މި ސަރުކާރަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް މުހައްމަދު މުއިއްޒު ވާހަކަ ދައްކަވަނީ. (ފޮޓޯ/ރައީސް އޮފީސް)
ގާނޫނުއަސާސީއަށް ގެނައި އަވަސް އިސްލާހުތަކަކީ ގައުމުގެ ހަމަޖެހުމަށް ކުރިކަމެއް: ރައީސް
ގާނޫނުއަސާސީ އަށް އިއްޔެ ގެނަ އިސްލާހުތަކަކީ މި ގައުމުގެ ހަމަޖެހުން ގާއިމްކުރަން މަގުފަހި ކުރުމާއި ރާއްޖޭގެ މިނިވަންކަމާއި ސިޔާދަތު ރައްކާތެރި ކުރުމަށް ބާރު އަޅައިދިނުމަށް ރައީސް ޑރ މުހައްމަދު މުއިއްޒު ވިދާޅުވެއްހެ އެވެ.
ވީ ކިހިނެއް؟ - ކުއްލި ގޮތަކަށް މަޖިލީހަށް މިދިޔަ އަންގާރަ ދުވަހުގެ ރޭ ގާނޫނު އަސާސީ އިސްލާހު ކުރުމުގެ ބިލެއް މަޖިލީހަށް ހުށަހަޅައި އިއްޔެގެ ޖަލްސާގައި ފުރަތަމަ ކިިޔުން އިއްވާ އަދި އިބްތިދާއީ ބަހުސް ވެސް ނިންމާ ކޮމެޓީ މަރުހަލާ އަދި މަޖިލީހުން ބިލު ފާސްކޮށްފަ އެވެ. އަދި ރޭގެ ވަގުތެއްގައި ރައީސް ވަނީ އެ ބިލު ތަސްދީގުކޮށް ގެޒެޓުގައި ޝާއިއުވެސްކޮށްފަ އެވެ.
ތަފްސީލް - އެކަމާ ގުޅޭގޮތުން ރޭ ދަންވަރުގެ ވަގުތެއްގައި މުއިއްޒުވަނީ ވީޑިއޯ މެސެޖެއް ދެއްވާފަ އެވެ. ރައީސް އޮފީހުގެ ސޯޝަލްމީޑިއާގައި އާންމުކުރި އެ މެސެޖުގައި މުއިއްޒު ވިދާޅުވީ ގާނޫނުއަސާސީއަށް ގެނައި އެ އިސްލާހުތަކަކީ ވަރަށް މުހިންމު އިސްލާހުތަކެއް ކަމަށެވެ.
"ގައުމުގެ ހަމަޖެހުމަށްޓަކައި ރައްޔިތުންގެ މަޖިލީހުގެ އިއްޒަތްތެރި މެންބަރުން އެއް ޕާޓީން އަނެއް ޕާޓީއަށް ބަދަލުވުން ނުވަތަ ޕާޓީން ވަކިވުން ނޫނީ ގާނޫނުގައިވާ ގޮތުގެ މަތިން ޕާޓީން ވަކިކުުރުން، މިފަދަ އެއްވެސް ހާލަތެއްގައި ޕާޓީން މަޖިލީހުގެ މެންބަރުކަން ގެއްލުން އެ މާއްދާ އެންޓި ޑިފެކްޝަން ގާނޫނު އަސާސީގައި ހިމެނުން. މިއީ ހަގީގަތުގައި ގައުމުގެ ހަމަޖެހުން ގާއިމްކުރަން ހަމަ ވަރަށް މުހިންމު ކަމެއްގެ ގޮތުގައި ރައްޔިތުންގެ މަޖިލިސް މެންބަރުން މި ކަނޑައެޅުއްވީ،" މުއިއްޒު ވިދާޅުވި އެވެ.
އެ މެސެޖުގައި މުއިއްޒު ވަނީ އެ އިސްލާހުތަކުގެ ތެރޭގައި ހިމެނޭ އެހެން ކަންކަން ފާހަގަކުރައްވާފަ އެވެ. އެގޮތުން ރާއްޖޭގެ ސަރަހައްދަށް ބަދަލެއް ގެންނަ ނަމަ މީގެ ކުރިން މަޖިލީހުގެ ތިންބައިކުޅަ ދެބައިގެ އަގުލަބިއްޔަތުން ފާސްވާން ޖެހޭއިރު އިއްޔެ ގެނައި އިސްލާހާއެކު އެކަން އިތުރަށް ވަރުގަދަވެ، ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ތަނަވަސް އަގުލަބިއްޔަތަކުން ފާސްކުރަން ޖެހޭގޮތަށް ކަނޑައެޅުނީ ކަމަށް ވިދާޅުވި އެވެ.
މިއަދު ރައްޔިތުންގެ މަޖިލީހުން ފާސްކޮށް ޤާނޫނު އަސާސީއަށް ގެނައި އިޞްލާޙުތަކަކީ ރާއްޖޭގެ ރައްޔިތުންގެ ޙައްޤުގައި، ރާއްޖޭގެ މިނިވަންކަމާ، ސިޔާދަތާ، ތަރައްޤީއާ، ހަމަޖެހުމަށްޓަކައި، ނުހަނު ޖޯޝާއެކު ޤައުމީ ރޫޙުގައި ނިންމެވި ވަރަށް މުހިންމު ނިންމެވުންތަކެއް. މިކަމަށްޓަކައި… pic.twitter.com/k9JJO2amh1
— The President's Office (@presidencymv) November 20, 2024
އޭގެ އިތުރުން އެ މެސެޖުގައި މުއިއްޒު ވިދާޅުވީ އިއްޔެ ގެނައި އިސްލާހާއެކު:
-
ރާއްޖޭގެ ކަނޑުގެ ސަރަހައްދު އެކްސްކުލޫސިވް އިކޮނޮމިކް ޒޯން (އީއީޒެޑް) އާ ހަމައަށް ކަނޑައެޅޭނެ
-
އަދި އެގޮތަށް ކަނޑައަޅާ ސަރަޙައްދަކަށް ބަދަލު ގެނެވޭނީވެސް ރައްޔިތުންގެ މަޖިލީހުގެ ހަތަރުބައިކުޅަ ތިންބައިގެ ވޯޓު ލިބި، އަދި އޭގެ އިތުރަށް ރައްޔިތުންގެ ފެންނަ ނުފެންނަ ވޯޓެއްވެސް ނަގައިގެން
-
ރާއްޖޭގައި ބޭރުގެ ސިފައިންނަށް އަމަލީގޮތުން ހަރަކާތްތެރިވެވޭނީ މަޖިލީހުން ރުހުން ލިބިގެން ކަމަށް
-
ރައްޔިތުންގެ ފެންނަ ނުފެންނަ ވޯޓު ނަގާ ކަންކަމަށް ބަދަލު ގެނެވޭނީވެސް އެ ބަދަލު ގެންނަން ރައްޔިތުންގެ ފެންނަ ނުފެންނަ ވޯޓެއް ނަގައިގެން؛ ކުރިން ފެންނަ ނުފެންނަ ވޯޓު ނެގުމުގެ މާއްދާއަށް ބަދަލު ގެނައުމުގެ ބާރު މަޖިލީހަށް އޮވޭ
-
ރާއްޖޭގެ ތަރައްގީއަށް ކުރު މެދު އަދި ދުރު ރާސްތާގެ ޕްލޭންތައް ހެދުން ރައީސްގެ މަސްއޫލިއްޔަތުގެ ތެރޭގައި ހިމެނިގެން ހިނގައްޖެކަމަށް
މުއިއްޒުގެ އެ މެސެޖު ނިންމަވައިލައްވަމުން، އެމަނިކުފާނުވަނީ އިއްޔެ މަޖިލީހުން ގެނައި އިސްލާހުތަކަކީ ރާއްޖޭގެ ރައްޔިތުންގެ ހައްގުގައި ރާއްޖޭގެ މިނިވަންކަމާ، ސިޔާދަތާ، ތަރައްގީއާ، ހަމަޖެހުމަށްޓަކައި، ނުހަނު ޖޯޝާއެކު ގައުމީ ރޫހުގައި ނިންމެވި ވަރަށް މުހިންމު ނިންމެވުންތަކެއްކަމުގައި ވިދާޅުވެފަ އެވެ.
ކޮމެންޓް