ކައުންސިލް އިންތިހާބަށް ނަޝީދާއި ފައްޔާޒު އެކުގައި ނުކުމެއްޖެ

އަންނަ އަހަރު ބާއްވާ ކައުންސިލް އިންތިހާބުގެ ކެމްޕެއިނަށް ކުރީގެ ރައީސް މުހައްމަދު ނަޝީދާއި އެމްޑީޕީގެ ޗެއާޕާސަން ފައްޔާޒު އިސްމާއިލް އެކުގައި ނުކުމެވަޑައިގެންފި އެވެ.

ވީ ކިހިނެއް؟ - މިދިޔަ މަސް ތެރޭ އަލުން އެމްޑީޕީއާ ގުޅިވަޑައިގެންނެވި ނަޝީދު އާއި ފައްޔާޒު އެކުގައި ކެމްޕެއިނަށް ނުކުމެވަޑައިގެންފައިވަނީ އެ ޕާޓީ ތެރޭގައި އެކިއެކި ފެކްޝަން އުފެދިފައިވާ ދަނޑިވަޅެއްގަ އެވެ. 

ކައުންސިލް އިންތިހާބަށް ނަޝީދާއި ފައްޔާޒު ވަކިން ޓީމެއްގެ ގޮތުގައި ރޭ ފުރަތަމަ ހަރަކާތް ވަނީ ބާއްވާފަ އެވެ. މި ހަރަކާތުގައި ކުރީގެ ރައީސް އިބްރާހިމް މުހައްމަދު ސޯލިހަށް ތާއީދު ކުރައްވާ އެ ޕާޓީގެ ބޭފުޅުން ބައިވެރިވެފައެއް ނުވެ އެވެ.

ތަފްސީލު - މާލޭގައި ހުންނަ އޯޓީޕީ ރެސްޓޯރެންޓުގައި ބޭއްވި އެ ބައްދަލުވުމުގައި ބައިވެރިވި މީހަކު 'ދައުރު'އަށް ކިޔައިދިން ގޮތުގައި:

"ގައުމާއި ޕާޓީ އާއި އަޅުގަނޑުމެންގެ މުޖްތަމައު ހޯދުމަށް، އެންމެން އެކުގައި އެކައްޗެއް ކިޔައިގެން ކުރިއަށް ގޮސްގެން ނޫނީ ވާކަށް ނެތް،" ސޯޝަލް މީޑިއާގައި ހިއްސާކޮށްފައިވާ ރޭގެ ބައްދަލުވުމުގެ ކުޑަ ވީޑީއޯ ކޮޅުގައި ފައްޔާޒު ވިދާޅުވާ އަޑު އިވެ އެވެ.

އެ ވީޑިއޯ ހިއްސާކުރަމުން އެމްޑީޕީގެ ކުރީގެ ޗެއާޕާސަން އަދި ނަޝީދު އުފެއްދެވި ޑިމޮކްރެޓްސްގެ ރައީސްކަން ކުރެއްވި ހަސަން ލަތީފް އެކްސްގައި ކުރެއްވި ޕޯސްޓެއްގައި ވިދާޅުވީ، އެހެން ސިޔާސީ ޕާޓީތަކާ ހިލާފަށް އެމްޑީޕީން އިންތިހާބު ކާމިޔާބު ކުރާނީ ރައްޔިތުންނަށް ފައިދާ ކުރާނެ ސިޔާސަތުތަކާއި އަޑާއި ކުލަ އާއި ޖޯޝުން ފުރިފައިވާ އަދި ހިސާބު ޖަހާފައިވާ ކެމްޕެއިންތަކަކުން ކަމަށެވެ. އަދި އެއީ ނަޝީދު ވެސް ވިދާޅުވާ ގޮތް ކަމަށް އޭނާ ފާހަގަ ކުރެއްވި އެވެ.

"އަޅުގަނޑަށް ފެނުނީ ޗެއާޕާސަން ފައްޔާޒު ހުންގާނުގައި ހުންނަވައިގެން އެ މަސައްކަތް ވަރަށް ރަނގަޅަށް ފައްޓަވާފައިވާ މަންޒަރު،" މިދިޔަ މަޖިލީހުގައި ހެންވޭރު ހުޅަނގު ދާއިރާގެ މެންބަރުކަން ކުރެއްވި ހަސަން ލަތީފް ވިދާޅުވި އެވެ.

ގުޅުން ހުރި - މިދިޔަ މަހު 23ގައި ނަޝިދު އެމްޑީޕީއާ ގުޅިވަޑައިގަތުމަށް ބޭއްވި ޖަލްސާގައި އެ މަނިކުފާނު ވިދާޅުވި ގޮތުގައި، ސަރުކާރަށް ކައުންސިލް އިންތިހާބުގައި ނެގޭނީ %20 އެވެ.