މަޖިލީހުގެ ގާނޫނީ ހައިސިއްޔަތާ މެދު ސުވާލު އުފައްދައި ކޯޓަށް ދާން އެމްޑީޕީން މަޝްވަރާކުރަނީ

"އަވަސް އަރުވާލައިގެން" ގާނޫނުއަސާސީއަށް ގެނައި ބަދަލުތަކުގެ ސަބަބުން ވެރިކަންކުރާ ޕީއެންސީގެ މެޖޯރިޓީ އޮތް މަޖިލީހުގެ ގާނޫނީ ހައިިސިއްޔަތާ މެދު އިދިކޮޅު އެމްޑީޕީން ސުވާލު މިއަދު އުފައްދައިފި އެވެ.

ވީ ކިިިހިނެއް؟ - އިއްޔެ މަޖިލީހުގެ ބޭއްވި ޖަލްސާއަށް ގާނޫނުއަސާސީއަށް ބަދަލުތަކެއް ގެނައުމުގެ ބިލެއް އެޖެންޑާކޮށް ބިލުގެ ފުރަތަމަ ކިޔުމާއި އިބްތިދާއީ ބަހުސާއި ކޮމިޓީ މަރުހަލާ ވެސް ކުރިއަށް ގެންދިއުމަށް ފަހު އިއްޔެ ހަވީރު މަޖިލީހުން ފާސްކުރި އެވެ.

އެހާ ކުޑަ ވަގުތުކޮޅެއްގެ ތެރޭގައި މަޖިލީހުން ގާނޫނުއަސާސީއަށް ބަދަލުތަކެއް ގެނައުމުން، އިދިކޮޅު އެމްޑީޕީގެ ކަންބޮޑުވުންތައް ހިއްސާކުރުމަށް މިއަދު ހެނދުނު އެ ޕާޓީގެ އޮފީހުގައި ނޫސްވެރިންގެ ބައްދަލުވުމެއް ބޭއްވި އެވެ.

ބުނީ ކީކޭ؟ - އެ ބައްދަލުވުމުގައި އެމްޑީޕީގެ ރައީސް އަބްދުﷲ ޝާހިދު ވިދާޅުވީ "އަވަސް އަރުވާލައިގެން" ބަދަލުތައް ގެނައުމުން ވަރަށް ގިނަ ސުވާލުތައް އުފެދިފައިވާ ކަމަށެވެ. އެންމެ ބޮޑު ސުވާލަކީ، އޭނާ ވިދާޅުވި ގޮތުގައި، މިހާރު އޮތް މަޖިލީހުގެ ގާނޫނީ ހައިސިއްޔަތާ މެދު އެވެ.

"މި މަޖިލީހުގަ މި ތިބި މެންބަރުން އިންތިހާބު ވެގެން އައީ މި ފާސްކުރި މާއްދާތައް ނެތް ގާނޫނު އަސާސީއެއްގެ ދަށުން،" ޝާހިދު ވިދާޅުވި އެވެ.

"އިއްޔެ ފާސްކުރި އިރު އެ ޖަވާބު ލިބޭ ގޮތަށް އޮންނަން ވާނީ. މި މާއްދާތައް ފާސްކުރުމުން މާއްދާތައް ނެތް ގާނޫނުއަސާސީއަކުން އިންތިހާބުވި މަޖިލީހަށް ވާނީ ކިހިނެއްކަން. މި މަޖިލިސް އުވިފައި އާ މަޖިލީހެއް އިންތިހާބުކުރާނީތޯ؟"

މަޖިލީހުގެ ގާނޫނީ ހައިސިއްޔަތާ މެދު ވެސް އެމްޑީޕީން ސުވާލު އުފެއްދުމުން ސުޕްރީމް ކޯޓަށް ދުސްތޫރީ މައްސަލައެއް ހުށަހަޅާނެތޯ ނޫސްވެރިޔަކު ސުވާލު ކުރި އެވެ. އެ ސުވާލުގެ ޖަވާބުގައި ޕާޓީގެ ޗެއާޕާސަން ފައްޔާޒު އިސްމާއީލް ވިދާޅުވީ މަޖިލީހުން ނިންމި ނިންމުމެއްގެ ތެރެއަށް ސުޕްރީމް ކޯޓުން ވަނުމަކީ ވެސް ބޭނުންވާ ކަމެއް ނޫން ކަމަށެވެ.

"އުސޫލެއްގެ ގޮތުން އަޅުގަނޑުމެން އެހާ ބޭނުންވާ ކަމެއް ނޫން، ދައުލަތުގެ އެއް ބާރު މަޖިލީހުން ނިންމާ ކަންކަމުގެ ތެރެއަށް އަނެއް ބާރު ސުޕްރީމް ކޯޓުން ވަނުމަކީ. އެހެން ވިޔަސް މި ފަހަރު މަޖިލީހުން މިއޮތީ ގާނޫނުއަސާސީއާ ހިލާފަށް ގާނޫނުއަސާސީ ބަދަލުކޮށްފައި،" ފައްޔާޒު ވިދާޅުވި އެވެ.

ސުޕްރީމް ކޯޓަށް ދިއުމާ ގުޅޭ ގޮތުން ތަކުރާރުކޮށް ނޫސްވެރިން ސުވާލު ކުރުމުން ފައްޔާޒު ވިދާޅުވީ ޕާޓީން އޭގައި ވަކި ގޮތެއް ނުނިންމާ ކަމަށެވެ. ނަމަވެސް މަޖިލީހުން ގާނޫނުއަސާސީ އާއި ޑިމޮކްރެޓިކް ހަމަތަކާ ހިލާފުވުމުން ދެން އޭގައި ބަސް ބުނަންވީ އެއް ތަަނަކީ ސުޕްރީމް ކޯޓު ކަމަށް އޭނާ ވިދާޅުވި އެވެ.

"އަޅުގަނޑުމެންގެ ޕާޓީއަކީ މަޝްވަރާގެ މަތިން ކަންކަން ނިންމާ ޕާޓީއެއް. މި ކަމުގައި އަޅުގަނޑުމެން މަޝްވަރާ ކުރަނާން،" ފައްޔާޒު ވިދާޅުވި އެވެ.