އޭސީސީން ބުނީ މިދިޔަ އަހަރުން ފެށިގެން ޝުޖާއުގެ މައްސަލަ އިސް ނަގައިގެން ބަލަމުންދާ ކަމަށް

ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއުގެ ހިއްސާ އޮންނަ ކުންފުނިތަކަކަށް ނާޖާއިޒު ފައިދާ ލިބޭ ގޮތަށް ހިންގާފައިވާ ކަމަށް ތުހުމަތުކުރާ މުއާމަލާތްތަކުގެ މައްސަލަ މިދިޔަ އަހަރުން ފެށިގެން ބަލަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ)ން މިއަދު ބުނެފި އެވެ. 

ވީކިހިނެއް؟ - މި ސަރުކާރު ހިންގާ ޕީއެންސީގެ ނައިބު ރައީސް އަދި އެ ޕާޓީގެ ޕާލިމެންޓްރީ ގްރޫޕުގެ ސީނިއާ ޑެޕިއުޓީ ލީޑަރުކަން ވެސް ކުރައްވާ ޝުޖާއުގެ ކުންފުނިތަކަކަށް ނަހަމަ ފައިދާތަކެއް ހޯދާފައިވާކަން ފާހަގަކޮށް، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓު (އެފްއައިޔޫ)ން ވަނީ ރިޕޯޓެއް ތައްޔާރުކޮށްފަ އެވެ.

މިދިޔަ އަހަރު ތައްޔާރުކުރި އެ ރިޕޯޓް މި ފަހުން ލީކުކޮށްލީ ކާކުކަން ނޭނގޭ ގޮތަށް އެކްސްގައި ހިންގާ 'ހަސަން ކުރުސީ' އެކައުންޓުންނެވެ.

ބުނީ ކީކޭ؟ - އޭސީސީގެ އޮފިޝަލަކު 'ދައުރު'އަށް ވިދާޅުވީ އެ ކޮމިޝަނުގެ ސަމާލުކަމަށް ރިޕޯޓް ލިބުނު އިރުން ފެށިގެން، ކޮމިޝަނުގެ އަމިއްލަ އިސް ނެގުމުގެ މަތިން މައްސަލަ ބަލަމުންދާ ކަމަށެވެ.

"މިދިޔަ އަހަރުގެ ފަޅުކޮޅުން ފެށިގެން އެ މައްސަލަ ކޮމިޝަނުން އިސް ނަގައިގެން އަންނަނީ ތަހުގީގު ކުރަމުން،" އިތުރު އެއްވެސް ތަފުސީލެއް ނުދެއްވައި އޭސީސީގެ އޮފިޝަލް ވިދާޅުވި އެވެ.

ތަފްސީލް - ސޯޝަލް މީޑިއާގައި އާންމުވެފައިވާ އެފްޔޫއައިގެ ރިޕޯޓާ ގުޅޭ މައްސަލަ ބަލަމުން އަންނަކަން ފުލުހުން ބުނެފައިވާއިރު، ޝުޖާއު ވަނީ އެ ރިޕޯޓުގެ ސައްހަކަމާ މެދު ސުވާލު އުފައްދަވައިފަ އެވެ. ނަމަވެސް އެ ރިޕޯޓާ ގުޅޭ މައްސަލަ ބަލަމުން އަންނަކަން ފުލުހުން ވަނީ ޔަގީންކޮށްދީފަ އެވެ.

ރިޕޯޓް ތައްޔާރުކޮށްފައިވަނީ ޝުޖާއުގެ އިތުރުން އޭނާއާ އާއިލީ ގުޅުން އޮންނަ، ފިޝަރީޒް މިނިސްޓްރީގެ ޑެޕިއުޓީ މިނިސްޓަރު މުހައްމަދު ނާފިޒްގެ އިތުރުން އޮފިޝަލް އިވެންޓްގެ އެއް ހިއްސާދާރު އަދި ޕީއެސްއެމްގެ ބޯޑު މެމްބަރު، އަހްމަދު އަދުހަމްއާ ބެހޭ ގޮތުންނެވެ. އެ ތަހުގީގު ކުރިއަށްގެންގޮސްފައިވަނީ އެ ތިން މީހުންނާއި އިތުރު މީހުންގެ ހިއްސާ އޮންނަ  ކުންފުނިތަކަކުން ކޮށްފައިވާ މުއާމަލާތްތަކަކާ ގުޅިގެންނެވެ.

އޭގެ ތެެރޭގައި ހިމެނެނީ:

އާންމުވެފައިވާ ރިޕޯޓުގައި އެމްއެމްއޭގެ އެފްއައިޔޫއަށް ފާހަގަވި ބައެއް މުއާމަލާތްތަކަކީ:

ގުޅުންހުރި ކަމެއް - އެ ރިޕޯޓު އާންމުވެފައިވަނިކޮށް އެމްއެމްއޭގެ އެފްއައިޔޫގެ ވެރިޔާ އަބްދުﷲ އަޝްރަފް އެ މަގާމުން ވަކިކޮށް، އެހެން ޑިޕާޓްމަންޓަކަށް ވަނީ ބަދަލުކޮށްފަ އެވެ.