ވީއައިއޭއިން ވަގަށް ސިނގިރޭޓު ބޭރުކުރުން: ކޯޓުން 2 މީހުން ދޫކޮށްލައިފި

ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ ޑިޕާޗާ ހޯލުން ގިނަ އަދަދެއް ސިނގިރޭޓު ކާޓޫންތަކެއް ވަގަށް ނެރެން އުޅުނު މައްސަލައިގައި ދެ މީހަކު ރޭ ހައްޔަރު ކުރި ކަމަށާއި ނަމަވެސް އެ ދެ މީހުން ވެސް ކޯޓުން މިއަދު ދޫކޮށްލާފައިވާ ކަމަށް ފުލުހުން ބުނެފި އެވެ.

ވީ ކިހިނެއް؟ - ޑިޕާޗާ ހޯލުން ޑަސްޕިން ކޮތަޅުތަކަށް އަޅައިގެން ވަގަށް ސިނގިރޭޓު ކާޓޫންތަކެއް ނެރެން އުޅުނު މައްސަލައެއް ތަހުގީގު ކުރަން ފަށާފައިވާ ކަމަށް ރޭ ކަސްޓަމްސްއިން ވަނީ ބުނެފަ އެވެ. އަދި މި މައްސަލަ ކަސްޓަމްސްގެ ފަރާތުން އިއްޔެ އިރުއޮއްސި 6:20 ހާއިރު ފުލުހުންނަށް ވެސް ހުށަހަޅާފައިވެ އެވެ.

ތަފްސީލު - ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ މި މައްސަލައިގައި ކޯޓު އަމުރެއްގެ ދަށުން ދެ މީހަކު ރޭ ހައްޔަރު ކުރި ކަމަށެވެ. އެއީ:

މި ދެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރީ މިއަދެވެ. ފުލުހުން ބުނި ގޮތުގައި، އެ ދެ މީހުން ވެސް ކޯޓުން ދޫކޮށްލީ ޝަރުތުތަތަކާ އެކު އެވެ.

"މި މައްސަލަ ފުލުހުން ދަނީ ތަހުގީގު ކުރަމުން،" އިތުރު ތަފްސީލެއް ނުދީ ފުލުހުން ބުންޏެވެ.

މި މައްސަލައިގައި ތުހުމަތުވާ އެކަކީ ފުލުހުންގެ އޮފިސަރެއް ކަމަށް ބައެއް މީޑިއާތަކުން ރިޕޯޓުކޮށްފައިވެ އެވެ. އެ ވާހަތަކާ ގުޅިގެން ފުލުހުން ވެސް އަދި ކަސްޓަމްސްއިން ވެސް އަދި އެއްޗެއް ބުނެފައެއް ނުވެ އެވެ.