ރައީސް މުހައްމަދު މުއިއްޒު (ފޮޓޯ/ ރައީސް އޮފީސް)
ބޭންކިން ނިޒާމުގައި ޑޮލަރު ދައުރުވާ ވަރު ދެން މާ ގިނަ ވާނެ: ރައީސް
ޑޮލަރު ހިމެނޭހެން ބޭރު ފައިސާއިން އާމްދަނީ ލިބޭ ވިޔަފާރިތަކުން ޑޮލަރު މާރުކުރަން މަޖުބޫރުވާ ގޮތަށް އެމްއެމްއޭން އެކުލަވާލާފައިވާ ބިލުގެ ސަބަބުން ބޭންކިން ނިޒާމުގައި ޑޮލަރު ދައުރުވާ ވަރު މާ ގިނަ ވާނެ ކަމަށް ވިދާޅުވެ އެ ބިލަށް ރައީސް މުހައްމަދު މުއިއްޒު ތައުރީފު ކުރައްވައިފި އެވެ.
ވީކިހިނެއް؟ - ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު އަދި ގެސްޓްހައުސްތަކުގައި ތިބޭ ކޮންމެ ގެސްޓަކަށް 25 ޑޮލަރު މާރުކުރަން އަދި ބޭރު ފައިސާއިން އާމްދަނީ ލިބޭ އެހެން ބައެއް ވިޔަފާރިތަކުން ޑޮލަރު މާރުކުރަން ޖެހޭ ގޮތަށް އެމްއެމްއޭން ބިލެއް ފަރުމާކޮށް ހިޔާލު ހުށަހަޅަން ވަނީ ހުޅުވާލައިފަ އެވެ.
ބުނީ ކީކޭ؟ - ރައީސް މުއިއްޒު 'އެކްސް'ގައި ކުރެއްވި ޕޯސްޓެއްގައި ވިދާޅުވީ ޑޮލަރު މާރުކުރުން މަޖުބޫރުކުރުމަށް އެމްއެމްއޭން މިދިޔަ މަހު 1ގައި ނެރުނު ގަވާއިދު ތަންފީޒުކުރުން ވަރުގަދަ ކުރުމަށް ޓަކައި އެ އިދާރާއިން އިސްނަގައިގެން ބޭރު ފައިސާގެ ގާނޫނެއް ހެދިގެން ދިއުމަކީ މުހިއްމު ކަމެއް ކަމަށެވެ.
"މި ގާނޫނުގެ ސަބަބުން ރިސޯޓުތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެ. ޓޫރިޒަމް ނޫން ދާއިރާތަކުން ވެސް ވަކި ވަރަކަށް ވުރެ ގިނައިން ޑޮލަރު އާމްދަނީ ލިބޭ ނަމަ، ޑޮލަރު މާރުކުރަން ޖެހޭ ގޮތަށް ހިމަނާފައިވައިވުމުން ބޭންކިން ނިޒާމުގައި ދައުރުވާ ޑޮލަރު ކުރިން އަންދާޒާކުރި ވަރަށްވުރެ އިތުރުވެގެން ދާނެ،" އެމަނިކުފާނު ވިދާޅުވި އެވެ.
މި ބަދަލުތަކުގެ ނަތީޖާއަކަށް ވެގެންދާނީ އާއްމު ރައްޔިތުންނަށާއި ކުދި އަދި މެދު ފަންތީގެ ވިޔަފާރިވެރިންނަށް ޑޮލަރުގެ ތިޔާގިކަން ލިބިގެންދިއުން ކަމަށް ވެސް ރައީސް ވިދާޅުވި އެވެ. އެ ގޮތުން އެމަނިކުފާނުގެ ޕޯސްޓުގައި ފާހަގަ ކުރައްވާފައިވާ ކަންކަމަކީ:
-
ސަރުކާރުން ހިއްސާވާ ކުންފުނިތަކުން ޕެރަލަލް މާކެޓަށް ނުގޮސް ރަސްމީ ރޭޓްގައި ޑޮލަރު ލިބޭނެ އިންތިޒާމެއް ގާއިމުކުރުން ( 2025 ޖުލައި މަހުން ފެށިގެން )
-
ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ލިބޭ 500 ޑޮލަރު ދެގުނަކޮށް އެ އަދަދު 1000 ޑޮލަރަށް ހެދުން ( 2026 ގެ ފުރަތަމަ ކުއާޓަރުގައި )
-
ކްރެޑިޓް ކާޑު ލިމިޓްތައް ބޮޑުކޮށްދިނުން ( 2026 ގެ ފުރަތަމަ ކުއާޓަރުގައި)
-
ދިވެހި ވިޔަފާރިވެރިންނަށް ތަކެތި އިމްޕޯޓްކުރުމުގެ ގޮތުން ބޭންކުތަކަށް ޓީޓީ ހެދުމަށް ދޫކުރާ ޑޮލަރުގެ ނިސްބަތް އިތުރުކުރުން ( 2025 ޖުލައި މަހުން ފެށިގެން )
"އާންމު ރައްޔިތުންނަަށް ފައިދާ ހުރި މިފަދަ ކޮންމެ ކަމެއް ކުރުމަށް ސަރުކާރުން މި ކުރާ މަސައްކަތަށް ދެއްވާ ފުރިހަމަ އެއްބާރުލެއްވުމަށް ދިވެހި އެންމެހާ ލޮބުވެތި ރައްޔިތުންނަށް ޝުކުރު ދަންނަވަން،" ރައީސްގެ ޕޯސްޓު ނިންމަވާލައްވަމުން ލިޔުއްވާފައިވެ އެވެ.
ކިޔާލަން
-
އެމްއެމްއޭ'ފޮރެކްސް ގާނޫނުން ރިޒާވް ރަނގަޅުކޮށް ރޭޓިން ހިފެހެއްޓޭނެ'
27 ނޮވެމްބަރު 2024 -
ޑޮލަރުގެ މައްސަލަރިސޯޓުތަކުން 500 ޑޮލަރު މާރުކުރަން ޖެހޭ؛ ލުއި ގެސްޓްހައުސްތަކަށް
27 ނޮވެމްބަރު 2024 -
ޑޮލަރުގެ މައްސަލަރިސޯޓް ވެރިންގެ ޝަކުވާގައި އޮތީ ހަގީގަތް؛ މި ބުރަ ނުއުފުލޭނެ
18 ނޮވެމްބަރު 2024 -
ޑޮލަރުގެ މައްސަލަ50އަށް ވުރެ ގިނަ ރިސޯޓުން ޑޮލަރު މާރުކުރާ އާ ގަވައިދާ ދެކޮޅު
14 ނޮވެމްބަރު 2024
އެނގުން މުހިންމު - މިހާރު އޮތް ގަވާއިދާއި އެ ބިލާ އަޅާކިޔާއިރު، އެ ބިލުގައި ހިމެނޭ އެންމެ ބޮޑު ބަދަލަކީ:
-
ރިސޯޓުތަކާއި ގެސްޓްހައުސްތަކާއި ހޮޓާތަކާއި ސަފާރީ އުޅަނދުތަކުގެ އިތުރަށް، ތިން ވަނަ ކެޓަގަރީއެއްގެ ގޮތުގައި ބެލެވިދާނެ ބައެއް އިތުރުކުރުން: އެއީ އަހަރެއްގެ ތެރޭގައި 20 މިލިއަން ޑޮލަރުގެ ބޭރު ފައިސާ ލިބޭ ވިޔަފާރިތައް؛ އެ ފަރާތްތަކަށް ލިބޭ ބޭރު ފައިސާ ރާއްޖޭގެ ބޭންކު އެކައުންޓަކަށް ޖަމާކުރަން ޖެހޭނެ އަދި އެ އާމްދަނީގެ %25 ރުފިޔާއަށް މާރުކުރަން ވެސް ޖެހޭނެ
-
50 ކޮޓަރިއަށް ވުރެ މަދުން ނުވަތަ ގިނައިން ހުރި ގެސްޓްހައުސްތަކާއި ސަފާރީ އުޅަނދުތައް ކެޓަގަރީ ބީއަށް ބަދަލުކުރުން؛ މި ބިލު ފާސްކޮށް، ތަސްދީގު ކުރުމުން، ކިތަންމެ ބޮޑު ގެސްޓްހައުސްއަކުން ވެސް މާރުކުރަން ޖެހޭނީ، މިހާރު މާރުކުރަން ޖެހޭ 500 ޑޮލަރުގެ ބަދަލުގައި 25 ޑޮލަރު
-
ކެޓަގަރީ އޭގައި ހިމެނޭ ރިސޯޓުތަކުން އަދިވެސް ކޮންމެ ޓޫރިސްޓަކަށް 500 ޑޮލަރު މާރުކުރަން ޖެހޭނެ
-
މާރުކުރަން ނުޖެހޭ ތިން ވައްތަރެއްގެ ޓޫރިސްޓުން ވަނީ ބިލުގައި ހިމަނާފައި؛ އެއީ 24 ގަޑިއިރު ހޭދަނުކުރާ ޓޫރިސްޓުންނާއި އުމުރުން 2 އަހަރުން ދަށުގެ ކުދިން އަދި ހިލޭ ނުވަތަ ކޮމްޕްލިމެންޓަރީކޮށް ތިބޭ ގެސްޓުން
-
ރާއްޖޭން ބޭރުގައި ރަޖިސްޓަރީކޮށްފައިވާ ޓޫރިސްޓު އުޅަނދުތައް މި ބިލުން އިސްތިސްނާވޭ
މި ބިލު އެކުލަވާލާފައިވާ ގޮތުން، އަދިވެސް ރިސޯޓުތަކުން ތިން ވައްތަރެއްގެ ޓޫރިސްޓުން ފިޔަވައި އެ ތަނެއްގައި ޗުއްޓީ ހޭދަކުރާ ކޮންމެ ގެސްޓަކަށް 500 ޑޮލަރު ރުފިޔާއަށް މާރުކުރަން ޖެހޭނެ އެވެ. އަދި ޓޫރިސްޓް ވިޔަފާރިތައް ނޫން އެހެން ބައެއް ބޮޑެތި ކުންފުނިތަކަށް ލިބޭ ބޭރު ފައިސާގެ އާމްދަނީގެ %25 ވެސް މާރުކުރަން މި ބިލުގައި ވަނީ ހިމަނާފަ އެވެ.
ކޮމެންޓް