މީޑިއާ ކޮމިޝަންގެ ބިލު ފާސްނުކުރަން ޑިމޮކްރެޓްސް އިން ގޮވާލައިފި

މީޑިއާ ކޮމިޝަންގެ ބިލަކީ ޑިމޮކްރެޓިކް ނިޒާމެއްގެ ތެރެއިން އަދި ރާއްޖޭގެ ގާނޫނު އަސާސީން ބަލައިގެންފައިވާ ހަމަތަކާއި އުސޫލުތަކަށް ބެލުމެއްނެތި ހުށަހަޅާފައިވާ ބިލެއް ކަމަށް ބުނެ އެ ބިލު ފާސް ނުކުރަން އިދިކޮޅު ޕާޓީ ދަ ޑިމޮކްރެޓްސް އިން ގޮވާލައިފި އެވެ.

ވީ ކިހިނެއް؟ - ސަރުކާރުގެ ބާރު އޮންނަ ގޮތަށް މީޑިއާ ކޮމިޝަނެއް އުފައްދަން ރައްޔިތުންގެ މަޖިލީހަށް ބިލެއް ހުށަހެޅުއްވީ ތުޅާދޫ ދާއިރާގެ މެމްބަރު އަބްދުލް ހަންނާނު އަބޫބަކުރު އެވެ. އެއީ އެއްވެސް ޕާޓީއަކަށް ނިސްބަތްނުވާ އަމިއްލަ މެންބަރެކެވެ.

ތަފްސީލް - އެ ބިލާ މެދު ކަންބޮޑުވުން ފާޅުކޮށް ޑިމޮކްރެޓްސް އިން ނެރުނު ނޫސް ބަޔާނެއްގައި ބުނީ އެއީ ނޫސްތަކުގެ މައްޗަށް ކަންކަން މަޖުބޫރުކުރުމާއި ނޫސްވެރިންނަށް އަދަބު ދިނުމާއި ނޫސްތައް ބަންދުކުރުމުގެ ބާރު އަތަށް ނެގޭ ގޮތަށް އެކުލަވާލައިފައިވާ ބިލެއް ކަމަށާއި އެކަމާ އެ ޕާޓީން ކަންބޮޑުވުން ފާޅުކޮށް އެކަން ކުށްވެރިކުރާ ކަމަށެވެ.

ބުނީ ކީކޭ؟ - "އެންމެ ބޮޑު އެއް ކަމެއްގެ ގޮތުގައި ފާހަގަކުރެވެނީ، ބްރޯޑްކާސްޓްކުރުން ވަކި ހަމައަކުން ދައުލަތުގެ އިދާރާއަކުން ރެގިއުލޭޓްކުރުމަށް ދެވޭ އިހުތިޔާރަކީ ޗާޕްކޮށްގެންނާއި އޮންލައިންކޮށް ހިންގާ ނޫސްތަކުގެ މައްޗަށް ވެސް އޮތް އިހުތިޔާރެއް ކަމަށް ހަދައި، މި ދެކަމުގައި އޮތް އަސާސީ ފަރަގު ވެސް އޮޅުވާލައިގެން، ނޫސްތަކުގެ މައްޗަށް ބާރުހިންގައި ނޫސްވެރިކަމުގެ މިނިވަންކަން ނަގާލުމަށް އެ ބިލުގައި މާއްދާތައް ހިމަނާފައިވުމެވެ،" ޑިމޮކްރެޓްސްގެ ބަޔާނުގައި ބުނެފައިވެ އެވެ.

އޭގެ އިތުރުން އެ ނޫސް ބަޔާނުގައި ބުނެފައިވަނީ:

"'ތެދު ބަސް' މިއީ ސަރުކާރަށް ނުވަތަ އެ ނޫން ވެސް ވަކި ފަރާތަކަށް އޮންނަ 'މޮނޮޕޮލީ' އަކަށްނުވާއިރު، ސަރުކާރު ހިތްނުރުހޭ ގޮތަކަށް މައުލޫމާތު ޝާއިއުކުރެވިދާނޭކަމުގެ ބިރަށް، އެ މައުލޫމާތެއް ޝާއިއުކުރުމުގެ ކުރިއަށް ނަފުސު ސެންސަރުވެގެން އެ މައުލޫމާތެއް ވަކި ގޮތަކަށް ބައްޓަންކުރުމަށް މަޖުބޫރުކުރުވާ ގޮތަށް އެ ބިލު ފަރުމާކޮށްފައިވުމީ ނޫސްވެރިކަމުގެ މިނިވަންކަން ނަގައިލުމުގެ އަމަލެއް ކަމަށް ދެކެމެވެ،" ޑިމޮކްރެޓްސްގެ ބަޔާނުގައި ބުނެފައިވެ އެވެ.

ފާހަގަކޮށްލެވޭ - އެ ބިލާ ދެކޮޅަށް އެމްޑީޕީން ވެސް ވަނީ ބަޔާނެއް ނެރެ ކަންބޮޑުވުން ފާޅުކޮށްފަ އެވެ. އެކަމާ ގުޅޭގޮތުން ރައީސް މުހައްމަދު މުއިއްޒު ވިދާޅުވީ މީޑިއާ ކޮންޓްރޯލް ކުރުމަކީ އެމަނިކުފާނު ގަބޫލުކުރައްވާ ހަމައެއް ނޫން ކަމަށެވެ.