ޕީއެންސީގެ އިންތިހާބަކީ ޕާޓީ ހިންދަމާލަން އެޅުނު މުހިންމު ފިޔަވަޅެއް: އަބްދުއްރަހީމް

މިއަދު ބޭއްވި އެތެރޭގެ އިންތިހާބަކީ ކާމިޔާބު އިންތިހާބެއް ކަމަށާއި މިއީ ޕީއެންސީ އެކަނި ނުކުމެ ހިންދެމިލަން ކުރާ މަސައްކަތުގައި ވަރަށް މުހިންމު ފިޔަވަޅެއް ކަމަށް އެ ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ވީ ކިހިނެއް؟ - އަބްދުއްރަހީމް މިގޮތަށް ވިދާޅުވީ ޕީއެންސީގެ 1،984 މަގާމަކަށް މީހުން އިންތިހާބުކުރުމަށް މިއަދު ހެނދުނު 10 އިން މެންރުދު 2އަށް މާލެ ހިމެނޭ ގޮތުން 90 ރަށެއްގައި ބޭއްވި އިންތިހާބުގެ ވޯޓަށް ފަހު، އެ ޕާޓީގެ މައި އޮފީސް ހުންނަ ސީޓްރެކް ބިލްޑިންގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.

ތަފްސީލު - ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަބްދުއްރަހީމް ވިދާޅުވީ އިންތިހާބު ކާމިޔާބު ކަމާއެކު ނިންމާލީ ބޮޑެތި މައްސަލަތެކެއް ނެތި ވަރަށް އޮމާންކޮށެވެ. އަދި މިއީ މިހާތަނަށް ރާއްޖޭގައި ސިޔާސީ ޕާޓީއަކުން ބޭއްވި އެންމެ ވަރުގަދަ އިންތިހާބުގެ ގޮތުގައި އޭނާ ސިފަ ކުރެއްވި އެވެ.

"އެނގިވަޑައިގަންނާނެ ފަދައިން، އަޅުގަނޑުމެންގެ ޕާޓީ، ޕީއެންސީ އަމިއްލައަށް ތެދުވެ، ހިންދަމާލުމަށް މިކުރާ މަސައްކަތުގައި މިއަދަކީ ވަރަށް މުހިންމު ފިޔަވަޅެއް އެޅުނު ދުވަހެއް. އެއީ، ރާއްޖޭގެ އެއްވެސް ސިޔާސީ ޕާޓީއަކުން އަދި މިހާތަނަށް ނުބާއްވާވަރުގެ ވަރުގަދަ އިންތިހާބެއް މިއަދު މި ބޭއްވީ ކާމިޔާބު ކަމާއެކު،" އޭނާ ވިދާޅުވި އެވެ.

އަބްދުއްރަހީމް ވިދާޅުވި އެގޮތުގައި އިންތިހާބެއް ނިމިގެންދާއިރު ޝަކުވާތަކާއި ހިތްހަމަ ނުޖެހުންތައް ވެސް ހުންނާނެ އެވެ. އެހެން ވަނީވެސް އިންތިހާބަށް އޮތް ޝައުގުވެރިކަން ބޮޑު ކަމުންކަން ފާހަގަކުރައްވާ އޭނާ ވިދާޅުވީ އިންތިހާބު ކާމިޔާބު ކުރެއްވި ފަރާތްތަކާއި ވާދަ ކުރެއްވި ހުރިހާ ކެންޑިޑޭޓުންނަށް މަރުހަބާ އާއި ޝުކުރު ދަންނަވާ ކަމަށެވެ. 

އިންތިހާބު ކާމިޔާބުކަމާއެކު ނިންމާލެވުނީ ލީޑާޝީޕާ އެކަމަށް ހޮއްވި ކޮމިޓީގެ ބުރަ މަސައްކަތުންކަން ފާހަގަކޮށް، އެފަރާތްތަކަށް ވެސް އަބްދުއްރަހީމް ޝުކުރު އަދާ ކުރެއްވި އެވެ. އަދި އެ ޝުކުރުގައި ވަކިން ހާއްސަކޮށް އިންތިހާބާ ބެހޭ ކޮމިޓީގެ މުގައްރިރު، ޓްރާންސްޕޯޓް މިނިސްޓަރު މުހައްމަދު އަމީންގެ ނަން އަބްދުއްރަހީމް ފާހަގަ ކުރެއްވި އެވެ. 

"އަޅުގަނޑު މި ފުރުސަތުގައި ޕާޓީގެ ރައީސް، ރައީސް ޑރ. މުހައްމަދު މުއިއްޒުއަށް މަރުހަބާ ދަންނަވައި، ތަހުނިޔާ އަރިސްކުރަން. އެ މަނިކުފާނު މި ޕާޓީ ހިންގެވުމާ ހަވާލުވީއްސުރެ މިއަދާ ހަމައަށް ލިބެމުންދާ ކާމިޔާބީތައް [އަދި] ހާއްސަކޮށް މިއަދަކީ، އޭގެ ތެރެއިން ފާހަގަކޮށްލަން ޖެހޭ ދުވަހެއް،" އޭނާ ވިދާޅުވި އެވެ.

އިންތިހާބާ ގުޅޭ ގޮތުން އަބްދުއްރަހީމް ވިދާޅުވީ:

"ކުރިއަށް އޮތްތާގައި ދިވެހި ރާއްޖޭގައި ސިޔާސީ ޕާޓީތަކުން ކަންތައްތައް ކުރާ ގޮތާއި ސިޔާސީ ޕާޓީ ހިންގާ ގޮތާއި ސިޔާސީ ހަރަކާތްތައް ރާވައި އިންތިޒާމް ކުރާ ގޮތް އަޅުގަނޑުމެން، އަޅުގަނޑުމެންގެ ވާދަވެރިންނަށް ދަަސްކޮށްދޭނަން،" އަބްދުއްރަހީމް ވިދާޅުވި އެވެ.

ޕީއެންސީއާއެކު މިވަގުތު ޕީޕީއެމް ވެސް ކޯލިޝަންގައި އެބަ އޮތެވެ. ޕީޕީއެމް ހަރަކާތްތަކުން ނުފެންނާތީ އެކަމާ ގުޅޭ ގޮތުން ނޫސްވެރިއަކު ސުވާލު ކުރުމުން އަބްދުއްރަހީމް ޖަވާބުދޭން ފެއްޓެވީ ނޫސްވެރިންގެ ބައްދަލުވުން ފެށި އިރު ދެއްކެވި ވާހަކައާ ހިސާބުންނެވެ. 

"އަޅުގަނޑު ދަންނަވައިފިން ޕީއެންސީ އަމިއްލަ ޕާޓީއެއްގެ ގޮތުގައު ނުކުމެ ހިންދަމާލަންށޭ މަސައްކަތް މިކުރަނީ. މިއަދު ސަރުކާރު ހިންގާ ޕާޓީއަކީ ޕީއެންސީ. ރައްޔިތުންގެ މަޖިލީހުގެ 75 މެންބަރުން ތިއްބެވީ ޕީއެންސީގައި. ރައިސުލްޖުމްހޫރިއްޔާ އާއި ނައިބު ރައީސްއަކީ ޕީއެންސީ ބޭފުޅެއް. ދެން މިވަގުތު ކަންދިމާ ކުރި ގޮތުން ޕީއެންސީގެ ޗެއާޕާސަން ރައްޔިތުންގެ މަޖިލީހުގެ ރައީސަކަށް ވެސް ހުރީ،" އެ މަނިކުފާނު ވިދާޅުވި އެވެ.

ޕީޕީއެމްއާ ގުޅޭ ސުވާލަށް ސީދާ ސާފު ޖަވާބެއް ނުދެއްވައި، އިތުރަށް ވާހަކަ ދައްކަވަމުން އަބްދުއްރަހީމް ވިދާޅުވީ، އަމާޒު ހިފާފައި ވަނީ ޕީއެންސީ ރާއްޖޭގެ އެންމެ ބޮޑު ޕާޓީއަކަށް ހަދައި، ދެ ވަނަ ދައުރެއް ލިބޭ ރާއްޖޭގެ ފުރަތަމަ ރައީސްއަކީ ޕީއެންސީގެ ޓިކެޓްގައި ވާދަ ކުރައްވައިގެން ރައީސް މުއިއްޒުކަމަށް ހެއްދެވުމަށް ކަމަށެވެ.

"ދެން ޕީޕީއެމް ހަރަކާތްތެރިވުމާއި ނުވުން އެއީ، މިވަގުތު އަޅުގަނޑު ޖަވާބު ދޭން ބޭނުންވާ ސުވާލެއް ނޫން. ޕީޕީއެމް އުވާލައިފިއްޔާ ތިބޭފުޅުންނަށް އެނގިވަޑައިގަންނަވާނެ، ޕާޓީ އުވާލުމުގެ އިހުތިޔާރު އޮންނާނީ، އެޕާޓީގެ ލީޑާޝިޕުން ނިންމާ ގޮތެއްގެ މަތިން ޕާޓީގެ ސެނެޓަށް. [އަދި] ދެން ވެސް އަސާސީ ގަވައިދު ހުއްދަ ކުރާ ގޮތެއްގެ މަތިން،" އަބްދުއްރަހީމް ވިދާޅުވި އެވެ.

ޕީޕީއެމް އުވާލުމައްޓަކައި ދެ ޕާޓީގެ ލީޑާޝިޕުން މީގެ ކުރިން މަޝްވަރާކޮށް، އެކަން ފަސޭހައިން ކުރުމަށްޓަކައި އެ ޕާޓީގެ އަސާސީ ގަވައިދު މިފަހުން ވަނީ އިސްލާހުކޮށްފަ އެވެ. ނަމަވެސް އަދި މިހާތަނަށް އެޕާޓީ ރަސްމީކޮށް އުވާލުމަށް ނިންމާފައެއްނުވެ އެވެ.