ޕީއެންސީއަށް 97،000 މެންބަރުން ހަމަވެއްޖެ؛ އެއްލައްކަ މީހުންގެ ފުރަތަމަ ޕާޓީއަށް ހަދާނަން: އަބްދުއްރަހީމް

މިވަގުތު ޕާޓީއަށް 97،000 ސައްހަ މެމްބާޝިޕް ފޯމު ލިބިފައިވާ ކަމަށާއި މިހާރު އަމާޒަކީ، 100،000 ހަމަ ކުރުން ކަމަށް ޕީއެންސީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ވީ ކިހިނެއް؟ - އަބްދުއްރަހީމް މިގޮތަށް ވިދާޅުވީ، މިއަދު ބޭއްވި ޕީއެންސީގެ އެތެރޭގެ އިންތިހާބުގެ ވޯޓުލުމުގެ ތެރެއިން މިއަދު ހެނދުނު ދަރުބާރުގޭގައި ހުންނަވައި މީޑިއާތަކަށް ދެއްވި އިންޓަވިއުއެއްގަ އެވެ. 

ބުނީ ކީކޭ؟ -"މިހާރު އަޅުގަނޑުމެން ޕާޓީއަށް ލިބިފައި އެބަހުރި 97،000 މެންބަޝިޕް ފޯމު. އަޅުގަނޑުމެންެގެ ދަފްތަރު ކުރެވިފައިވެސް އެބަހުރި މިހާރު ގާތްގަނޑަކަށް 75 [75،000 މެންބަރުންނަށް]ވުރެ ގިނައިން އެތެރޭގައި،" އަބްދުއްރަހީމް ވިދާޅުވި އެވެ.

ތަފްސީލު - ރައީސް މުއިއްޒު މީގެ ކުރިން ވިދާޅުވެފައި ވަނީ މި ސަރުކާރަށް އެއް އަހަރު ފުރޭއިރު، 75،000 މެންބަރުން ޕާޓީއަށް ހަމަކުރުމަކީ އަމާޒެއް ކަމަށެވެ. އެ ވިދާޅުވުމާ ގުޅިގެން އަދި މިއަދުގެ އިންތިހާބާ ދިމާކޮށް، މިދިޔަ ހަތަރު ފަސް ވަރަކަށް މަސް ތެރޭ ރާއްޖޭގެ އެކި ކަންކޮޅުތަކުގައި ޕީއެންސީއަށް ފޯމު ފުރުމުގެ މަސައްކަތް ކުރިއަށް ގެންގޮސްފައިވެ އެވެ. 

"ރައީސް މުއިއްޒު ބޭނުންފުޅުވީ 75،000 މެންބަރުން ތިބި ޕާޓީއަކަށް އަޅުގަނޑުމެން ޕާޓީ ހަދަން. އެހެން ނަމަވެސް އެމަނިކުފާނު ބޭނުންވި ވަރަށްވުރެ ވެސް ޕާޓީ މިވަނީ ބޮޑުވެފައި. އިރާދަކުރެއްވިއްޔާ އަޅުގަނޑުމެން މި ބަލަނީ، އެއް ލައްކަ މީހުން އަޅުގަނޑުމެންގެ ޕާޓީއަށް ހަމަވެގެންދާނެ ކަމަށް،" އަބްދުއްރަހީމް ވިދާޅުވި އެވެ.

އަބްދުއްރަހީމް ވިދާޅުވީ، އިލެކްޝަންސް ކޮމިޝަންގައި އޮންނަ ގަވައިދެއްގެ ސަބަބުން ފޯމުތައް ޕްރޮސެސްވުމަށް ދުވަސް ނަގަ އެވެ.  އެއީ، އެ ފޯމުތައް ކޮމިޝަނަށްލުމާ އެކު އެއަށް ޝަކުވާ ހުށަހެޅުމަށް ހުޅުވާލުން ފަދަ ކަންކަން ކުރާތީކަމަށް ފާހަގަ ކުރެއްވި އެވެ. 

އެ ފޯމުތައް އެއްކޮށް ޕްރޮސެސްވެ ނިމުމުން އަދި އިތުރު ފޯމުތައް ލާނޭ ކަމަށާއި އޭރުން ރާއްޖޭގައި އޮތް ފުރަތަމަ އެއްލަކަ މެންބަރުން ހަމަވި ޕާޓީއަކަށް ޕީއެންސީ ވާނޭ ކަމަށް އޭނާ ވިދާޅުވި އެވެ. 

އޭގެ އިތުރުން އަބްދުއްރަހީމް ވިދާޅުވީ:

"މިއަދު ޕީއެންސީން ހޯދަމުންދާ ކާމިޔާބުގެ ހަގީގީ ސިއްރަކީ، ރައީސް ޑރ. މުއިއްޒުގެ ހަރުދަނާ ސިޔާސަތު.. ޕީއެންސީއަށް އެ އޮތް ތާއީދަކީ، ރައީސް ޑރ. މުއިއްޒަށް އޮތް ތާއީދު،" އޭނާ ވިދާޅުވި އެވެ.