އެކްސްޕެޓް ސިސްޓަމެއް އަލުން ހަދަން ބެސްޓިންއާ އެކު އެއްބަސްވުމަކަށް ދިޔައީ ބަދަލު ދޭން ޖެހޭތީ: އިހުސާން

އެކްސްޕެޓް ސިސްޓަމެއް ހަދަން މެލޭޝިއާގެ ބެސްޓިން އާ އެކު އަލުން އެއްބަސްވުމަކަށް ދިޔައީ ކުރީގެ ރައީސް ޔާމީންގެ ސަރުކާތުގައި 2016 ވަނަ އަހަރުން ފެށިގެން ބޭނުންކުރަމުން ދިޔަ ސިސްޓަމް 2019 ވަނަ އަހަރު ހުއްޓާލުމާ ގުޅިގެން އެ ކުންފުންޏަށް ދޭންޖެހޭ ބަދަލުގެ ބަދަލުގައި ލުއި ގޮތެއް ހޯދަން ކަމަށް ހޯމް ލޭންޑު ސެކިޔުރިޓީ މިނިސްޓަރު އަލީ އިހުސާން ވިދާޅުވެއްޖެ އެވެ.

ވީ ކިހިނެއް؟ - މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ ބެސްޓިންއާ އެކު 2016 ވަނަ އަހަރު އޭރުގެ ސަރުކާރުން 15 އަހަރަށް ހެދި ސިސްޓަމް ބޭނުން ކުރުން ހުއްޓާލީ 2019 ވަނަ އަހަރު އޮތް ސަރުކާރުން ބަންގްލަދޭޝް މަސައްކަތްތެރިން ރާއްޖެ ގެނައުން ހުއްޓާލަން ނިންމުމުން ކަމަށެވެ.

އެ ސިސްޓަމް އެކުލަވާލީ ބަންގްލަދޭޝް މީހުން ރާއްޖެ އައުމުގެ ކުރިން ހަދަން ޖެހޭ މެޑިކަލްތަކާއި ނަގަން ޖެހޭ ހުއްދަތައް ދޫކުރުމަށް އިހުސާން ވިދާޅުވި އެވެ.

ތަފްސީލް - އޭނާ ވިދާޅުވީ އެކްސްޕެޓް ސިސްޓަމް ބޭނުން ކުރުން ހުއްޓާލުމަށް ފަހު ސަރުކާރުން އެ ކުންފުންޏާ އެއްވެސް މުއާމަލާތެއް ކޮށްފައި ނެތް ކަމަށެވެ. އެހެންކަމުން އެގްރިމެންޓަށް ވާންވީގޮތް ބެސްޓިން އަށް ވެސް އޮތީ ނޭނގިފައި ކަމަށް އޭނާ ވިދާޅުވި އެވެ.

އެކަމަށް އެ ސަރުކާރުން އެއްވެސް އަލިމަގެއް ދައްކާފައި ނުވާ ކަމަށާއި ބެސްޓިން އިން ސިޓީ ފޮނުވި ނަމަވެސް ސަރުކާރުން އެއަށް އެއްވެސް ޖަވާބެއް ދީފައި ނުވާ ކަމަށް އިހުސާނު ވިދާޅުވި އެވެ.

އެ ކުންފުނިން ދެ ގޮތެއް ހުށަހަޅާފައި އޮތް ކަމަށާއި އެގޮތުން އެ ކުންފުންޏަށް ލިބުނު ގެއްލުމުގެ ބަދަލަށް 13.7 މިލިއަން ޑޮލަރު ދައްކައި، އެއްބަސްވުމުގެ ބާކީ އޮތް މުއްދަތަށް ލިބޭ ގެއްލުމަށް ސަރުކާރުން ޒިންމާވާން ހުށަހެޅި ކަމަށް އޭނާ ވިދާޅުވި އެވެ.

"އަނެއް އޮޕްޝަން އަކީ އިތުުރު އެހެން ހިދުމަތްތަކާ އެކު ފޮރިން ޕްލޭސްމެންޓު ސިސްޓަމެއް ރާއްޖޭގައި ގާއިމް ކުރުން. މިހާރުގެ އެކްސްޕެޓް ސިސްޓަމަށް ވުރެ ފުރިހަމަ ސިސްޓަމެއް ގާއިމް ކުރުން،" މިނިސްޓަރު ވިދާޅުވި އެވެ.

އިހުސާން ވިދާޅުވީ ބޮޑު މާލީ ބަދަލެއް ދިނުމުގެ ބަދަލުގައި މިހާރު ގައުމުގެ މާލީހާލަތަށް ރިއާޔަތްކޮށް އާ ސިސްޓަމެއް ގާއިމް ކުރަން އެ ކުންފުންޏާ ހަވާލުކުރަން ނިންމީ ކަމަށެވެ.

އެކަމާ ގުޅޭ އެއްބަސްވުމަކަށް މިދިޔަ މެއި މަހު އާދެވިފައިވާ ކަމަށް އޭނާ ވިދާޅުވި އެވެ.

އިހުސާން ވިދާޅުވީ ރާއްޖެ އަންނަ ބިދޭސިންގެ އަތުން މިހާރު އަހަރަކު 6،200ރ. ނަގާއިރު އޭގެ ތެރޭ ހިމެނެނީ:

ބެސްޓިންއާ އެކު ހެދި އެއްބަސްވުމާ އެކު ބިދޭސީއެއްގެ އަތުން ސަރުކާރަށް ލިބޭ ފީގެ 1،542ރ. އެ ކުުންފުންޏަށް ދައްކަން ޖެހޭނެ އެވެ. އަދި ބާކީވާ 4،658ރ. އަކީ ދައުލަތަށް ވަންނާނެ ރުފިޔާ ކަމަށް އިހުސާން ވިދާޅުވި އެވެ.

ހޯމް މިނިސްޓަރު ވިދާޅުވީ އެ އަދަދު ބެސްޓިން އަށް ދިން ނަމަވެސް އެއިން ގެއްލުމެއް ނުވާނެ ކަމަށެވެ. އެގޮތުން މިހާރު ހުރި ސިސްޓަމާ އެކު އޮފީސް ހިންގުމަށާއި މުވައްޒަފުންނަށް ކުރާ ހަރަދު މާ ބޮޑު ކަމަށް އޭނާ ވިދާޅުވި އެވެ. ނަމަވެސް ބެސްޓިންގެ ސިސްޓަމާ އެކު އެ ހަރަދުތަކާ ހަވާލުވާނީ އެ ކުންފުނިން ކަމަށް ވިދާޅުވި އެވެ.

އިހުސާން ވިދާޅުވީ:

"ކުރިން ދައުލަތުގެ އާމްދަނީގެ ގޮތުގައި ލިބެމުން އައި 685 މިލިއަން ރުފިޔާ. އޭގެ ބަދަލުގައި އަޅުގަނޑުމެންގެ އަންދާޒާ އަކީ ދައުލަތަށް ލިބޭނެޔޭ 927 މިލިއަން ރުފިޔާ." އިހުސާން ވިދާޅުވި އެވެ.