ޗަމްޕާ މުހައްމަދު މޫސާގެ ވިޔަފާރިތަކުން އާ ގަވައިދަށް ޑޮލަރު މާރުކުރަން ދެކޮޅު ހަދައި އެކަން ސަރުކާރަށް އަންގައިފި

ބޭރު ފައިސާގެ މުއާމަލާތްތައް ކުރުމަށް މިފަހުން މަރުކަޒީ ބޭންކް، އެމްއެމްއޭއިން އެކުލަވާލި އާ ގަވައިދުތަކާ އެއްގޮތަށް ޑޮލަރު މާރުކުރުމަކީ ކުރެވޭނެ ކަމެއް ނޫންކަން ފާހަގަކޮށް އެ ގަވައިދު އުވާލަން ރާއްޖޭގެ އެންމެ ބޮޑު ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު)ގެ ކުންފުނިތަކުން ސަރުކާރުގައި އެދިއްޖެ އެވެ. 

ވީ ކިހިނެއް؟ - މުހައްމަދު މޫސާ ސޮއިކުރައްވައި އޭނާގެ ރިސޯޓްތައް ހިންގާ ތިން ކުންފުނި ކަމަށްވާ ޗަމްޕާލާސް ހޯލްޑިންގްސް، ކޮމަންޑޫ ހޯލްޑިންގްސް އަދި ކުރެއްދޫ ހޯލްޑިންގްސްއިން ވަނީ އެމްއެމްއޭގެ ގަވަރުނަރު އަހުމަދު މުނައްވަރަށް އެޑްރެސްކޮށް އިއްޔެ ސިޓީއެއް ފޮނުވައިފަ އެވެ. 

ތަފްސީލް - 'ދައުރު'އަށް ކޮޕީ ލިބިފައިވާ އެ ސިޓީގައި ބުނެފައި ވަނީ އެމްއެމްއޭއިން މިފަހުން ގެޒެޓްކޮށް އަމަލުކުރަން ފަށާފައިވާ ބޭރު ފައިސާގެ މުއާމަލާތްތައް ކުރުމުގެ ގަވައިދަކީ ޓޫރިޒަމް ދާއިރާގެ ވިޔަފާރިތަކަށް ވަރަށް ބޮޑު ގޮންޖެހުމެއް އަދި ބޭއިންސާފެއް ކަމަށެވެ.

އެ ގަވައިދުގައި ކަނޑައަޅާފައިވާ ގޮތަށް ކޮންމެ ރިސޯޓަކަށް އަންނަ ޓޫރިސްޓެއްގެ ބޮލަށް 500 ޑޮލަރު މާރުކުރުމަކީ ކުރެވޭނެ ކަމެއް ނޫން ކަމަށް ވެސް ވަނީ ފާހަގަކޮށްފަ އެވެ. އަދި އެކަމުގެ ސަބަބުން ރިސޯޓްތަކަށް ލިބޭ އާމްދަނީއަށް ވުރެ އިތުރަށް ހަރަދުކުރަން ޖެހި، ރިސޯޓްތަކަށް މާލީ ގެއްލުމާ ކުރިމަތިލާން ޖެހިދާނެ ކަމަށް ވެސް ސިޓީގައިވެ އެވެ.

"އެކި ފަންތީގެ ރިސޯޓްތަކުގެ އެވްރެޖް ޑެއިލީ ރޭޓް (އޭޑީއާރު) ތަފާތު ނަމަވެސް އެމްއެމްއޭގެ އާ ގަވައިދުގައި އެކަމަށް ބެލުމެއް ނެތި ހުރިހާ ރިސޯޓްތަކުން އެއްވަރަކަށް ބޭރު ފައިސާ މާރުކުރަން ވަނީ މަޖުބޫރުކޮށްފައި. އަދި މިއީ ރިސޯޓް ވިޔަފާރި ހިނގާ އުސޫލުތަކާ ދިމާނުވާ ގަވައިދެއް. މިކަމުގެ ސަބަބުން ހާއްސަކޮށް ދަށް ފަންތީގެ ރިސޯޓްތަކަށް އުފުލަން ޖެހޭ މާލީ ގެއްލުން ބޮޑުވާނެ،" ސިޓީގައި ފާހަގަކޮށްފައިވެ އެވެ.

އެހެންވުމުގެ ސަބަބުން، ދެން ރިސޯޓްތަކަށް މަޖުބޫރުވާނީ އެ ގެއްލުން ކުޑަކުރަން ބައެއް ހަރަދުތައް ކުޑަކުރަން ކަމަށް ވެސް ސިޓީގައިވެ އެވެ. އެގޮތުން:

"މި ގަވާއިދަކީ ދިވެހި ސަރުކާރުގެ ދަރަނީގެ މައްސަލަ ހައްލުކުރުމަށް ވަގުތީ ގޮތުން ހޯދި ހައްލެއް. މިކަމުގެ ސަބަބުން ދިގު މުއްދަތެއްގައި ރާއްޖޭގެ އިގްތިސާދަށް ވަރަށް ބޮޑެތި ނޭދެވޭ އަސަރުތަކެއް ކުރާނެ،" ސިޓީގައި ފާހަގަކޮށްފައިވެ އެވެ. 

އެ ސިޓީގައި އިތުރަށް ބުނެފައި ވަނީ:

"މިދެންނެވި ކަންކަމަށް ރިއާޔަތްކޮށް، މި ގަވައިދަށް އަމަލުކުރުން މިހާރުން މިހާރަށް ހުއްޓާލުމަށް އަޅުގަނޑުމެން އެދެން. އަދި މުޅި ރާއްޖޭގެ އިގްތިސާދަށް ދެމެހެއްޓެނިވި ގޮތެއްގައި ފައިދާހުރި އަސަރުތަކެއް ކުރާނޭ ގޮތަށް ބޭރު ފައިސާގެ މުއާމަލާތައް ބެލެހެއްޓުމުގެ އުސޫލު ކަނޑައެޅުމަށް ސަރުކާރަށް އިލްތިމާސްކުރަން،" ސިޓީގައިވެ އެވެ.