ހަނގުރާމައިގެ ސަބަބުން ޒުވާނުންގެ ގިނަ މަޝްރޫއުތައް 6 މަސް ލަސްވެއްޖެ؛ އެކަމަކު ދެން ލަސްނުވެ ކުރިއަށް ދާނެ: ރައީސް

ޒުވާނުންނަށް ހާއްސަ އެކި ކަހަލަ ކުޅިވަރު ކުޅޭ ތަންތަން ގާއިމް ކުރުމުގެ މަޝްރޫއުތައް މެދުއިރުމަތީގެ ހަނގުރާމައިގެ ސަބަބުން ހައެއްކަ މަސް ލަސްވެއްޖެ ކަމަށާއި ނަމަވެސް ދެން އެ މަޝްރޫއުތައް އަވަސް މިނުގައި ހިނގައިގަނެ، ކުރިއަށް އޮތް ދެ އަހަރު ތެރޭ ނިންމާލެވޭނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ. ހުރިހާ މަޝްރޫއުތަކެއް އެއްކޮށް ނިންމާލެވޭނީ، ރައީސް ވިދާޅުވި ގޮތުގައި، 2028ގެ ކުރީކޮޅު އެވެ.

ވީ ކިހިނެއް؟ - ރައީސް އޮފީހުން ކޮންމެ ހުކުރު ދުވަހަކު ގެނެސްދޭ ރައީސް މުއިއްޒުގެ ހާއްސަ ޕޮޑްކާސްޓް، 'ދަ ޕަލްސް'ގެ މި ހަފްތާގެ މައުލޫއަކަށް އޮތީ ޒުވާނުން ބާރުވެރިކުރުމާ ގުޅޭ މައުލޫ އެވެ. އެ މައުލޫގައި ކުރި ސުވާލުތަކަށް ޖަވާބު ދެއްވަމުން ރައީސް ވަނީ މި ސަރުކާރުން ޒުވާނުންނަށް އަމާޒުކޮށްގެން ހިންގާ މަޝްރޫއުތަކާއި ކުރިއަށް ރޭވިފައި ހުރި ބައެއް ކަންކަމާ ގުޅޭ ގޮތުން ވާހަކަފުޅު ދައްކަވާފަ އެވެ.

ތަފްސީލު - ރިޔާސީ ކެމްޕެއިން ތެރޭ ޒުވާނުންނަށް ރައީސް ވެވަޑައިގެންނެވި އެއް ވައުދަކީ ރޭސިން ޓްރެކެއް ގާއިމް ކުރުމުގެ ވައުދެވެެ. ހުޅުލޭ ހައިވޭގެ އިރުމަތީ ފަރާތުގައި އެ ޓްރެކް ގާއިމް ކުރުމަށް ބިން ހިއްކުމުގެ މަޝްރޫއު، ނިމިދިޔަ ކައުންސިލް އިންތިހާބާ ދިމާކޮށް ފެށި އެވެ. ނަމަވެސް އެ މަޝްރޫއު އޮތީ މިހާރު މަޑުޖެހިފަ އެވެ. މަޝްރޫއު ލަސްވި ސަބަބާ ގުޅޭ ޕޮޑްކާސްޓުގައި ރައީސް ވަނީ ވާހަކަފުޅު ދައްކަވާފަ އެވެ.

"[ރޭސިން ޓްރެކް ގާއިމް ކުރަން] ބިން ހިއްކުން ލަސްވެއްޖެ. ބޭނުންވާ މެޓީރިއަލް ހާއްސަކޮށް، އެތަން ޕްރޮޓެކްޓް ކުރުމަށް ބޭނުންވާ ޝޯ ޕްރޮޓެކްޝަން މެޓީރިއަލް [ލިބުން] ލަސްވެގެން. އެހެން ނަމަވެސް، އެ މަސައްކަތް ވެސް ކުރިއަށް އޮތް ދުވަސްތަކުގައި ބާރަށް ކުރިއަށް ދާނެ،" ރައީސް ވިދާޅުވި އެވެ.

އެއާ އެކު، ރައީސް ވިދާޅުވީ ޒުވާނުންނަށް ހާއްސަކޮށްގެން މި ސަރުކާރުން ފެށި ބައެއް އެހެން މަޝްރޫއޫތައް ވެސް ލަސްވެއްޖެކަން ގަބޫލު ކުރައްވާ ކަމަށެވެ. އޭގެ ސަބަބަކީ، އެ މަނިކުފާނު ވިދާޅުވި ގޮތުގައި، މެދުއިރުމަތީގެ ހަނގުރާމަ އެވެ.

"ޑިލޭސްތަކެއް މި ހުރިހާ ކަމެއްގައި ވެސް އައި މެދުއިރުމަތީ ހަނގުރާމައާ ގުޅިގެން އަޅުގަނޑުމެން ފައިސާ ހަރަދުކުރަން ޕްރައޮރަޓައިޒް ކުރަން ޖެހޭ ކަންކަމަށް، ހާއްސަކޮށް ތެލަށް ކުރަން ޖެހޭ ހަރަދާ އެކު ގިނަ މަޝްރޫއުތައް ހައެއްކަ މަސް ޑިލޭ ވެއްޖެ. އެހެން ނަމަވެސް، މިހާރު ރިކަވާ ވެގެން މިދަނީ އިރާދަކުރެއްވިއްޔާ ކުރިއަށް،" ކުރިއަށް އޮތް ތަނުގައި މި މަޝްރޫއުތައް ނިމިގެންދާނެކަން ފާހަގަ ކުރައްވައި ރައީސް ވިދާޅުވި އެވެ.

ރައީސް ވިދާޅުވި ގޮތުގައި، އެ މަނިކުފާނު ވެރިކަމަށް ވަޑައިގެންނެވިއިރު ޒުވާނުން ކުޅިވަރު ކުޅޭ ވަސީލަތްތައް ގާއިމްކުރެވިފައިވާ މަރުކަޒުތައް ވަރަށް މަދެވެ. ނަމަވެސް މި ސަރުކާރުގައި ޒުވާނުންގެ މަރުކަޒުތައް ހިމެނޭހެން ޒުވާނުންނަށް ހާއްސަ ގިނަ މަޝްރޫއުތަކެއް މިހާރު ވެސް ހިނގަމުންދާކަން ރައީސް ފާހަގަކުރެއްވި އެވެ.

"މިހާރު އަޅުގަނޑުމެން ފަށައިގެން މިއުޅޭ މަޝްރޫއުތައް އިރާދަކުރެއްވިއްޔާ މި ދައުރު ތެރޭގައި ނިމިގެންދާއިރު، ފެނިގެން ދާނެ އެއްވެސް ރަށެއް ބާކީނުކޮށް، ރާއްޖޭގެ ކޮންމެ ރަށެއްގައި އެންމެ ޒަމާނީ ފެންވަރުގެ ފިޓްނެސް މަރުކަޒެއް. މިހާރު އެ ދަނީ އެތައް ރަށެއްގައި އޭގެ އަމަލީ މަސައްކަތްތައް ކުރިއަށް،" ރައީސް ވިދާޅުވި އެވެ.

ރަށްތަކުގައި ގާއިމް ކުރާ އެ މަރުކަޒުތަކުގެ ތެރެއިން %50ގެ ރަށްތަކުގެ މަރުކަޒުތައް މިއަހަރު ފަހުކޮޅު ނިންމާލެވޭނެ ކަމަށް ރައީސް ވިދާޅުވި އެވެ. އަދި އަންނަ އަހަރު ފަހުކޮޅު ހުރިހާ ރަށްތަކެއްގެ މަރުކަޒުތައް ނިންމާލެވޭނެ ކަމަށް ވެސް އެ މަނިކުފާނު ވިދާޅުވި އެވެ.

އޭގެ އިތުރުން، ރައީސް ވިދާޅުވީ:

"މިއީ ދުވަހަކު ވެސް ރާއްޖޭގައި ފެނުނު ކަންތައްތަކެއް ނޫން. ޒުވާނުންނާއި ޖުމްލަކޮށް ހުރިހާ ފަރާތްތަކަށް މި ތަންތަން ބޭނުން ކުރެވޭނެ،" ރައީސް ވިދާޅުވި އެވެ.

މި ޕޮޑްކާސްޓުގައި ރައީސް ވަނީ މާލެ ސަރަހައްދުގައި ވެސް ޒުވާނުންނަށް ހާއްސަކޮށްގެން ފަށާ އަދި ފަށަން ހުރި ބައެއް މަޝްރޫއުތަކުގެ ފަހުގެ ތަފްސީލު ވެސް ދެއްވާފަ އެވެ. އެގޮތުން، އެ މަނިކުފާނު ވިދާޅުވީ:

"އެހެންވީމަ އެކި ކަހަލަ ކުޅިވަރުތަކަށް އެކި ކަހަލަ ސްޓޭޑިއަމްތަކާއި އެކި ކަހަލަ ފެސިލިޓީތައް މިއަހަރާއި މިއަންނަ އަހަރު ތެރޭގައި ގިނަ ތަންތަން ނިމި، ހުޅުވިގެން [ދާނެ އަދި] އެންމެ ލަސްވެގެން 2028ގެ ފުރަތަމަ ކުއާޓަރަށް ދާއިރު، ހުރިހާ ތަނެއް ނިމިފައި ހުންނާނީ،" ރައީސް ވިދާޅުވި އެވެ.