މައުމޫން އާއި ދިވެހިން ކުރި އިތުބާރާއި ދިން ފުރުސަތަށް ޝުކުރުވެރިވަން: ހާޖީދާރު

ރާއްޖޭގެ އެންމެ މަޝްހޫރު އެއް ބިނާ ކަމަށްވާ އިސްލާމީ މަރުކަޒަަށް އިއްޔެ 40 އަހަރު ފުރުނު އިރު އެތަނުގެ އާކިޓެކްޓް އަދި މަޝްރޫއުގައި އެންމެ އިސްކޮށް އުޅުއްވި މެލޭޝިއާގެ ހާޖީދާރު އަބްދުލް މަޖީދަށް ވެސް އެއީ ވަރަށް ފަހުރުވެރި މަސައްކަތެކެވެ.

އުމުރުން އޭރު އެންމެ 37 އަހަރުގެ އެކަމަކު މެލޭޝިއާގެ މަޝްހޫރު އާކިޓެކްޓްއާ އިސްލާމީ މަރުކަޒުގެ ޑިޒައިން އާއި މަސައްކަތް ހަވާލުކުރަން އޭރުގެ ރައީސް މައުމޫން އަބްދުލްގައްޔޫމް ނިންމެވީ ވެސް ސަބަބުތަކެއް ހުރެގެންނެވެ. އެއް ސަބަބަކީ މެލޭޝިއާގެ ވެރިރަށް ކުއާލަ ލަމްޕޫރުގެ ބަންގްސާގައި ހެދި އަބޫބަކުރު އައްސިއްދީގު މިސްކިތް ޑިޒައިންކުރެއްވީ ވެސް އޭނާ ކަމަށް ވުމެވެ.

'ދައުރު'އާ ވާހަކަ ދައްކަވަމުން ހާޖީދާރު، 78، ވިދާޅުވީ އިސްލާމީ މަރުކަޒުގެ މަސައްކަތް ކުރައްވަން އޭނާއަށް ލިބިވަޑައިގެންނެވި ފުރުސަތާ މެދު މިހާރު ވެސް އުފާކުރައްވާ ކަމަށެވެ.

"މީގެ 40 އަހަރު ކުރިން ރައީސް މައުމޫން އާއި ދިވެހިން އަޅުގަނޑަށް ކުރި އިތުބާރާއި ދިން ފުރުސަތަށް ޝުކުރުވެރިވަން. އެއީ އަބަދުވެސް އަޅުގަނޑުގެ ހަނދާނުގައި ހުންނާނެ ކަމެއް،" ހާޖީދާރު ވިދާޅުވި އެވެ.

އޭނާ ވިދާޅުވި ގޮތުގައި އެ މަސައްކަތަކީ މުސްލިމުންގެ މެދުގައި އޮންނަން ޖެހޭ ގާތް އެކުވެރިކަން އިތުރަށް ވަރުގަދަވާން ވެސް ލިބިވަޑައިގެންނެވި ފުރުސަތެކެވެ.

އިސްލާމީ މަރުކަޒު ހުޅުވީ 11 ނޮވެމްބަރު 1984ގަ އެވެ. އެ ބޮޑު އިމާރާތުގެ މަސައްކަތް ނިންމީ އެންމެ 10 މަސް ދުވަހުންނެވެ.

ޑިޒައިންކުރެއްވުމުގެ އިތުރުން މަޝްރޫއުގެ ކޮންސަލްޓެންޓަކީ ވެސް ހާޖީދާރެވެ. އިމާރާތުގެ މަސައްކަތްކުރީ އޭނާ ދަންނަ މެލޭޝިއާގެ ކޮންސްޓްރަކްޝަން ކުންފުންޏަކުންނެވެ.

އޭރު އެވަރުގެ މަސައްކަތަކަށް ބޭނުންވާ ޒަމާނީ ސާމާނެއް ވެސް ރާއްޖޭގައި ލިބޭކަށް ނުހުރެ އެވެ. އެ ހުރިހާ އެއްޗެއް ބޭރުން ގެނެސް މަސައްކަތް އެހާ އަވަހަށް ނިންމާލުމަކީ، 2022ގައި 'ދައުރު'އަށް ދެއްވި އިންޓަވިއުއެއްގައި ހާޖީދާރު ވިދާޅުވި ގޮތުން، މެލޭޝިއާއަށް ބެލި ނަމަވެސް ވަރަށް އަވަސް މުއްދަތެކެވެ.

އިސްލާމީ މަރުކަޒުގެ މަސައްކަތާ ހަވާލުވެވަޑައިގަތުމުގެ ވާހަކަ ހާޖީދާރު އަރިހުގައި މައުމޫން ފުރަތަމަ ވިދާޅުވީ އެމަނިކުފާނުގެ ރަސްމީ ދައުވަތަކަށް މާލެ ވަޑައިގެން ރައީސް އޮފީހުގައި ބޭއްވި ބައްދަލުވުމުގަ އެވެ.

"އަހަރެން ބުނިން އަލްހަމްދުލިﷲއޭ، ދީނީ ގޮތުން ވެސް އެއީ އަހަންނަށް ވަރަށް ބޮޑު ކަމެއް. ލާރި ލިބޭނެތޯ ނުވަތަ ނޫންތޯއެއް ނޫން އޮތް ސުވާލަކީ. އަހަރެން ބޭނުންވީ މިސްކިތެއް އަޅަން ލިބުމުން އެ ފުރުސަތުގެ ބޭނުންހިފަން،" މައުމޫނާ އެކު އޮތް ބައްދަލުކުރުމުގެ ހަނދާންތައް، 2022ގެ އިންޓަވިއުގައި، ހާޖީދާރު ކިޔައިދެއްވި އެވެ.

މިހާރު ވެސް އިސްލާމީ މަރުކަޒު ފެންނަނީ ބަދަލެއް ނައިސް ހުރި އާ ތަނެއްގެ ގޮތުގަ އެވެ. އެއީ އޭރު ކުރި މަސައްކަތް މޮޅުވެފައި، ބޭނުންކުރި އެއްޗެހީގެ ފެންވަރު ވެސް ރަނގަޅުވުމެވެ.

މިއީ އާދައިގެ އާކިޓެކްޓެއް ނޫނެވެ. މިއީ ވަރަށް ކުޑައިރު މެލޭޝިއާގައި މަޝްހޫރުކަން ހޯއްދެވި ކުރެހުންތެރިއެކެވެ. އޭގެ ފަހުން 1960ގެ އަހަރުތަކުގެ ފަހުކޮޅު ސަރުކާރުގެ ސްކޮލަޝިޕެއްގައި އިނގިރޭސި ވިލާތަށް ވަޑައިގެން، އާކިޓެކްޗާގެ ދާއިރާއިން ކިޔަވާ ވިދާޅުވި އެވެ. ހަތް އަހަރު އިނގިރޭސި ވިލާތުގައި އުޅުއްވުމަށް ފަހު 1973ގައި އެނބުރި މަލޭޝިއާއަށް ވަޑައިގެން ޒަމާނީ ގޮތްގަނޑަށް މެލޭޝިއާގެ ބައެއް އިމާރާތްތައް ބަދަލުކުރުމުގައި، ހާޖީދާރަކީ މަޝްހޫރު ބޭފުޅެކެވެ.

އޭނާގެ އަމިއްލަ ކުންފުނި ހާޖީދާރު އެންޑް އެސޯސިއޭޓްސްއަށް މިހާރު 45 އަހަރު ވެއްޖެ އެވެ. މެލޭޝިއާ އާއި މެލޭޝިއާއިން ބޭރުގައި 100އަށް ވުރެ ގިނަ އިމާރާތް ޑިޒައިންކުރި އެވެ.