ޕީޖީ ގްރޫޕު ކުރިމަތީ އަސްމާ ކިބައިން ރައީސް މާފަށް އެދިވަޑައިގެންނެވި: ސަލީމް

ވެރިކަންކުރާ ޕީއެންސީގެ ޕާލިމެންޓްރީ ގްރޫޕު މެންބަރުންގެ ކުރިމަތީ، މާފަންނު މެދު ދާއިރާގެ މެންބަރު އަސްމާ ރަޝީދުގެ ކިބައިން ރައީސް މުހައްމަދު މުއިއްޒު މާފަށް އެދިވަޑައިގެންނެވި ކަމަށް މަޖިލީހުގެ ނައިބު ރައީސް އަހުމަދު ސަލީމް (ރެޑްވޭވް ސަލީމް) ރޭ ވިދާޅުވެއްޖެ އެވެ.

ވީކިހިނެއް؟ - ކައުންސިލް އިންތިހާބުގައި ޕީއެންސީއަށް ލިބުނު ނާކާމިޔާބީއަށް ފަހު، އަސްމާ ސަރުކާރަށް ފާޑުވިދާޅުވެ، ވާހަކަ ދައްކާ އޯޑިއޯއެއް ލީކްވި އެވެ. އަދި އޯޑިއޯ ލީކްވުމާ އެކު އަސްމާގެ އާއިލާގެ ދެ މެންބަރަކު މަގާމުން ވަކިކޮށް، އަލުން އައްޔަންކޮށްފައިވެ އެވެ. އެ ގޮތުން:

ތަފްސީލް - ޕީއެންސީން ރޭ ބޭއްވި ޖަގަހަ ޖަލްސާގައި ވާހަކަ ދައްކަވަމުން ސަލީމް ވިދާޅުވީ، ރައީސް މުއިއްޒު ޕާލިމެންޓްރީ ގްރޫޕުގެ ވަކިވަކި މެންބަރުންނާ ވަކިން ބައްދަލުކުރައްވައި ކުރިއަށް ދާނެ ގޮތާ ގުޅޭ ގޮތުން މަޝްވަރާކުރައްވައި އިރުޝާދު ދެއްވި ކަމަށެވެ.

ވަކިވަކިން ކޮންމެ މެންބަރަކާ ބައްދަލުކުރެއްވުމަށް ފަހު، ޕާލިމެންޓްރީ ގްރޫޕުގެ ހުރިހާ މެންބަރުންގެ ކުރިމަތީ އަސްމާގެ ކިބައިން ރައީސް މުއިއްޒު މާފަށް އެދިވަޑައިގެންނެވި ކަމަށް ސަލީމް ވިދާޅުވި އެވެ.

"އަސްމާއްތައާ މެދު އަޅުގަނޑުމެންގެ ޕާޓީގެ ތެރޭގައި ހިތްހަމަޖެހުންތަކެއް ހިނގި. އެކަމަކު ނިކަން ވިސްނާބައްލަވާ، އެ ދުވަހު ޕާލިމެންޓްރީ ގްރޫޕުގެ އެންމެންގެ ކުރިމަތީގައި އެ މަނިކުފާނު އަސްމާއްތާގެ ކިބައިން މާފަށް އެދިވަޑައިގަތީއޭ،" އެ މަނިކުފާނު ވިދާޅުވި އެވެ.

ރައީސްގެ އެ އަމަލު ސަލީމް ސިފަކުރެއްވީ 'ހުލްގު ހެޔޮ' އަމަލެއްގެ ގޮތުގަ އެވެ. އަދި ރައީސަށް އިހުލާސްތެރިކަމާ އެކު ޕާޓީން މަސައްކަތްކޮށްގެން ކާމިޔާބު ހޯދޭނެ ކަމަށް އެ މަނިކުފާނު ވިދާޅުވި އެވެ.

"އަޅުގަނޑުމެންގެ އޮންނަންވީ އިހުލާސްތެރިކަން ރައީސުލްޖުމްހޫރިއްޔާއާ ދޭތެރޭގައި. އެ ވެރިޔަކު އުރެދުމަކަށް ކިޔަމަންވާން އަމުރުުނުކުރާހާ ހިނދަކު އެ ވެރިއަކަށް ކިޔަމަންވާން އަޅުގަނޑުމެންގެ އިސްލާމް ދީނުގައި ވެސް އަންގަވާފައި އޮންނަނީ،" ސަލީމް ވިދާޅުވި އެވެ.