ބެސްޓިންއާއެކު ހެދި 6 ބިލިއަންގެ އެގްރިމަންޓްއަކީ ހިޔާނާތެއް؛ މައްސަލަ ބަލާނަން: ނާޒިލް

އެކްސްޕެޓް ސިސްޓަމެއް ހަދަން މެލޭޝިއާގެ ބެސްޓިންއާ އެކު އަލުން މި ސަރުކާރުން ހެދި އެއްބަސްވުމަކީ، ހިޔާނާތެއް ކަމަށް ތުހުމަތުކޮށް އެ މައްސަލަ ބާލަނެ ކަމަށް އެމްޑީޕީގެ ޕާލިމަންޓްރީ ގްރޫޕުގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެ އެވެ.

ވީ ކިހިނެއް؟ - ބެސްޓިންއާއެކު މި ސަރުކާރުން ހެދި އެއްބަސްވުމާ ގުޅޭ ގޮތުން ނާޒިލް ވާހަކަ ދެއްކެވީ، ރޭ އެމްޑީޕީގެ ހަރުގޭގައި ބޭއްވި ޖަލްސާގައި އެމްޑީޕީގެ ސަރުކާރުން ކުންފުނިތަކަށް ބަދަލުގެ ގޮތުގައި ދިން ފައިސާއާ ގުޅިގެން ވާދަވެރިން ކުރާ ތުހުމަތުތަކަށް ރައްދުދެއްވަ އެވެ.

ތަފްސީލު - އިއްޔެ ބޭއްވި މަޖިލީހުގެ ޖަލްސާގައި އެމްޑިޕީގެ ސަރުކާރުން ބައެއް ކުންފުނިތަކަށް ބަދަލު ދިން މައްސަލައިގައި އޭރު ވެރިކަމުގައި ހުންނެވި ރައީސް އިބްރާހިމް މުހައްމަދު ސޯލިހާއި އެ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލް އަދި ރައީސް އޮފީހުގެ މިނިސްޓަރު އަލީ ޝިޔާމްގެ މައްޗަށް ޖިނާއީ ތަހުގީގެއް ހިންގުމަށް އަންގަން ވަނީ ފާސްކޮށްފަ އެވެ.

އެ ފާސް ކުރުމާ ގުޅިގެން ކަންބޮޑުވުން ފާޅުކޮށް، ނާޒިލް ފާހަގަ ކުރެއްވި ގޮތުގައި:

"ރައްޔިތުންނަށް ވަރަށް ސާފުކޮށް އެނގެން އެބަ ޖެހޭ ނިމިދިޔަ ސަރުކާރުން ކޮށްފައި އޮތް އެންމެ، އެންމެ، އެންމެ ކަމެއް އޮތް ނަމަވެސް މި ބޭފުޅުންނަށް ކިހާ ފޯރިއެއް އޮންނާނެތޯ ކިހާ ވަރެއް ވާނެތޯ. ހެދިފައި ހުރި ގާނޫނުތަކާއި ގަވައިދުތަކުގެ ތެރެއިން ސަރުކާރުގެ ފަސް އަހަރު ނިމިދިޔަކަން އަޅުގަނޑުމެންނަށް ޔަގީން ކަށަވަރުވެއްޖެ." ނާޒިލް ވިދާޅުވި އެވެ. 

"މިއީ ރައްޔިތުންގެ މަޖިލީހުގެ މުޅި ހަޔާތުގައިވެސް ވަކި ބައެއްގެ ނަން ތަހުގީގުކުރާށޭ ކިޔާފައި ރިޕޯޓެއްގައި ޖަހައި، މަޖިލީހުގެ ތަޅުމަށް ފޮނުވައި، މިގޮތަށް މަޖިލީހުން ފާސްކުރި ފުރަތަމަ ފަހަރު."

އެއާއެކު ދެން އޭނާ ނެންގެވީ، މި ސަރުކާރުން ބެސްޓިންއާއެކު އަލުން އެއްބަސްވުމަކަށް އައި މައްސަލަ އެވެ. އެ ކުންފުންޏާއެކު އެކްސްޕެޓް ސިސްޓަމް ހަދަން ހަވާލު ކުރި އެއްބަސްވުމަކީ، ދިން ބަދަލެއްގެ ގޮތުގައި ސިފަ ކުރައްވައި، އޭނާ ވިދާޅުވީ، މިދިޔަ 10 އަހަރުވެސް އެވަރުގެ ބަދަލެއް އެއްވެސް ބަޔަކަށް އެއްވެސް ސަރުކާރަކުން ދީފައި ނުވާ ކަމަށެވެ.

"ބަދަލުގެ ގޮތުގައި މެލޭޝިއާގެ ކުންފުންޏަކަށް[ބެސްޓިން] 6.9 ބިލިއަން ރުފިޔާ ދޭން ނިންމައި، އެބަޔަކާއެކު ކޮންޓްރެކްޓް ހެދި، އެ މަސައްކަތް ކުރަމުން އެބަދޭ. ކުރީގައި ދީފައި ހުރި ހުރިހާ ބަދަލެއް އެއްކޮށްލީމައި، އެކި ދުވަސް ވަރު 10 އަހަރު ވަންދެން ދީފައި ހުރި ބަދަލުތަކެއްވިޔަސް، އެ ހުރިހާ އެއްޗެއް އެއްކޮށްލީމަވެސް، މި ބުނާ 6.9 ބިލިއަން ރުފިޔާއާ ހިސާބަށް މިވީ ތަނަށް ނެތް ބަދަލު ދީފައި،" އޭނާ ވިދާޅުވި އެވެ.

އޭގެ އިތުރުން އޭނާ ފާހަގަކުރެއްވި ގޮތުގައި:

"[އެ ކުންފުންޏަށް ދޭން ޖެހޭ ގެއްލުމުގެ ބަދަލު] 15،000 ވަރަކަށް ރުފިޔާއިން ވެސް ނިންމާލެވިދާނެ. އެއީ، އެ ސިޓީ ލިޔުނު މީހާއަށް ދޭން ޖެހޭ ވަރު. އިތުރު އެއްޗެއް ދޭކަށް ނުހޭނެ. މިހާހިސާބެއްގައި އޮތް ބައެއްގެ ވާހަކަ މި ދައްކަނީ. އެއްވެސް ޝަރުއީ މަރުހަލާއެއް ކަނޑައްތު ކުރެމެއް ނެތި، އެބޭފުޅުން އެ އޮތީ އެގޮތަށް ނިންމާފައި،" އޭނާ ވިދާޅުވި އެވެ.

ފާހަގަކޮށްލެވޭ ކަމެއް - ބެސްޓިންއާ އެކު އަލުން އެއްބަސްވުމަކަށް ދިޔައީ ކުރީގެ ރައީސް ޔާމީންގެ ސަރުކާރުގައި 2016 ވަނަ އަހަރުން ފެށިގެން ބޭނުންކުރަމުން ދިޔަ ސިސްޓަމް 2019 ވަނަ އަހަރު ހުއްޓާލުމާ ގުޅިގެން އެ ކުންފުންޏަށް ދޭންޖެހޭ ބަދަލަަށް ލުއި ގޮތެއް ހޯދަން ކަމަށް ހޯމް ލޭންޑް ސެކިޔުރިޓީ މިނިސްޓަރު އަލީ އިހުސާން މީގެ ކުރިން ވިދާޅުވެފައިވެ އެވެ.

ނާޒިލް ވިދާޅުވީ، މި ކަންކަމަކީ އެމްޑިޕީގެ ސަރުކާރެއްގައި ބަލާނެ ކަންކަން ކަމަށެވެ. އަދި މިކަމުގައި ކުށްވެރިވާ މީހާ އާއި މީގެ މަންފާ ލިބުނު މީހެއް ވެސް ހޯދާނެ ކަމަށް އޭނާ ވިދާޅުވި އެވެ.

"ރައްޔިތުންގެ ފައިސާ މިއީ، ޓެކްސް ފައިސާ، ތިބޭފުޅުންގެ ފައިސާ. މި ފައިސާ ނަހަމަ ގޮތުގައި، އެކި ފަރާތްތަކަށް ދެވިގެންދާއިރު، އަޅުގަނޑުމެންނަށް އެނގެން އެބަ ޖެހޭ،" ބަރާބަރަށް ހިނގަ ހިނގާ އޮތް އެކްސްޕެޓް ސިސްޓަމެއް ބާތިލުކޮށްފައި، އަނެއްކާ އާ ބަޔަކާ ހަވާލު ކުރަން ޖެހެނީ ކީއްވެގެންތޯއާ މެދު ސުވާލު އުފައްދަމުން އޭނާ ވިދާޅުވި އެވެ.

"މިހުރީ ރައްޔިތުންގެ ފައިސާއިން ހިޔާނާތްތެރިވާން މި ބޭފުޅުން ފަށާފައި ހުރި ހިސާބު. އެހިސާބުން ފެށިގެން މިދަނީ ކުރިއަށް. އަހަރު ފުރުނުއިރު، ބައިވަރި މިކަހަލަ ކަންކަން އެބަހުރި."

ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި އެމްއެމްޕީއާރުސީގެ ބޮޑު ހިޔާނާތް ވެސް އަގު އުޅެނީ 2.4 ބިލިއަން ރުފިޔާގައި ފާހަގަ ކުރައްވައި އޭނާ ވިދާޅުވި މި ސަރުކާރަށް އަދި އަހަރެއް ނުފެރެނީސް ވެސް 6.9 ބިލިއަން ރުފިޔާއަށް މި ސަރުކާރުން ހިޔާނާތް ވެފައިވާ ކަމަށެވެ.

"2 ބިލިއަން، 6 ބިލިޔަން [ނުވަތަ] 6.9، 2.4. އެންމެ އަހަރެއްގެ ތެރޭގައި މިއީ، ތިބޭފުޅުން ވިސްނާ ފިކުރު ކުރައްވާ. ސެޓެލްމަންޓޭ ކިޔާފައި މި ގެންނަ ބަދަލުތަކަކީ، ބޮޑެތި ބޮޑެތި ޖަރީމާތައް،" އޭނާ ވިދާޅުވި އެވެ.