އެމްޑީޕީން މިރޭ ބޭއްވި ގައުމީ މަޖިލިސް ބައްދަލުވުމުގައި ހުށަހެޅި ގަރާރަށް ވޯޓު ދެނީ (ފޮޓޯ/އެމްޑީޕީ)
މެމްބަރެއްގެ ގޮނޑި ގެއްލުވާލައިފި ނަމަ ކެމްޕެއިންކޮށްދޭނެ ކަމުގެ ޔަގީން ދިނުމަށް އެމްޑީޕީން ފާސްކޮށްފި
ވެރިކަންކުރާ ޕީއެންސީގެ މަޖިލިސް މެންބަރަކު އެ ޕާޓީން ވަކިވުމުގެ ސަބަބުން ނުވަތަ ޕާޓީން ކަނޑާލައިގެން އެ މެންބަރެއްގެ ގޮނޑި ގެއްލުވާލައިފި ނަމަ، ބައި-އިލެކްޝަންގައި އެ ބޭފުޅަކަށް ތާއީދުކޮށް ކެމްޕެއިން ކޮށްދޭން އެމްޑީޕީގެ ގައުމީ މަޖިލީހުން މިރޭ އިގުރާރުވެއްޖެ އެވެ.
ވީ ކިހިނެއް؟ - އެމްޑީޕީން މިގޮތަށް ނިންމީ މިރޭ ކަނިވާ ސަރައްހަދުގައި 'ގާނޫނުއަސާސީގެ ދިފާއުގައި ރައްޔިތުން'ގެ ނަމުގައި އެ ޕާޓީން ބާއްވާ އެއްވުމުގެ ކުރިން އެތަނުގައި ބޭއްވި ގައުމީ މަޖިލީހުގެ ބައްދަލުވުމެއްގައި ހުށަހެޅި ގަރާރަކުންނެވެ. އެ ގަރާރު ހުށަހެޅުއްވީ އެ ޕާޓީގެ ލީގަލް ޑިރެކްޓަރު އަދި ކޮލަމާފުށި ދާއިރާގެ ރައީސް މަހްފޫޒު ސައީދެވެ.
ގަރާރު ފާސްކޮށްފައި ވަނީ ބައްދަލުވުމަށް ހާޒިރުވި 89 މެންބަރުންގެ އިއްތިފާގުންނެވެ.
ތަފްސީލު - ގާނޫނުއަސާސީއަށް މިފަހުން ގެނައި އިސްލާހަކާ އެކު، މަޖިލިސް މެންބަރަކު އޭނާ ނިސްބަތްވާ ޕާޓީން ވަކިވެއްޖެ ނަމަ، ނުވަތަ ޕާޓީން ކަނޑާލައިގެން އެހެން ޕާޓީއަކަށް ސޮއިކޮށްފި ނަމަ، މެންބަރުކަމުގެ މަގާމު ގެއްލޭނެ އެވެ.
އެ އިސްލާހާ ގުޅިގެން ކަންބޮޑޮވުން ފާޅުކޮށް މަހްފޫޒު ހުށަހެޅުއްވި ގަރާރުގައި އޭނާ ވަނީ ގާނޫނުއަސާސީގެ ބައެއް މާއްދާތަކާ ހަވާލާދެއްވައި އެ އިސްލާހު ގާނޫނުއަސާސީއާ ހިލާފުވާ ބައެއް ސަބަބުތައް ބަޔާންކުރައްވާފަ އެވެ. ގަރާރުގައި ބުނެފައިވާ ގޮތުގައި:
-
ދައުލަތުގެ ބާރުތައް ފެށިގެން އަންނަނީ އަދި ދެމިއޮންނާނީ ވެސް ރައްޔިތުންގެ ކިބައިގައި ކަމަށް ގާނޫނުއަސާސީގެ ހަތަރުވަނަ މާއްދާގައި ބަޔާންކޮށްފައިވާއިރު، އިސްލާހާ އެކު، އެ މާއްދާއިން ރައްޔިތުންނަށް ލިބިދީފައިވާ ބާރުވެރިކަން ނިގުޅިގެންދޭ
-
ގާނޫނުއަސާސީގެ 75 ވަނަ މާއްދާގައި ބަޔާންކޮށްފައިވާ މަޖިލީހުގެ މެންބަރުންގެ މަސައްކަތުގެ އަސާސް ބިނާކުރަން ވާނީ މުޅި ރާއްޖޭގެ މަސްލަހަތަށް ކަމަށް ބަލައިގެން ކަމަށް ބުނާ މާއްދާއާ ވެސް އެ އިސްލާހު ހިލާފު
-
މަޖިލީހުގެ މެންބަރަކު މަޖިލީހުގައި ދައްކާ ވާހަކައެއްގެ ސަބަބުން ނުވަތަ އަމަލުކުރާ ގޮތެއްގެ ސަބަބުން އެ މެންބަރެއްގެ މައްޗަށް އެއްވެސް ތަހުގީގެއް ހިންގައިގެން ނުވާނެ ކަމަށް ގާނޫނުއަސާސީގެ 90 ވަނަ މާއްދާގައި ބަޔާންކޮށްފައިވޭ
އެ ސަބަބުތައް އެހެން ހުރުމުން، އެ އިސްލާހަކީ، މަހްފޫޒު ސިފަ ކުރެއްވި ގޮތުގައި، "ރައްޔިތުންގެ ބާރުވެރިކަން ނިގުޅައިގަނެ، ރައްޔިތުންގެ މަޖިލީހުގެ މެންބަރުން ރައްޔިތުންގެ މަސްލަހަތުގައި މަސައްކަތްކުރުމަށް އޮތް މިނިވަން އިހުތިޔާރުވެސް ނިގުޅައިގަންނަ، އަދި ގާނޫނުއަސާސީގެ އަސާސީ އޮނިގަނޑާވެސް ހިލާފު ބަދަލެ"ކެވެ.
ގާނޫނުއަސާސީގެ ދިފާއުގައި އެމްޑީޕީން އިސްވެ އޮވެ ހިންގާ ހަރަކާތުގައި ބައިވެރިވުމަށް ދޭ ދައުވަތު ގަބޫލުކުރާ ސިޔާސީ ޕާޓީތަކަށާއި މަދަނީ ޖަމިއްޔާތަކާއި ވަކިވަކިކި ފަރުދުންނާއި ފަންނީ ބޭފުޅުންނާ ގުޅިގެން އެކުގައި ސިޔާސީ ހަރަކާތް ފުޅާކޮށް ރާއްްޖޭގެ ކަންކޮޅުތަކަށް ފުޅާކުރުމަށް… pic.twitter.com/ZnWzlOX6gN
— MDP Secretariat (@MDPSecretariat) December 10, 2024
އެ އިސްލާހު ކުރިން އޮތް ގޮތަށް ބަދަލުކުރުމަށް މަޖިލީހަށާއި ސަރުކާރަށް ގޮވާލުމާ އެކު އެކަން ކުރުމަށްޓަކައި އެމްޑީޕީގެ ފަރާތުން ވެސް އެއްބަސްވާން ޖެހޭ ކަންކަން ގަރާރުގައި ފާހަގަކޮށްފައިވެ އެވެ.
އެގޮތުން އެންމެ ބޮޑު ކަމަކަށް އޮތީ، ގޮނޑި ގެއްލުވާލާ މެންބަރުން ބައި-އިލެކްޝަންގައި ވާދަ ކުރާ ނަމަ، އޭނާއަށް ތާއީދުކޮށް އެމްޑީޕީން ކެމްޕެއިންކޮށްދިނުމެވެ. އެގޮތުން ގަރާރުގައި ބުނެފައިވަނީ:
-
މި އިސްލާހު ދެމިއޮންނަ މުއްދަތުގައި، "މަޖިލީހުގެ މެންބަރަކު ރައްޔިތުންގެ ހައްގުގައި ވަކާލާތުކުރުމުގެ ގޮތުން ބުނި ބަހެއްގެ ސަބަބުން ނުވަތަ ވޯޓު ދިނުމުގައި އަމަލުކުރި ގޮތެއްގެ ސަބަބުން އެ މެންބަރަކު ނިސްބަތްވާ ސިޔާސީ ޕާޓީއިން ވަކިކުރުމުގެ ސަބަބުން، ނުވަތަ ރައްޔިތުންގެ މަސްލަހަތުގައި މި ޕާޓީން ކުރަމުން ގެންދާ މަސައްކަތާ ބައިވެރިވުމުގެ ގޮތުން، އެ މެންބަރަކު ނިސްބަތްވާ ޕާޓީއަކުން ވަކިވެ، ދިވެހި ރައްޔިތުންގެ ޑިމޮކްރެޓިކް ޕާޓީގެ މެންބަރަކަށް ވުމުގެ ސަބަބުން، އެ މެންބަރަކު ރައްޔިތުންގެ މަޖިލީހުގެ މެންބަރުކަމުން ވަކިވެއްޖެނަމަ، އެ މެންބަރަކު ތަމްސީލުކުރި ދާއިރާއިން ރައްޔިތުންގެ މަޖިލީހަށް މެންބަރަކު އިންތިހާބުކުރުމަށް ބާއްވާ ބައި އިލެކްޝަނުގައި، ރައްޔިތުންގެ މަޖިލީހުން ވަކިކުރެވުނު މެންބަރު ވާދަކުރާ ނަމަ މި ޕާޓީއިން އެ މެންބަރަކަށް ތާއީދުކުރުމަށާއި، އެ މެންބަރަކު އަލުން ރައްޔިތުންގެ މަޖިލީހަށް އިންތިހާބުކުރުމަށް ދިވެހި ރައްޔިތުންގެ ޕާޓީގެ ފަރާތުން އެ މެންބަރަކާއެކު މަސައްކަތްކޮށްދިނުމަށް" އެއްބަސްވެ، އިގުރާރުވާ ކަމަށް
އޭގެ އިތުރުން މި އިސްލާހާ ގުޅިގެން ކުރަން އެއްބަސްވި ކަންކަމަކީ:
-
1-
އެމްޑިޕީން އިސްނަގައިގެން ސިޔާސީ އެހެން ޕާޓީތަކަށާއި މަދަނީ ޖަމިއްޔާތަކަށާއި ފަންނީ ދާއިރާތަކުގެ ބޭފުޅުންނަށް މިކަމުގައި އެކުގައި މަސައްކަތް ކުރަން ދައުވަތު ދިނުން
-
2-
އެ ދޭ ދައުވަތު ގަބޫލުކުރާ ފަރާތްތަކާ އެކު، އަދި އެމްޑީޕީން ވަކިންވިޔަސް މުޅި ރާއްޖޭގައި މި ހަރަކާތް ފުޅާކޮށް އެކި ކަންކޮޅުތަކުގައި އިހުތިޖާޖުތައް ރާވައި ސިޔާސީ ހަރަކާތްތައް ހިންގަމުން ގެންދިޔުން
-
3-
މުޅި ރާއްޖޭގެ އެކި ކަންކޮޅުތަކުގައި އިހުތިޖާޖުކުރުމުގެ ގޮތުން ސިޔާސީ ހަރަކާތްތައް ހިންގަމުން ގެންދިއުން
މި ގަރާރުގެ އިތުރުން އެމްޑީޕީން ވަނީ މި އިސްލާހާ ދެކޮޅު ޕެޓިޝަނެއް ވެސް ތައްޔާރުކޮށް މި ބައްދަލުވުމުގައި އެ ޕެޓިޝަން ފާސްކޮށްފަ އެވެ.
ކޮމެންޓް