ގެދޮރުވެރިޔާ ސްކީމުގެ ދަށުން ދޫކުރާ ފްލެޓުތައް (ފޮޓޯ/އެފްޑީސީ)
ގެދޮރުވެރިޔާ ފްލެޓްތަކުގެ ކުލިން 500-1،000ރ. ކުޑަކޮށް ޑައުންޕޭމަންޓަށް ވެސް ބޮޑު ލުއެއް ދެނީ
މިދިޔަ ސަރުކާރުގައި ފެށި ގެދޮރުވެރިޔާ ސްކީމްގެ 4،000 ފްލެޓަށް މި ސަރުކާރުން މިހާރު ކަނޑައަޅާފައިވާ މަހު ކުލިން 500-1،000ރ. ކުޑަކޮށް، ޑައުންޕޭމަންޓަށް ލުޔެއް ދިނުމަށް ނިންމާފައިވާކަން ރައީސް މުހައްމަދު މުއިއްޒު މިރޭ ހާމަކުރައްވައިފި އެވެ.
ވީ ކިހިނެއް؟ - އެމަނިކުފާނު މިގޮތަށް ވިދާޅުވީ، މާލޭގެ އަވަށްތަކުގެ ރައްޔިތުންނާ އެކު ބާއްވާ ސިލްސިލާ ބައްދަލުވުމުގެ ތެރެއިން މިރޭ ހުޅުމާލެ ދެވަނަ ފިޔަވަހީގައި ބޭއްވި ބައްދަލުވުމުގަ އެވެ. އެ ބައްދަލުވުމުގައި ބައެއް އާންމުން ވަނީ ގެދޮރުވެރިޔާ ފްލެޓްގެ ކުއްޔާއި ޑައުންޕޭމަންޓަށް ކަނޑައަޅާފައިވަނީ މާ ބޮޑު އަގެއް ކަމަށް ބުނެ ޝަކުވާ ކޮށްފަ އެވެ. ބައެއް މީހުން އެދުނީ، ހިޔާ ފްލެޓްގެ ކުއްޔާ އެއްވަރުގެ އަދަދެއް ހަމަޖެއްސުމަށެވެ.
President Dr @MMuizzu meets with residents of Hulhumalé Phase II to listen to their concerns and views. The meeting reaffirms the Administration’s commitment to inclusive governance and staying closely connected with the people.#RayyithunGaathah #HulhumaléPhase2Visit pic.twitter.com/je9ajbbjmx
— The President's Office (@presidencymv) December 18, 2025
ތަފްސީލު - މީގެ ކުރިން އޮތް އަވަށު ބައްދަލުވުމެއްގައި ވެސް މި ފްލެޓްތަކުގެ ޑައުންޕޭމަންޓަށް ލުޔެއް ދެއްވާނެ ކަމަށް ރައީސް މުއިއްޒު ވަނީ ވިދާޅުވެފަ އެވެ. ނަމަވެސް އޭގެ މާ ބޮޑު ތަފްސީލެއް އެމަނިކުފާނު އޭރު ހާމައެއް ނުކުރައްވަ އެވެ.
މިރޭގެ ބައްދަލުވުމުގައި އާންމުން ވެސް އެ އަގުތަކާ ގުޅިގެން ޝަކުވާކުރި ފަހުން، ބައްދަލުވުމުގައި ދެއްކެވި ވާހަކައިގައި ރައީސް ވަނީ ސަރުކާރުން މިކަމަށް ދޭނެ ލުއިތަކާ ގުޅޭ ގޮތުން ވާހަކަ ދައްކަވައިފަ އެވެ. އެގޮތުން ރައީސް ވިދާޅުވީ:
-
3 ކޮޓަރި ފްލެޓްތަކަށް މެއިންޓެނެންސް ފީއާ އެކު ޖުމްލަ މަހު ކުއްޔަށް މިހާރު ކަނޑައަޅާފައިވާ 10،500ރ.ގެ ބަދަލުގައި 10،000ރ.އަށް ކުލި ކުޑަކުރުމަށް
-
3 ކޮޓަރީގެ ފްލެޓްގެ ޑައުންޕޭމަންޓަށް މިހާރު ކަނޑައަޅާފައިވާ 25،000ރ.ގެ ބަދަލުގައި 8،000ރ.އަށް ކުޑަކުރުމަށް
-
2 ކޮޓަރީގެ ފްލެޓްތަކަށް މެއިންޓެނަންސް ފީއާ އެކު ޖުމްލަ މަހު ކުއްޔަށް މިހާރު ކަނޑައަޅާފައިވާ 7،000ރ. ގެ ބަދަލުގައި 6،000ރ.އަށް ކުލި ކުޑަކުރުމަށް އަދި ޑައުންޕޭމަންޓަށް އެއް މަހުގެ ކުލި ނަގާ ގޮތަށް
"އެހެންވީމާ އެފްޑީސީއިން [ފަހި ދިރިއުޅުން ކޯޕަރޭޝަނުން] އެގްރިމަންޓްތައް އާކޮށް، ރިވައިސް ކުރާނެ،" ރައީސް ވިދާޅުވި އެވެ.
ގުޅުން ހުރި ބައެއް ލިޔުންތައް
ފާހަގަކޮށްލެވޭ ކަމެއް - މިދިޔަ ސަރުކާރުގެ ފަހު ހަފްތާގައި 15 ނޮވެމްބަރު 2023ގައި އޭރު މި ފްލެޓްތަކުގެ އަގު ކަނޑައަޅާ އާންމުކުރި އެވެ. އެގޮތުން:
-
3 ކޮޓަރީގެ ފުލެޓްގެ މަހު ކުއްޔަކީ 7،000ރ، އަދި މެއިންޓެނަންސް ފީގެ ގޮތުގައި މަހަކު 1،000ރ.އާ އެކު ކުއްޔަށް ޖުމްލަ 8،000ރ.
-
2 ކޮޓަރީގެ މަހު ކުއްޔަށް 5،000ރ. އަދި މެއިންޓެނަންސް ފީގެ ގޮތުގައި މަހަކު 1،000ރ.އާ އެކު ޖުމްލަ 6،000ރ.
ނަމަވެސް ފަހުން މިދިޔަ ފެބްރުއަރީ މަހު ހައުސިން މިނިސްޓަރު ޑރ. އަބްދުﷲ މުއްތޮލިބު ވަނީ ފްލެޓުތަކުގެ ކުލީގެ ގޮތުގައި ނަގަން އޭރު ނިންމި އަދަދަށް ބަދަލު ގެނެސްފައިވާކަމަށް ވިދާޅުވެފަ އެވެ. މިނިސްޓަރު ވިދާޅުވީ ލޯނެއް ނަގައިގެން ހިންގާ މަޝްރޫއަކަށް ވާއިރު، އެ މަޝްރޫއުގެ ދަށުން ނަގާ ކުލި ކަނޑައަޅާ މީގެ ކުރިން އިއުލާނުކޮށްފައި ހުރި އަގުތަކަކީ ރަނގަޅު އަގުތަކެއް ނޫން ކަމަށެވެ.