއް މިނެޓު ފަހުން ކަމަށް