އިސްލާމީ މަރުކަޒުގެ ފައުންޑޭޝަން އެޅިއިރު ކޮލީ އަލީ އުމަރު މަނިކު އާއި ކޮންސަލްޓެންޓް/އާކިޓެކްޓް ހާޖީދާރު އަބްދުލް މާޖިދު އަދި އަބްދުﷲ ކަމާލުއްދީން، މަސައްކަތުގެ އިސް ބައެއް މީހުންނާ އެކު
އިސްލާމީ މަރުކަޒަށް 40 އަހަރު: ތާރީހީ ފޮޓޯތަކުން މާޒީގެ މަންޒަރެއް
އިސްލާމީ މަރުކަޒަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ އެންމެ މަޝްހޫރު އެއް ބިނާ އެވެ. އެއީ މީގެ 40 އަހަރު ކުރިއަށް ބަލާ ނަމަ ރާއްޖެ ދުށް އެހާމެ ބޮޑު މަޝްރޫއުއަކާއި އެހާމެ ރީތި އިމާރާތެއް ވެސް މެ އެވެ.
ދީނީ މުހިންމު ބިނާއެއް މާލޭގައި ހެދުމަކީ އޭރުގެ ޒުވާން ރައީސްގެ ވަރަށް ބޮޑު ހުވަފެންފުޅެކެވެ. އެކަމަށްޓަކައި އިސްލާމީ ބައެއް ގައުމުތަކުގެ އެފަދަ އިމާރާތްތަކަށް ކޮންމެވެސް ވަރަކަށް މައުމޫންގެ އަރިސް ބައެއް ބޭފުޅުން ނަޒަރު ހިންގަމުން ވެސް ދިޔަ އެވެ. އެގޮތުން ރައީސް އިބްރާހިމް ނާސިރުގެ ވެރިކަމުގައި ވެސް ވިޔަފާރީގެ ގޮތުން ބޭރާ ގުޅުން ބޮޑު ކޮލީ އަލީ އުމަރު މަނިކު (އަލީ މަނިކު) މައުމޫންގެ އުއްމީދު ފުރިހަމަކުރައްވަން ހާއްސަ މަސައްކަތްތަކެއް ކުރެއްވި އެވެ.
މެލޭޝިއާގެ ވެރިރަށް ކުއާލަ ލަމްޕޫރުގެ މުއްސަނދި ސަރަހައްދެއް ކަމަށްވާ ބަންގްސާގައި އޭރު ވަރަށް ރީތި މިސްކިތެއް ބިނާކޮށް ހުޅުވިތާ މާ ގިނަ ދުވަހެއް ނުވެ އެވެ. އަބޫބަކުރު އައްސިއްދީގު މިސްކިތް ވީ ނަމޫނާއަކަށެވެ. އަލީ މަނިކު ބައްދަލުކުރެއްވީ އެ މިސްކިތް ޑިޒައިންކުރެއްވި ހާޖީދާރު އަބްދުލް މާޖިދުއާ އެވެ. އޭނާއަށް އެރުވީ ރައީސް މައުމޫންގެ ދައުވަތެވެ.
ހާޖީދާރު ރާއްޖެ ވަޑައިގަތެވެ. މައުމޫނާ ބައްދަލުކުރެއްވި އެވެ. އިސްލާމީ މަރުކަޒުގެ ޑިޒައިން އާއި އިމާރާތްކުރުމުގެ ކަންކަމުގައި ވެދެއްވެން އޮތް އެހީއެއް ދެއްވާނެކަމުގެ ޔަގީންކަން އެރުވި އެވެ. އޭނާ ބެއްލެވީ އެއީ ދީނީ ގޮތުން ވެސް އޭނާއަށް މުހިންމު މަސައްކަތެއްގެ ގޮތުގަ އެވެ.
ސަރުކާރުން ބިން ސާފުކޮށްފައި ހަވާލުކުރި އެވެ. އެހާމެ އަވަހަށް މަސައްކަތް ފެށި އެވެ. އެ ބޮޑު މަޝްރޫއު ނިންމާލީ އެންމެ 10 މަސް ދުވަހުގެ ތެރޭގަ އެވެ. އެއީ ބޭނުންވާ ހުރިހާ ސާމާނެއް ފަސޭހަކަމާ އެކު ލިބެން ހުންނަ މެލޭޝިއާގައި ވެސް އެވަރުގެ މަސައްކަތަކަށް ވަރަށް އަވަސް މުއްދަތެއް ކަމަށް، 'ދައުރު'އަށް 2022ގައި ދެއްވި އިންޓަވިއުއެއްގައި، ހާޖީދާރު ވިދާޅުވި އެވެ.
އިސްލާމީ މަރުކަޒުގެ ބިޔަ އޮނިގަނޑު ފެންނަން ފެށުމާ އެކު ވެސް އާންމުން ހައިރާންވި އެވެ. އެއީ އޭގެ ކުރިން ރާއްޖޭގައި ކޮށްފައި ނެތް ތަފާތު މަސައްކަތެކެވެ. ދިވެހިންނަށް ފެނިފައި ނެތް ބޮޑު އިމާރާތެކެވެ.
ހާޖީދާރަކީ މެލޭޝިއާގައި ވެސް އޭރު ވަރަށް މަޝްހޫރު އާކިޓެކްޓެކެވެ. މެލޭޝިއާގެ ބަޔަކު އިސްވެ ތިބެ ބޭރު ގައުމެއްގައި އެފަދަ މަޝްރޫއުއެއް ކުރިއަށް ގެންދިއުމަކީ އޭރުގެ ބޮޑުވަޒީރު މަހާތީރު މުހައްމަދަށް ވެސް ލިބިވަޑައިގެންނެވި ހާއްސަ އުފަލެކެވެ. މާލޭގައި މަޑުކުރެއްވި ދަތުރުފުޅެއްގައި ސައިޓަށް ވަޑައިގެން އިސްލާމީ މަރުކަޒުގެ މަޝްރޫއުގެ މައުލޫމާތު ވެސް އޭނާ ހޯއްދެވި އެވެ.
އިސްލާމީ މަރުކަޒުގެ މަޝްރޫއުއަށް މާލީ އެންމެ ބޮޑު އެހީތެރިކަމެއް ވެދެއްވީ ބުރުނާއީ އާއި ސައުދީ އަރަބިއްޔާގެ ދެ ރަސްކަލުންނެވެ. ދެން މެލޭޝިއާ އައި ޕާކިސްތާނުގެ އެހީ ވެސް ހިމެނެ އެވެ. ގިނަ އެހީތައް ލިބެމުން އައީ، ހާޖީދާރު ވިދާޅުވި ގޮތުގައި، މަސައްކަތް ކުރިއަށް ދަނިކޮށެވެ. އެހެންކަމުން ފައިސާގެ ދަތިތަކާ ހެދި އެންމެ ފުރަތަމަ ނުކުރަން ނިންމި ބައެއް ކަންކަން ވެސް ފަހުން ފުރިހަމަވި އެވެ. މިސާލަކަށް މިސްކިތުގެ ދެ ފަރާތުގައި އޮންނަ ބޮޑު ހުސް ދެ ބައިގެ ސީލިން އެޅުނީ ފަހުން ފައިސާ ހަމަޖެހުމުންނެވެ.
އިސްލާމީ މަރުކަޒު ނިމުނު އިރު އެއީ ހުރިހާ ގޮތަކުން ވެސް ރީތި އިމާރާތެކެވެ. ރާއްޖޭގެ އެންމެ މަޝްހޫރު ބިނާ އެވެ.
އިސްލާމް ދީން ރަމްޒުކޮށްދޭ ފުރިހަމަ އިމާރާތެއް އަޅުއްވަން މައުމޫން ކުރެއްވި އުއްމީދު ފުރިހަމަވެ، ރަސްމީކޮށް އެތަން ހުޅުވީ 11 ނޮވެމްބަރު 1984ގަ އެވެ. މިއަދަށް 40 އަހަރު ވީ އެވެ.
ކޮމެންޓް