ސަރުކާރުން ދެން އަޅާނެ ފިޔަވަޅަކީ ސުޕްރީމް ކޯޓުގެ ބެންޗު ބަދަލު ކުރުން: ސޯލިހު

މިހާރު އޮތް ޕީއެންސީ ސަރުކާރުން ދެން އަޅާނެ ފިޔަވަޅަކީ ސުޕްރީމް ކޯޓުގެ ބެންޗު ބަދަލުކުރުން ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިރޭ ވިދާޅުވެއްޖެ އެވެ.

ވީ ކިހިނެެއް؟ - އިދިކޮޅު އެމްޑީޕީން މިހާރު ކުރިއަށް ގެންދާ 'ގާނޫނުއަސާސީގެ ދިފާއުގައި' ޖަލްސާގައި ވާހަކަ ދައްކަވަމުން ސޯލިހު ވަނީ، ރައްޔިތުންގެ މަޖިލީހުގެ މެންބަރުންނަށް އަމާޒުކޮށް ސަރުކާރުން ގާނޫނުއަސާސީއަށް ގެނައި ބަދަލަށް ވަރަށް ބޮޑަށް ފާޑުވިދާޅުވެފަ އެވެ.

ބުނީ ކީކޭ؟ - ސޯލިހު ވިދާޅުވީ މަޖިލީހުގެ މެންބަރުން އަމަލު ކުރަންވާނީ ގައުމުގެ މަސްލަހަތާއި ރައްޔިތުންގެ ލާބަޔާއި މަންފާއަށް އިސްކަންދީގެން ކަމަށް ގާނޫނުއަސާސީގައި ބަޔާންކޮށްފައިވާ ކަމަށެވެ. އަދި އެއްވެސް މެންބަރަކު ނުވަތަ އެ މެންބަރެއްގެ ހާއްސަ ގުޅުމެއް އޮންނަ މީހެއްގެ ޒާތީ މަސްލަހަތެއް ކުރިއެރުވުމަށް މަގާމުގެ ބޭނުން ކޮށްގެން ނުވާނެ ކަމަށް ވެސް ބަޔާންކޮށްފައިވާ ކަމަށާއި ނަމަވެސް ގާނޫނުއަސާސީއަށް ގެނައި ބަދަލާއެކު މެންބަރުންނަށް އެގޮތަށް މަސައްކަތް ނުކުރެވޭނެ ކަމަށް އެމަނިކުފާނު ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި މިތަނުން ކޮންމެވެސް އެއް މާއްދާއަކަށް ގާނޫނުއަސާސީގައި އޮވެވޭނީ. ރައްޔިތުންގެ ލާބަޔާއި މަންފާ އާއި ގައުމީ މަސްލަހަތު އިސްކޮށްގެން މަސައްކަތް ކުރާނީތޯ، ނޫނިއްޔާ ޕާޓީން ބުނާ ގޮތަށް މަސައްކަތް ކުރާނީތޯ. ދެ ގޮތުން ކުރެ އެއް ގޮތެއް އަޅުގަނޑުމެން އިހްތިޔާރު ކުރަންޖެހޭ،" ސޯލިހު ވިދާޅުވި އެވެ.

"މި ދެ މާއްދާއަށް އެއް ތަނެއްގައި އޮވެވިދާނެ ކަމަކަށް އަޅުގަނޑަކަށް ގަބޫލެއް ނުކުރެވޭ. އަޅުގަނޑު ހިތުން ސުޕްރީމް ކޯޓުން މިޔާ ދޭތެރޭގައި ރަނގަޅު ނިންމުމެއް، ރައްޔިތުންގެ ބާރުވެރިކަމުގައި އޮންނާނެ ގޮތަކަށް، ސުޕްރީމް ކޯޓުން ނިންމާނެ ކަމަށް އަޅުގަނޑު އުންމީދުކުރަނީ،" ގާނޫނުއަސާސީއަށް ގެނައި އިސްލާހު ބާތިލް ކުރަން ސުޕްރީމް ކޯޓަށް ހުށަހަޅާފައިވާ މައްސަލައަށް އިޝާރާތްކުރައްވައި އެމަނިކުފާނު ވިދާޅުވި އެވެ.

ސޯލިހު ވިދާޅުވީ ސަރުކާރުން ސުޕްރީމް ކޯޓުގެ ބެންޗު ބަދަލުކުރާނެ ކަމަށެވެ.

"ދެން އަޅުގަނޑުމެންނަށް ފެނިގެންދާނެ، މި ސަރުކާރުން ދެން އަޅާނެ ފިޔަވަޅަކީ ސުޕްރީމް ކޯޓުގެ ބެންޗު ބަދަލު ކުރުން. އެކަން ނުކޮށެއް ހުއްޓައެއް ނުލާނެ، ހަގީގަތުގައި މި ސަރުކާރުގެ ސިފަ ފެނިގެންދާނީ އޭރުން،" އެމަނިކުފާނު ވިދާޅުވި އެވެ.

ސޯލިހު ވަނީ މި ސަރުކާރުން މިނިވަން މުއައްސަސާތަކުގެ ބާރު މުށުތެރެއަށް ޖަމާކޮށް ރައްޔިތުންގެ މަޖިލިސް ހިސޯރުކޮށް ބެންކުގެ ތެރެއަށް "އަތްބާނައި" އަދި ކޯޓުތަކުގެ މިނިވަންކަން ނަގާލާފައިވާ ކަމަށް ތުހުމަތު ކުރައްވާފަ އެވެ.

"ދެން އެގޮތަށް، ބޭނުންފުޅުވާ ގޮތަށް، ހުދުމުހުތާރު ވެރިކަމެއް މި ރާއްޖޭގައި ކުރާތަން ތިބޭފުޅުންނަށް ފެނިގެންދާނެ،" އެމަނިކުފާނު ވިދާޅުވި އެވެ.

ސޯލިހު އިތުރަށް ވިދާޅުވީ:

ގުޅުންހުރި - އެމްޑީޕީން މި ޖަލްސާ ފެށުމުގެ ކުރިން ގައުމީ މަޖިލީހުގެ ބައްދަލުވުމެއްގައި ވަނީ މެންބަރުންގެ ގޮނޑި ގެއްލުވާލާ އިސްލާހު ބާތިލް ކުރަން ގޮވާލާ ޕެޓިޝަނެއް ފާސްކޮށް، ޕީއެންސީގެ މެންބަރަކަށް އެފަދަ ހާލަތެއް ކުރިމަތިވެއްޖެ ނަމަ އެ މެންބަަރަކަށް ބައި-އިލެކްޝަންގައި އެމްޑީޕީން ކެމްޕެއިން ކޮށްދިނުމަށް އެއްބަސްވެ ގަރާރެއް ފާސްކޮށްފަ އެވެ.