ވިޔަފާރިވެރިންނަށް ދަތިކުރުމުން އަސަރުކުރާނީ ރައްޔިތުންނަށް: ޔާމީން

ވިޔަފާރިވެރިންގެ އިންވެސްޓްމަންޓްތަކަށް ދަތިވާނެ ގޮތަށް ސަރުކާރުން ގަވާއިދުތަކާއި ސިޔާސަތު އެކުލަވާލުމުން އޭގެ އަސަރުކުރާނީ މުޅި އިގުތިސޯދަށާއި ދިވެހި ރައްޔިތުންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.

ވީކިހިނެއް؟ - ޓުއަރިޒަމް ވިޔަފާރިތަކަށް ލިބޭ ބޭރު ފައިސާގެ އާމްދަނީން ބޭންކަށް މާރުކުރަން ޖެހޭ ގޮތަށް ސަރުކާރުން ގަވައިދު އެކުލަވާލީ "ރައްޔިތުންގެ ފަޅީގައި" ހުރެގެން ކަމަށް ރައީސް މުހައްމަދު މުއިއްޒު ވިދާޅުވާތީ ޔާމީން ރޭ ވަނީ އެ ވާހަކައަށް ވަރަށް ބޮޑަށް ފާޑުވިދާޅުވެފަ އެވެ.

ބުނީ ކީކޭ؟ - ޕީއެންއެފް އޮފީހުގައި ރޭ ބޭއްވި ޖަލްސާގައި އެ ޕާޓީގެ ލީޑަރު ޔާމީން ވިދާޅުވީ ވިޔަފާރިވެރިންނަށް އެހާ އިހުތިރާމު ކުޑަކޮށް ސަރުކާރުން ވާހަކަ ދައްކާއިރު އެއީ މި އިގުތިސޯދަށް ލިބިފައިވާ ތަނަވަސްކަމުގެ އެންމެ ދައުރު ބޮޑު ބޭފުޅުން ކަމަށެވެ.

ޔާމީން ވިދާޅުވީ ޑޮލަރު މާރުކުރުމަށް ސަރުކާރުން ގެންގުޅެނީ ދެކޮޅު ޖެހޭ ސިޔާސަތެއް ނޫން ކަމަށެވެ. ސަރުކާރުން އެ ވަރުގެ ގަވާއިދެއް އެކުލަވާލާ އަމަލު ކުރުމުގެ ކުރިއަށް ބަލަން ޖެހޭ ގިނަ ކަންކަން ބަލާފައި ނެތް ކަމަށް ވެސް އެ މަނިކުފާނު ވިދާޅުވި އެވެ.

"ރިސޯޓުތަކުން ދައުލަތަށް ދައްކަން ޖެހޭ ޓެކްސް ވެސް ޑޮލަރުން ދައްކާފައި. މި މީހުން ރިސޯޓުތައް ހެދުމަށް ކުރާ އިންވެސްޓްމަންޓްތަކަށް ފައިސާ މި ހޯދަނީ ލޯނު ނަގައިގެން. އަދިވެސް އެ ދަނީ ލޯނުތައް ދައްކަމުން. މި ލޯނުތައް ދައްކަނީ ޑޮލަރުން،" ޔާމީން ތަފްސީލްކޮށްދެއްވި އެވެ.

އެ މަނިކުފާނު ވިދާޅުވީ ސަރުކާރުން ވެސް ބޭނުންވާނީ އިތުރު ގިނަ ރިސޯޓުތައް ބާޒާރަށް ނެރެން ކަމަށެވެ. އެ ކަން ކުރެވޭނީ މި ވިޔަފާރިވެރިންނަށް ކަމަށާއި އެ ކަން ކުރަން އިތުރު ލޯނު ނަގަން ޖެހެންޏާ ވެސް ދައްކަން ޖެހޭނީ ޑޮލަރުންކަން އެ މަނިކުފާނު ފާހަގަ ކުރެއްވި އެވެ.

"އެ މީހުންގެ ވިޔަފާރިތަކުން، ވަސީލަތްތައް ބޭނުންކޮށްގެން ކިތައް ދިވެހި ޒުވާނުންނަށް ވަޒީފާ ދީފައި އެ ހުރީ. މި ރިސޯޓުތައް ބަންދުކުރަން ޖެހެއްޖެއްޔާ ސަރުކާރަށް ދެވޭ ހެއްޔެވެ މި ހުރިހާ ޒުވާނުންނަށް ވަޒީފާ. އިތުރު ވަޒީފާ އުފައްދަން އިތުރު ރިސޯޓުތައް ބާޒާރަށް ނެރެން ޖެހޭ އެބަ. މި ވަރު މި ސަރުކާރަށް ނަގައިނުގަނެވޭ،" ޔާމީން ވިދާޅުވި އެވެ.

އެނގުން މުހިންމު - ރައީސް މުއިއްޒު "އެކްސްގައި" ޕޯސްޓެއް ކުރައްވައި ރައްޔިތުންގެ ހައްގުގައި ނިންމި ނިންމުންތަކެއްގެ ގޮތުގައި ސިފަކުރެއްވީ ޗަމްޕާ މުހައްމަދު މޫސާއާއި އެހެން ބައެއް ރިސޯޓު ވިޔަފާރިވެރިން ވެސް ޑޮލަރު މާރުނުކުރެވޭނެ ކަން ސަރުކާރަށް އަންގާފައިވަނިކޮށެވެ.