ޑޮލަރު މާރުކޮށް ލިބުނު ކަމަށް ބުނާ ރުފިޔާ އެފްއޭއެމްގެ އެކައުންޓަށް ނުވަންނަކަން ބައްސާމް އެންގެވި: ޖަވާޒު

އެފްއޭއެމުން އަމިން ކޮންސްޓްރަކްޝަނަށް ޑޮލަރު މާރުކުރަން ވެގެން ކަމަށް ބުނެ 1 މިލިއަން ޑޮލަރުގެ ޗެކެއް މެދުވެރިކޮށް ދޫކުރުމަށް ފަހު އޭގެ ބަދަލުގައި ގަނޑުކޮށް ދިވެހި ރުފިޔާ ލިބުނު ނަމަވެސް އެކައުންޓަށް ޖަމާނުކުރާ ކަމަށް ފިނޭންސް ޑިޕާޓްމަންޓުންނާއި އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އެންގެވި ކަމަށް އެފްއޭއެމްގެ ކުރީގެ ސެކްރެޓަރީ ޖެނެރަލް ހުސައިން ޖަވާޒު މިއަދު ވިދާޅުވެއްޖެ އެވެ.

ވީކިހިނެއް؟ - ޖަވާޒު މިހެން ވިދާޅުވީ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އަމިން އެވެނިއުގެ ދެ ޕެންޓްހައުސެއް ގަންނަން އެފްއޭއެމުން އަމިން ކޮންސްޓްރަކްޝަނަށް 1 މިލިއަން ޑޮލަރު ދިން ކަމަށް ބުނާ މައްސަލައިގެ ޝަރީއަތުގެ މަޖިލީހުގައި މިއަދު ހެކިބަސް ދެއްވަމުންނެވެ.

މި މައްސަލާގައި ދައުވާކޮށްފައިވަނީ:

ހެކިބަސް ދެއްވުމަށް ޖަވާޒު މިއަދު ކްރިމިނަލް ކޯޓަށް ހާޒިރުކުރީ، އަގީލް ފިޔަވައި ދެން ދައުވާކޮށްފައިވާ ފަރާތްތަކުގެ ބަޔަށް ދައުލަތުން ހުށަހެޅި ހެކިވެރިއެއް ގޮތުގަ އެވެ.

ތަފްސީލް - ދައުލަތުން ކުރި ސުވާލުތަކަށް ޖަވާބު ދެއްވަމުން ޖަވާޒު ވިދާޅުވީ އެއް މިލިއަނެއްހާ ޑޮލަރުގެ ފައިސާއެއް ލިބުނުކަން ހަނދާނުގައި ހުންނެވީ ކްލަބްތަކަށް މާލީ އެހީ ދިނުމަށް ފީފާއިން 'ކޮވިޑް ރިލީފް ލޯނެއް' ގޮތުގައި ދޫކުރި 1 މިލިއަން ޑޮލަރު ކަމަށެވެ.

އެ ފައިސާ ކްލަބްތަކަށް ދޫކޮށްފައިވާ ކަމަށް ބައްސާމް ވިދާޅުވި ކަމަށް ޖަވާޒު ވިދާޅުވި އެވެ.

އަމިން ކޮންސްޓްރަކްޝަނަށް 1 މިލިއަން ޑޮލަރު ދޫކުރި ޗެކުގައި ޖަވާޒު ސޮއިކުރެއްވި އެވެ. އެއީ ޑޮލަރު މާރުކުރުމުގެ މުއާމަލާތަކަށް ވާތީވެ އެ ފައިސާއާ ގުޅޭ ގޮތުން ބައްސާމާއި އަގީލް ގާތުގައި ސުވާލުކޮށްގެން ސާފުކުރި ކަމަށް ޖަވާޒު ވިދާޅުވި އެވެ.

"ބައްސާމާއި އަގީލާ ވެސް އަޅުގަނޑު ސުވާލުކުރިން. ބައްސާމް ވެސް އަގީލް ވެސް ވިދާޅުވި ކޭޝްކޮށް ލިބުނު ކަމަށް. އެ ފައިސާ ދިވެހި ރުފިޔާ، އެފްއޭއެމްގެ އެކައުންޓަށް ޖަމާކުރިންތޯ އެހުމުން ދެ ބޭފުޅުން ވެސް ވިދާޅުވީ އެކައުންޓަށް ނުވަންނަ ކަމަށް،" ޖަވާޒު ވިދާޅުވި އެވެ.

"އޭގެ ދުވަސްތަކެއް ފަހުން އަޅުގަނޑު އެފްއޭއެމުން އިސްތިއުފާ ދީފިން،" އޭނާ އިތުރަށް ވިދާޅުވި އެވެ.

ޖަވާޒުގެ ހެކިބަހުގައި އިތުރަށް ފާހަގަކުރެއްވި ބައެއް ކަންކަމަކީ:

އެނގުން މުހިންމު - 1 މިލިއަން ޑޮލަރަކީ ކޮވިޑުގައި ކްލަބްތަކަށް ދިމާވީ މާލީ ދަތިކަން ހައްލުކޮށްދޭން ކަމަށް ބުނެ ފީފާ އަތުން އެފްއޭއެމުން ނެގި 1.9 މިލިއަން ޑޮލަރުގެ ކޮވިޑް ރިލީފް ލޯނުގެ ފައިސާ ކަމަށް ދައުލަތުން ތުހުމަތުކުރެ އެވެ.