އިޒްރޭލު ޕާސްޕޯޓު މައްސަލަ ތާވަލުކުރީ ސައުދީ ސަމިޓާ ދިމާކޮށް؛ މިއީ ދެފުށް ދެގޮތްކަން: ޔާމީން

އިޒްރޭލު ޕާސްޕޯޓު މަނާކުރަން އިދިކޮޅު އެމްޑީޕީން ހުށަހެޅި ބިލުގެ މަސައްކަތް ރައްޔިތުންގެ މަޖިލީހުގެ ކޮމިޓީން ތާވަލުކުރީ އިޒްރޭލު ފަލަސްތީނު މައްސަލާގައި ބޭއްވި އިސްލާމީ ގައުމުތަކުގެ ސަމިޓާ ދިމާކޮށް ކަންކަން އޮޅުވާލުމުގެ ބޭނުމުގައި ކަމަށް ކުރީގެ ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.

ވީ ކިހިނެއް؟ - އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ބިލެއް ހުށަހަޅުއްވާފައި އޮންނަތާ ފަސް މަސް ފަހުން ފުރަތަމަ ފަހަރަށް އެ ކޮމިޓީގެ ބައްދަލުވުމެއް ބޭއްވީ މިއަދެވެ. ސައުދީގައި ސަމިޓު ކުރިއަށް ގެންދިޔައީ އިއްޔެ އެވެ.

ބުނީ ކީކޭ؟ - ރޭ ބޭއްވި ޕީއެންއެފްގެ ޖަލްސާގައި ވާހަކަދައްކަވަމުން އެ ޕާޓީގެ ލީޑަރު ޔާމީން ވިދާޅުވީ އިޒްރޭލު ޕާސްޕޯޓުގެ މައްސަލަ ކޮމިޓީން ނުފަށައި ފަސް މަސްދުވަހަށް ފަހު އިސްލާމީ ގައުމުތަކުގެ ސަމިޓާ ދިމާކޮށް ތާވަލުކުރުމަކީ އިއްތިފާގެއް ނޫން ކަމަށެވެ.

"ބައިނަލްއަގުވާމީ ކޮންފެރެންސެއް މި އޮތީ ފަލަސްތީނުގެ މައްސަލާގައި. މި ކޮންފެރެންސަށް ރައީސް [މުހައްމަދު މުއިއްޒު] ސައުދީއަށް ވަޑައިގަތީ. މި ބޭފުޅުންގެ ހުންނަ ދެފުށްކެހެރިކަން، މި ތަނަށް ދާތީ މިހާރު ކުއްލިއަކަށް ފަސް މަސް ވަންދެން ހިފަހައްޓާފައި އޮތް އިޒުރޭލު ޕާސްޕޯޓު މައްސަލަ ކުއްލިއަކަށް ކޮމިޓީއަކަށް ދާ ވާހަކަ އިއުލާން ކުރީ،" ޔާމީން ވިދާޅުވި އެވެ.

ޔާމީން ވިދާޅުވީ ކޮމިޓީއެއްގައި އެހާ ގިނަ ދުވަހު ދިރާސާކުރަން ޖެހޭ ކަމެއް މި މައްސަލާގައި ނެތް ކަމަށެވެ. ކޮމިޓީއަކަށް ނުގޮސް ވެސް މިކަން ފަލަސްތީނުގެ ރައްޔިތުންގެ ހައްގުގައި ދިވެހި ސަރުކާރަށާއި ސަރުކާރުގެ މެޖޯރިޓީ އޮތް ރައްޔިތުންގެ މަޖިލީހަށް ނިންމެން ޖެހޭނެ ކަމަށް އެ މަނިކުފާނު ވިދާޅުވި އެވެ.

"މިހާރު [ސައުދީގައި] ފަލަސްތީނުގެ ވާހަކަ ދައްކަން ޖެހޭތީ މޫނު އޮމާންކޮށްލާފައި، މަތި އޮމާންކޮށްލާފައި ރީތިކޮށްލާފައި، މި ބުނަނީ މައްސަލަ ކޮމިޓީއަކަށް ދިޔައީއޭ. އެއީ މި ދެންނެވި ދެފުށް ދެގޮތް ސިފަ،" ޔާމީން ވިދާޅުވި އެވެ.

މީގެ ކުރިން ތުރުކީއަށް ކުރެއްވި ދަތުރަކާ ދިމާކޮށް އެ ގައުމުގެ ރައީސް އުރުދުގާނަކީ އިސްލާމީ އުންމަތުގެ ލީޑަރު ކަމަށް ރައީސް މުއިއްޒު ވިދާޅުވުމަށް ފަހު ސައުދީއަށް ވަޑައިގަތުމުގެ ކުރިން ޖުމްހޫރީ ދުވަހުގެ ރަސްމީ ޖަލްސާގައި ސައުދީގެ ރަސްގެފާނަކީ އިސްލާމީ އުންމަތުގެ ލީޑަރު ކަމަށް ރައީސް ވިދާޅުވުމުން ޔާމީން އެ ކަމަށް ވެސް ވަރަށް ބޮޑަށް ފާޑުވިދާޅުވި އެވެ.

ޔާމީން އެކަން ވެސް ސިފަކުރެއްވީ ރައީސްގެ "ދެފުށް ދެގޮތް" އަމަލުތަކުގެ ބައެއް ގޮތަށެވެ.

"ތުރުކީއަށް ދާންވީމަ ތުރުކީ ނަގާ ޅޮސް އުނދޯއްޔަށް، މިފަހަރު ސައުދީއަށް ވަޑައިގަންނަވާތީ މި ފަހަރު ސައުދީ އިސްލާމީ އުންމަތުގެ ލީޑަރު. މި ހުރީ ދެން ކަންކަން އޮޅުވާލާ ވަރު. ދުނިޔެއަށް ކޮން ކަމެއްތޯ އޮޅުވާލަން މި މަސައްކަތް ކުރަނީ،" ޔާމީން ވިދާޅުވި އެވެ.

އެނގުން މުހިންމު - އެމްޑީޕީން މި ބިލު ހުށަހެޅި ފަހުން، ޖޫންގައި ބޭއްވި ވަޒީރުންގެ މަޖިލީހުގެ ބައްދަލުވުމުގައި ވެސް އިޒްރޭލް މީހުން ރާއްޖެ އެތެރެވުން މަނާ ކުރުމަށްޓަކައި ގާނޫނު އިސްލާހު ކުރުމަށް ސަރުކާރުން ނިންމާފައިވެ އެވެ. އެގޮތަށް އޭރު ނިންމީ ބައެއް އާންމުން މިކަމާ ގުޅިގެން އަޑުއުފުލަމުން ގެންދިޔުމުންނެވެ.

އޭގެ ފަހުގައި ބަންޑާރަ ނައިބު އަހުމަދު އުޝާމް ސަރުކާރުގެ ލެޖިސްލެޓިވް އެޖެންޑާ އިއުލާންކުރެއްވުމަށް ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ ބިލުއޮތް ގޮތަށް އިޒުރޭލު ޕާސްޕޯޓު އޮތް ކޮންމެ މީހަކު ރާއްޖެ އެތެރެނުވެވޭ ގޮތަށް ގާނޫނު ބަދަލު ކުރުމުގެ ކުރިއަށް ވިސްނަން ޖެހޭ ގިނަ ކަންކަން އެބަހުރި ކަމަށެވެ.