ޕީއެންސީން މިހާރު ބުނަނީ އަމާޒަކީ 1 ލައްކަ މެންބަރުން ހަމަ ކުރުން ކަމަށް

ވެރިކަންކުރާ ޕީއެންސީއަށް މެންބަރުން އިތުރުކުރުމުގެ ހަރަކާތްތަކަށް ތަރުހީބު ބޮޑުވަމުންދާ ކަމަށާއި މިހާރު އަމާޒު ހުރީ 100،000 މެންބަރުން ހަމަ ކުރުމަށް ކަމަށް އެ ޕާޓީން މިއަދު ބުނެފި އެވެ.

ވީކިހިނެއް؟ - ރައީސް މުހައްމަދު މުއިއްޒުގެ އިރުޝާދުގެ ދަށުން ޕީއެންސީން ގެންދަނީ އެ ޕާޓީއަށް 75،000 މެންބަރުން ހަމަކުރުމުގެ މަސައްކަތް ކުރަމުންނެވެ. ޕާޓީގެ ލީޑާޝިޕުން މިއަދުގެ ހަރަކާތް ފެށުމުގެ ކުރިން މީޑިއާއާ ވާހަކަ ދެއްކި އެވެ.

ބުނީ ކީކޭ؟ - ޕީއެންސީގެ އެއް ނައިބު އަދި ލޯކަލް ގަވަމަންޓް މިނިސްޓަރު އާދަމް ޝަރީފް ވިދާޅުވީ ރައީސް ބޭނުންފުޅުވި ވަރަށް ވުރެ ޕާޓީއަށް ލިބެމުންދާ ތަރުހީބު ބޮޑު ކަމަށެވެ. ގްރާސް ރޫޓުގައި ވެސް މި މަސައްކަތުގެ ޝައުގު ބޮޑުވެފައިވާ ކަން އޭނާ ފާހަގަ ކުރެއްވި އެވެ.

"ރައީސުލްޖުމްހޫރިއްޔާގެ ވިސްނުންފުޅަކަށް އޮތީ ގާތްގަނޑަކަށް 75000 މެންބަރުން. ޕާޓީގެ މި ވަގުތުގެ ސަޕޯޓަރުންގެ ގްރާސްރޫޓުގެ ވިސްނުން ހުރި ގޮތަށް ބަލާއިރު ރައީސުލްޖުމްހޫރިއްޔާ އެ ވިދާޅުވި ވަރަށް ވުރެ އިތުރަށް 90،000އާއި 100،000އާ ހަމައަށް ގެންދިއުމުގެ ޝައުގުވެރިކަން އެބަ އޮތް،" އާދަމް ޝަރީފް ވިދާޅުވި އެވެ.

"އެއީ މިހާރު އަޅުގަނޑުމެންގެ އަމާޒަކީ."

ރައީސް މުއިއްޒުގެ ސިޔާސަތުތައް ރައްޔިތުން ބަލައިގަންނަ ކަން ޕާޓީއަށް ވަންނަން ގިނަ މީހުންގެ ޝައުގުވެރިކަން އޮތް މިންވަރު މި ހަރަކާތުން ފެންނަ ކަމަށް އޭނާ ވިދާޅުވި އެވެ.

"މި އަންނަ އަހަރުން ފެށިގެން ތަރައްގީގެ މަޝްރޫއުތައް ވެސް ފެށިގެން ދާނެ. މިހާރަށް ވުރެ ބޮޑަށް ރައީސް މުހައްމަދު މުއިއްޒު ދެވަނަ ދައުރަކަށް ގެނައުމަށް ރައްޔިތުންގެ ތެރޭގައި މި އޮތް ފޯރި އިތުރުވެގެން ދާނެ،" އާދަމް ޝަރީފް ވިދާޅުވި އެވެ.

ސަރުކާރު ހިންގާ ޕާޓީއަށް މެންބަރުން އިތުރުކުރުމަށް ސަރުކާރުގެ ވަސީލަތްތައް ބޭނުންކުރަމުންދާ ކަމަށް އިދިކޮޅު އެމްޑީޕީން ދައްކާ ވާހަކައަށް ވެސް އޭނާ ރައްދެއް ދެއްވި އެވެ. އަދި އެ ވާހަކަތައް ދޮގު ކުރެއްވި އެވެ.

"ހަސަނަށް ހީވާނެ ފުޅައްބުޑުން ދަންޏާ ކެޔޮގަނޑު ކަނޑާލާނެހެން. އަޅުގަނޑުމެންނަކީ ވަރަށް ތަހުޒީބު، ޑިމޮކްރެޓިކް ޕާޓީއެއް. ނުފޫޒެއް ފޯރުވައިގެން އުސޫލުން ބޭރު އެއްވެސް ކަމެއް ނުކުރާނެ. އެއަށް ވުރެ ބޮޑަށް ހާމަކަން ބޮޑު ދެފުށް ފެންނަ ގޮތަށް މި ޕާޓީ ހިންގަމުން މި ދަނީ،" އާދަމް ޝަރީފް ވިދާޅުވި އެވެ.

ފަސްމަންޒަރު - ޕީއެންސީއަކީ އޭރު ޕީޕީއެމްގެ ރަައީސަކަށް ހުންނެވި ކުރީގެ ރައީސް އަބްދުﷲ ޔާމީނަށް ޕީޕީއެމް ގެއްލޭ ގޮތަށް ކޯޓުގައި އޮތް މައްސަލައެއް ނިމިދާނެ ކަމަށް ބަލައި، ބެކްއަޕެއް ގޮތުގައި އުފެއްދި ޕާޓީއެކެވެ.

ނަމަވެސް ކޯޓުގައި އޮތް މައްސަލަ ޔާމީނާ އެއްކޮޅަށް ނިންމުމުން ޕީޕީއެމާ އެކު ޕީއެންސީގެ ކޯލިޝަނެއް ހަދައިގެން ޖޮއިންޓް ސެނެޓަކުން އެއް ޕާޓީއެއް ގޮތަށް ދެ ޕާޓީގެ ހަރަކާތްތައް ގެންދަމުން ދިޔަ އެވެ.

ޔާމީނަށް އިއްވާފައިވާ ޖަލު ހުކުމެއް އޭރު އޮތުމުން 2023ގެ ރިޔާސީ އިންތިހާބުގައި އެމަނިކުފާނަށް ވާދަނުކުރެވޭނެ ކަމަށް ސުޕްރީމް ކޯޓުން ކަނޑައެޅުމުން ބެކްއަޕް ރިޔާސީ ކެންޑިޑޭޓެއް ނެރުނީ ޕީއެންސީންނެވެ.

އެންގުން މުހިންމު - ރިޔާސީ އިންތިހާބު ރައީސް މުއިއްޒު ކާމިޔާބުކުރެއްވި އިރު ޕީއެންސީގައި ތިބީ 3000 އެއްހާ މެންބަރުންނެވެ. ވެރިކަމަށް އައުމަށް ފަހު ޕާޓީއަށް މެންބަރުން އިތުރުކުރުމުގެ މަސައްކަތް ފެށި އެވެ.

އިލެކްޝަންސް ކޮމިޝަނުން އެންމެ ފަހުން އާންމު ކުރި ތަފާސްހިސާބުތަކުން ދައްކާ ގޮތުގައި، ޕީއެންސީގެ މެންބަރުންގެ އަަދަދު އުޅެނީ 28،900 ގަ އެވެ. ޕީޕީއެމްގެ މެންބަރުންގެ އަދަދަކީ 34،700 އެވެ.

އިލެކްޝަންސްގެ ދަފްތަރަށް ބަލާއިރު، އެންމެ ބޮޑު ޕާޓީއަކަށް މި ވަގުތު އޮތީ ބައި ލައްކައެއްހާ މެންބަރުންނާ އެކު އިދިކޮޅު އެމްޑީޕީ އެވެ.