ފައިސަލް ވަކިކުރަން ޖެހޭ ސަބަބެއް ނެތް؛ ގުޅުން ރަނގަޅު ނަމަ މިކަމެއް ނުކުރާނެ: އަބްދުއްރަހީމް

ޓޫރިޒަމް މިނިސްޓަރުކަމުން އިބްރާހިމް ފައިސަލް ވަކިކުރަން ޖެހޭ އެއްވެސް ސަބަބެއް ނެތް ކަމަށާއި ރައީސް މުހައްމަދު މުއިއްޒުއާ ގުޅުން ރަނގަޅު ނަމަ އެފަދަ ފިޔަވަޅެއް ރައީސް ނާޅުއްވާނޭ ކަމަށް ފައިސަލްގެ ބައްޕަ އަދި ރައްޔިތުން މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ. 

ތަފްސީލް - ފައިސަލް ޓޫރިޒަމް މިނިސްޓަރުކަމުން ވަކިކުރެެއްވުމާ ގުޅިގެން 'ދައުރު'އިން މިއަދު ކުރި ސުވާލުތަކަކާ ގުޅިގެން މެލޭޝިޔާގައި ހުންނަވައި ފޯނުން ދެއްވި އިންޓަވިއުގައި އަބްދުއްރަހީމް ވިދާޅުވީ ފައިސަލް ވަޒީރު ކަމުގައި މިވީ ދުވަސްތަކުގައި ހިޔާނާތުގެ އެއްވެސް ކަމެއް އޭނާ ހިންގަވާފައި ނުވާ ކަމަށެވެ. އަދި ފައިސަލް ހާސިލްކުރަން ރައީސް ކަނޑައެޅުއްވި ލަނޑުދަނޑިތައް ވެސް ހާސިލްކުރައްވާފައިވާ ކަމަށް ވެސް އަބްދުއްރަހީމް ވިދާޅުވި އެވެ. 

ރައީސް މުއިއްޒުއާ ދެކޮޅަށް ފައިސަލް އެއްވެސް ކަމެއް ނުކުރައްވާނޭ ކަމުގެ ފުރިހަމަ ޔަގީންކަން އޮތް ކަމަށް ވެސް އަބްދުއްރަހީމް ވިދާޅުވި އެވެ. 

"މިއީ ފައިސަލްގެ ވެސް ވަރަށް ބުރަ މަސައްކަތާއި ވަރަށް ބޮޑު ބައިވެރިވުމަކާ އެކު ގެނައި ވެރިކަމެއް މިއީ. އަނެއްކާ އޭނާއާ ގުޅޭ ގޮތުން މަގާމުގެ މަސްއޫލިއްޔަތު އަދާކުރުމުގައި އެއްވެސް [ގޯސް] ކަމެއް ފާހަގަވެފައެއް ނެތް. އެހެން ވީމާ ފައިސަލް ވަކިކުރަން ޖެހޭ އެއްވެސް ސަބަބެއް އޮތް ކަމަށް އަޅުގަނޑު ގަބޫލެއް ނުކުރަން،" އަބްދުއްރަހީމް ވިދާޅުވި އެވެ. 

ފައިސަލް ވަކިކުރުމަކީ "ވަރަށް ދެރަވަރުކޮށް" ކުރެއްވި ކަމެއްކަން ފާހަގަ ކުރައްވައި އަބްދުއްރަހީމް ވިދާޅުވީ އޭނާގެ ފަރާތުން ވެސް އަދި ފައިސަލްގެ ފަރާތުން ވެސް މި ސަރުކާރަށް އަދި ރައީސްއަށް ވެސް ދެރަވާނޭ އެއްވެސް ކަމެއް ކޮށްފައެއް ނުވާނެ ކަމަށެވެ. އަދި ރައީސް ވިދާޅުވެ ކޮންމެ ކަމެއް ހަމަ އެގޮތަށް ކުރައްވަމުން ގެންދެވި ކަމަށް ވެސް އަބްދުއްރަހީމް ފާހަގަކުރެއްވި އެވެ. 

"ވަރަށް ދެރަވަރުކޮށް މި ދިޔައީ. މިކަން މިގޮތަށް ބަދަލުވާން ޖެހޭ ސަބަބެއް ނޭނގޭ. އަޅުގަނޑުގެ ފަރާތަކުން ހަމަ ގައިމު ވެސް ނޯންނާނެ ރައީސުލްޖުމްހޫރިއްޔާއަށް ސަރުކާރަށް ދެރަވާނޭ، އަބުރަށް ހުތުރުވާނެ މިކަހަލަ އެއްވެސް ކަމެއް ހިނގާފައެއް ނޯންނާނެ. [ރައީސް] އެދިވަޑައިގެންނެވި ހުރިހާ ކަމެއް އެދިވަޑައިގެންނެވި ގޮތަކަށް އަޅުގަނޑު ވެސް ފައިސަލް ވެސް ކުރަމުން މި ދަނީ،" އަބްދުއްރަހީމް ވިދާޅުވި އެވެ. 

ފައިސަލް ސަރުކާރާ އެކު ހުންނަވާނެތޯ ސުވާލުކުރުމުން އަބްދުއްރަހީމް ވިދާޅުވީ ސަރުކާރުގެ ވަޒީރުކަމުގައި ހުއްޓާ ކުއްލިއަކަށް އެގޮތަށް ވަކިކުރުމުން، "ފައިސަލްއެއް ދެން ސަރުކާރާ އެކު ނުހުންނަވާނޭ ނޫންތޯ" އެވެ. އަބްދުއްރަހީމް ވިދާޅުވި ގޮތުގައި ފައިސަލް ވަޒީރުކަމުން ވަކިކުރެއްވިކަން އަންގައި ރައީސް އޮފީހުން ސިޓީ ފޮނުވީ މިއަދު އޮފީހަށް ފައިސަލް ވަޑައިގަތް ފަހުންނެވެ. 

"އަޅުގަނޑަކަށް ވެސް މިވީ ގޮތެއް އެއްގޮތަކަށް ވެސް ނޭނގޭ. ފައިސަލް ގުޅުއްވާފައި ވިދާޅުވި ވަކިކުރައްވައިފިޔޭ ތިމަންނާ އޮފީހަށް އައިތަނުން،" ފައިސަލްއަށް ސަރުކާރުގެ އިތުރު މަގާމެއް ރައީސް ހުށަހެޅުއްވި ކަމަށް ދެކެވޭ ވާހަކަތައް ދޮގު ކުރައްވައި އަބްދުއްރަހީމް ވިދާޅުވި އެވެ.

ފައިސަލް ވަކިކުރި ސީދާ ސަބަބެއް އެނގިވަޑައި ނުގަންނަވާކަން ފާހަގަކުރައްވައި އަބްދުއްރަހީމް ވިދާޅުވީ އޭގެ އެއް ސަބަބަކީ ސަރުކާރުގެ ތެރޭގައި ތިއްބެވި ބައެއް ބޭފުޅުން ރައީސް އަރިހު ފައިސަލްއާ މެދު ކުރައްވާ ޝަކުވާތަކަށް ވެދާނެ ކަމަށެވެ. ނަމަވެސް، އޭގެ އެއްވެސް ޝަކުވާއެއްގައި ހަގީގަތެއް ނެތް ކަމަށް އަބްދުއްރަހީމް ވިދާޅުވި އެވެ. 

އޭގެ ތަފްސީލަކަށް އޭނާ ވަޑައެއް ނުގެންނެވި އެވެ. 

ރައީސް މުއިއްޒާއި އަބްދުއްރަހީމްގެ ގުޅުމާ މެދު ސުވާލުކުރުމުން އޭނާ ވިދާޅުވީ، "އަޅުގަނޑާ ރައީސްއާ ދޭތެރޭ ގުޅުން ރަނގަޅު ނަަމަ މިކަން ނުހިނގާނެ" ކަމަށެވެ.

"މި ވެރިކަން ފެށުނުއިރު [ރައީސް މުއިއްޒުއާ އެކު] އޮތް ގާތްގުޅުމާއި އިތުބާރު އޮތް ނަމަ މިކަން މިގޮތަކަށް ނުހިނގާނެ،" އަބްދުއްރަހީމް ވިދާޅުވި އެވެ.