ރައްޔިތުންނަށްޓަކާ އެންމެ ގިނަ ލޭ އޮހޮރުނީ އަޅުގަނޑު ގައިން: ނަޝީދު

އެމްޑީޕީގެ ޗެއާޕާސަންގެ އިންތިހާބަށް ވާދަކުރައްވަނީ އެމްޑީޕީގެ ވެރިންނާ ނޫން ކަމަށާއި ރައްޔިތުންނަށްޓަކާ މަގުމައްޗަށް އެންމެ ގިނަ ލޭ ގައިން އޮހޮރުވި މީހަކީ އެ މަނިކުފާނު ކަމަށް ކުރީގެ ރައީސް މުހައްމަދު ނަޝީދު ކަމަށް ރޭ ވިދާޅުވެއްޖެ އެެވެ.

ވީ ކިހިނެއް؟ - އެމްޑީޕީގެ ޗެއާޕާސަން ކަމަށް ކުރިމަތިލައްވާނެކަން އިއުލާންކުރައްވާފައިވާ އެ ޕާޓީގެ ކުރީގެ ރައީސް ނަޝީދު ވަނީ އެ މަނިކުފާނުގެ ކެމްޕޭނަށް އައްޑުއަށް ވަޑައިގެން 'ބޮޑު ބަދަލު'ގެ ނަމުގައި ރޭ ޖަލްސާއެއް ބާއްވާފަ އެވެ.

އެމްޑީޕީގެ ހުސްވެފައިވާ ޗެއާޕާސަންގެ މަގާމަށް ނަޝީދުގެ އިތުރުން ވާދަކުރަންވަނީ، ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމް އެވެ.

މިވަގުތު ދެ ފެކްޝަނަކަށް ބެހިފައި އޮތް އެމްޑީޕީގެ ތެރޭގައި މި އިންތިހާބުގެ ވާދަވެރިކަން ބޮޑުއިރު، ޗެއާޕާސަން ކަމަށް ވާދަކުރަން ހުޅުވާލި ގޮތާ މެދު ޕާޓީގެ ތެރޭގައި ހިތްހަމަނުޖެހުންތައް ބޮޑުވެފައިވަނިކޮށް، އެ އިއުލާން މިހާރު ވަނީ ބާތިލުކޮށްފަ އެވެ. 

ބުނީ ކީކޭ؟ - އައްޑޫގެ ވެރިކަންކުރާ ރަށް ހިތަދޫގައި ބޭއްވި މި ޖަލްސާގައި ނަޝީދު ވިދާޅުވީ، އެމްޑިޕީގެ ޗެއާޕާސަންގެ މަގާމަކީ މިވަގުތު ރާއްޖޭގައި އޮތް އެެންމެ މުހިންމު މަގާމު ކަމަށެވެ. އެހެންކަމުން، އައްޑުއަށް މިފަހަރު ވަޑައިގެންނެވީ ރާއްޖޭގެ ރައީސްކަމަށް ވާދަކުރެއްވުމުގެ ނިޔަތުގައި ނޫން ކަމަށް އެ މަނިކުފާނު ވިދާޅުވި އެވެ.

ނަޝީދު ވިދާޅުވީ މިވަގުތަށް އެންމެ މުހިންމީ އެމްޑީޕީ ހިންގުން ކަމަށެވެ.

"އަޅުގަނޑު ނުދަންނަވަމެއް ނޫންތޯ އައިސް އަޅުގަނޑު މިއުޅެނިކީއެއް ރައީސުލްޖުމްހޫރިއްޔާއަކަށް ވާށޭ. ސަބަބެއް އޮވެގެންނޭ އަޅުގަނޑު އެހެން ނުދަންނަވާން މިއުޅެނީ. މިކަން މާ މުހިންމޭ. މި މުއައްސަސާ [އެމްޑީޕީ] ހިންގުން މާ މުހިންމޭ،" ނަޝީދު ވިދާޅުވި އެވެ.

"ތިޔަ ބޭފުޅުންނަށް އެނގިވަޑައިގަންނަވާނެ، އަޅުގަނޑު ގައިގައި ހުރި ލެއަކީ ރީނދޫ ލޭ. މިއަދު ކަނޑާލިޔަސް، އަޅުގަނޑު ގަޔަށް ވުރެ ގިނައިން، އަޅުގަނޑު ގައިންނަށް ވުރެ އިތުރަށް މި ރާއްޖޭގެ މަގުތައް މައްޗަށް ލޭ އޮހޮރުވިފައެއް ނުވާނެ. އެ ލޭގެ ބަދަލަކީ ރާއްޖޭގެ ރައްޔިތުންނަށް ތަނަވަސްކަމުގައި އުޅެވޭނެ ގޮތެއް އަޅުގަނޑުމެން ހޯދުން. އެ މަސައްކަތް ކުރުމަށް އަޅުގަނޑު ނުކުމެ މިހުރީ."

ނަޝީދު ވިދާޅުވީ، ސިޔާސީ ޕާޓީއެއްގެ ވާހަކަ އެންމެ ފުރަތަމަ ރާއްޖޭގައި ދެއްކެވީ އެ މަނިކުފާނު ކަމަށާއި އެކަމަކީ މުޖުތަމައު ބައިބައި ކުރުވާނެ ކަމެއް ކަމަށް އޭރު ވާހަކަދެކެވުނު ކަމަށެވެ. ސިޔާސީ ޕާޓީއެއް ހިންގުމަކީ ފަސޭހަކަމެއް ނޫން ކަމަށާއި އެއީ ހަމައެކަނި ޖަލްސާ ބޭއްވުމާއި މުޒާހަރާ ކުރުމެއް ވެސް ނޫން ކަމަށް ނަޝީދު ވިދާޅުވި އެވެ.

"ދަންނަވަންތޯ އަޅުގަނޑު މި ވާދަކުރަނީ އެމްޑީޕީ ވެރިންނަކާ ނޫން. އަޅުގަނޑު އަބަދު ވެސް ވާދަކުރަނީ އިދިކޮޅު ޕާޓީއާ. އަޅުގަނޑަކަށް ނުވިސްނޭ މީގައި އިތުރު ހިޔާލެއް ނުކުންނަންވީ ސަބަބެއް،" އެ މަނިކުފާނު ވިދާޅުވި އެވެ. 

ނަޝީދު ވިދާޅުވީ:

ނަޝީދު ވިދާޅުވީ، އެ މަނިކުފާނު އެމްޑީޕީގެ ޗެއާޕާސަންކަމާ ހަވާލުވެވަޑައިގަންނަވަން ބޭނުންވާ މައިގަނޑު ސަބަބަކީ، ރާއްޖޭގެ ވެރިކަން ބަދަލުކުރުން ކަމަށާއި 2028ގައި ވެރިކަން އެމްޑީޕީއަށް ނުލިބިއްޖެ ނަމަ އެެއީ ރާއްޖެއަށް ލިބޭނެ ވަރަށް ބޮޑު ގެއްލުމެއް ކަމަށެވެ.

"އަޅުގަނޑު އައްޑޫގެ އެމްޑީޕީ މެމްބަރުންގެ އަރިހުގައި އެދެން، ތިބޭފުޅުން ވަރަށް ވިސްނަވައްޗޭ، ވަރަށް ވިސްނަވާފައި މި ވޯޓު އަޅުގަނޑަށް ދެއްވުމަށް އަޅުގަނޑު ވަރަށް ވަރަށް އިހުލާސްތެރިކަމާ އެކު އެދެން،" ނަޝީދު ވިދާޅުވި އެވެ.