މީޑިއާ ކޮންޓްރޯލު ގާނޫނާ އެކު ސަރުކާރު ޖަވާބުދާރީ ކުރުވުން ހުއްޓިދާނެތީ ކަންބޮޑުވެއްޖެ

މީޑިއާތައް ކޮންޓްރޯލު ކުރާ ގާނޫނާ އެކު ސަރުކާރުގެ ޖަވާބުދާރީކުރުވުމާއި ކޮރަޕްޝަން ފަދަ އާންމު މަސްލަހަތު ހިމެނޭ މައްސަލަތަކާ ގުޅޭ ރިޕޯޓުކުރުންތައް ހުއްޓިދާނެތީ ސައުތު އޭޝިއަންސް ފޯ ހިއުމަން ރައިޓްސް (އެސްއޭއެޗްއާރު)ން ކަންބޮޑުވުން ފާޅުކޮށްފި އެވެ.

ވީ ކިހިނެއް؟ - ރާއްޖޭގައި މީޑިއާތައް ސަރުކާރަށް ކޮންޓްރޯލު ކުރެވޭ ގޮތަށް އެކުލަވާލި ގާނޫނު ތަސްދީގުކޮށް އަމަލު ކުރަން ފެށުމާ އެކު ދެކުނު އޭޝިއާ ސަރަހައްދުގެ އިންސާނީ ހައްގުތަކަށް ވަކާލާތު ކުރާ ޖަމިއްޔާ އިން ވަނީ ކަންބޮޑުވުން ފާޅުކޮށް ބަޔާނެއް މިއަދު ނެރެފަ އެވެ.

ތަފްސީލް - އެސްއޭއެޗްއާރުން ނެރުނު ބަޔާނުގައި ރައްޔިތުންގެ މަޖިލީހުން އެ ބިލު ފާސް ކުރުމުގައި އަމަލު ކުރި ގޮތާ މެދު ވެސް ވަނީ ކަންބޮޑުވުން ފާޅުކޮށްފަ އެވެ.

ރާއްޖޭގެ ނޫސްވެރިންނާއި ކަމާ ގުޅުންހުރި ފަރާތްތަކުން އަދި ބޭރުގެ ޖަމިއްޔާތަކުން ވެސް ކަންބޮޑުވުން ފާޅުކުރަމުން ދަނިކޮށް ފާސްކޮށް، މިހާރު އަމަލު ކުރަން ފަށާފައިވާ ގާނޫނަކީ ހިޔާލު ފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމަށް ބޮޑު ހުރަހެއް ކަމަށް އެސްއޭއެޗްއާރުން ބުންޏެވެ.

އެންމެ ބޮޑަށް ކަންބޮޑު ވަނީ އާ ގާނޫނު ބޭނުންކޮށްގެން ސިޔާސީ ހިޔާލު ތަފާތުވުންތައް މަނާކޮށް، ސަރުކާރުގެ ޖަވާބުދާރީކުރުވުމާއި ކޮރަޕްޝަނުގެ މައްސަލަތަކާ ގުޅޭ ރިޕޯޓުކުރުން ހުއްޓުވުމަކަށް އައިސްދާނެތީ ކަމަށް އެސްއޭއެޗްއާރުން ބުންޏެވެ.

އެ ޖަމިއްޔާ އިން ވަނީ، ގާނޫނާ މެދު އަލުން ވިސްނައި ގާނޫނުއަސާސީގައި ކަށަވަރުކޮށްދީފައިވާ ހިޔާލު ފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަން ރައްކާތެރިކުރެވޭނެ ގޮތަށް ގާނޫނަށް އިސްލާހު ގެނައުމަށް ސަރުކާރަށް ގޮވާލައިފަ އެވެ.

ފާހަގަ ކުރެވޭ - މީޑިއާ ކޮންޓްރޯލު ގާނޫނު ތަސްދީގު ކުރުމާ އެކު، ރައްޔިތުންގެ މަދަނީ ހައްގުތަކުގެ ދިފާއުގައި މަދަނީ ބަސްނޭހުމަކަށް ގޮސް، 'ފުލުސްޓޮޕް މޫވްމަންޓް'ގެ ނަމުގައި ނޫސްވެރިން ވަނީ ހަރަކާތެއް ފަށައިފަ އެވެ.