ކޯޓު އަމުރާ ހިލާފުވި ކަމަށް ބުނެ 'އަދަދު'ގެ ނޫސްވެރިޔާ ރައީސްގެ ނޫސްވެރިންގެ ބައްދަލުވުމުން ނެރެފި

ރައީސް މުހައްމަދު މުއިއްޒަށް ތުހުމަތުތަކެއްކޮށް 'އަދަދު' ނޫހުން އުފެއްދި ޑޮކިއުމެންޓްރީއާ ގުޅިގެން ކްރިމިނަލް ކޯޓުން އިއްޔެ ނެރުނު އަމުރުގައި، މި މައްސަލާގައި ކޯޓުން ވަކި ގޮތެއް ކަނޑައަޅަންދެން 'އައިޝާ' ޑޮކިއުމެންޓްރީ ދައުރު ނުކުރުމަށާއި ސީދާ ގޮތުންނާއި ނުސީދާ ގޮތުން ވެސް ޑޮކިޔުމެންޓްރީގައި ދައްކާފައިވާ އެއްވެސް ވާހަކައެއް ނުދެއްކުމަށާއި ޑޮކިއުމެންޓްރީއާ ގުޅުވާ މައްސަަލައިގެ ހަސްމަކަށް ނުވަތަ ކުށުގެ ޝިކާރައަކަށްވި މީހާގެ އެއްވެސް ވާހަކައެއް ނުދައްކަން އަމުރުކޮށްފައި ވަނިކޮށް، ރައީސް މިއަދު ބޭއްވެވި ނޫސްވެރިންގެ ބައްދަލުވުމުގައި އެއާ ގުޅޭ ސުވާލެއް 'އަދަދު'ން ކުރުމުން އެ ނޫހުގެ ނޫސްވެރިޔާ މުހައްމަދު ޝަހުޒާން ރައީސް އޮފީހުގެ ޕްރެސް ރޫމުން މިއަދު ނެރެފި އެވެ.

ވީ ކިހިނެއް؟ - ޝަހުޒާން ސުވާލު ކުރުމުން ރައީސް ވިދާޅުވީ ކޯޓުން 'ގެގް އޯޑާ'އެއް ނެރެފައިވާ ކަމަށާއި އެ ސުވާލު ކުރުމުން ޝަހުޒާން ކޯޓު އަމުރާ ހިލާފުވެފައިވާ ކަމަށެވެ.

ބުނީ ކީކޭ؟ - "އަޅުގަނޑު އެދެނީ ޝަހުޒާން މި މާލަން ދޫކުރައްވާ ވަޑައިގަންނަވަން،" އެ މަނިކުފާނު ވިދާޅުވި އެވެ.

"ކަނޑައެޅިގެން ދޮގު ވާހަކަ، ދޮގު ތުހުމަތު އަޅުގަނޑު ބޮލުގައި ތި އަޅުވަނީ."

ރައީސް ވިދާޅުވީ އެ މަނިކުފާނުގެ ބޮލުގައި ދޮގު ތުހުމަތު އެޅުވުން ބަލައިނުގަންނާނެ ކަމަށާއި ރައީސް އޮފީހުގެ ޕްރެސް ރޫމްގައި ކޯޓު އަމުރާ ހިލާފު ކަމެއް ނުކުރެވޭނެ ކަމަށެވެ.

މައިކުން އަޑުކަނޑާލާފައި ވަނިކޮށް ވެސް ޝަހުޒާން ސުވާލުކުރަން ފެށުމުން ރައީސް ވިދާޅުވީ ރައީސް އޮފީސް ތެރޭ 'ރޫލް އޮފް ލޯ' ހިފެހެއްޓޭނެ ކަމަށެވެ. އެއާ އެކު، ސެކިއުރިޓީން ވަދެ ޝަހުޒާން އެ މާލަމުން ވަނީ ނެރެފަ އެވެ.

ގުޅުން ހުރި - 'އަދަދު' ނޫހުން އުފެއްދި ޑޮކިއުމެންޓްރީއާ ގުޅިގެން، އެ ނޫހުގެ ސީއީއޯ ހުސެން ފިޔާޒު މޫސާ އާއި އެޑިޓަރު ހަސަން މުހައްމަދުގެ މައްޗަށް ގަޒުފު ކުރުމުގެ ދައުވާކޮށްދޭން ކްރިމިނަލް ކޯޓަށް ހުށަހެޅީ އިއްޔެ އެވެ.

ދެ މީހުންގެ މައްޗަށް އެ ދައުވާކުރީ އަދަދު އޮންލައިންގެ އެޑިޓަރުންގެ ގޮތުގައި ތިބެ ރައީސް މުއިއްޒަށް ތުހުމަތުތަކެއްވާ ގޮތަށް ޑޮކިއުމެންޓްރީ ހަދާ، އެ އާންމުކޮށްފައި ވާތީ ކަމަށް ކޯޓުން އިއްޔެ ނެރުނު އަމުރުގައި ބުންޏެވެ.