ޝަރީއަތް ނިމެންދެން ބަންދުކޮށްފައި ހުރި ލަމްހާ ބަންދުން ދޫކޮށްލައިފި

އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާގެ މަރުގެ މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލަން ކްރިމިނަލް ކޯޓުން މިއަދު އަމުރުކޮށްފި އެވެ.

ވީ ކިހިނެއް؟ - ޝަރީއަތް ނިމެންދެން ބަންދުކޮށްފައި ވަނިކޮށް ލަމްހާ ފުރަތަމަ ބަންދުން ދޫކޮށްލާފައިވަނީ މިދިޔަ އަހަރުގެ ނޮވެމްބަރުގަ އެވެ. އެކަމަކު އޭނާ އަލުން ބަންދުކުރަން އެ އަހަރުގެ ޑިސެމްބަރު މަހު ހައި ކޯޓުން އަމުރުކުރުމާ ގުޅިގެން އޭނާ މިއަދާ ހަމައަށް ހުރީ ޝަރީއަތް ނިމެންދެން ބަންދުކޮށްފަ އެވެ.

އެ މައްސަލައިގެ ޝަރީއަތް ލަސްވެ ހައްގުތަކަށް ހުރަސްއެޅެމުންދާ ކަމަށް ބުނެ މިދިޔަ ބުރާސްފަތި ދުވަހު އޮތް އަޑުއެހުމުގައި އޭނާ ވަނީ ޝަރުތުތަކާ އެކު ނަމަވެސް ބަންދުން ދޫކޮށްލަން އެދިފަ އެވެ.

ބުނީ ކީކޭ؟ - މިއަދު 10 ޖެހިއިރު އަޑުއެހުން ބޭއްވީ ބަންދު މުރާޖައާ ބެހޭ ގޮތުން ގޮތެއް ނިންމުމަށެވެ. މި އަޑުއެހުމުގައި ގާޒީ ހުސެއިން ފާއިޒް ރަޝާދު ނިންމެވީ ޝަރުތުތަކާ އެކު ލަމްހާގެ ބަންދަށް ލުއި ދިނުމަށެވެ. އެގޮތުން ގާޒީ ނިންމެވީ ތިން މަސް ދުވަހުގެ މުއްދަތަކަށް ބަންދުން ދޫކޮށްލުމަށެވެ.

އޭނާ ބަންދުން ދޫކޮށްލާފައި ހުންނަ މުއްދަތުގައި ޒަރޫރީ ބޭނުމެއް ނޫން ގޮތަކަށް ގޭން ބޭރަށް ނުނިކުތުމަށާއި ކޮންމެހެން ނުކުންނަން ޖެހިއްޖެ ނަމަ ފުލުހުންގެ ފަރާތުން ހުއްދަ ހޯދަން ގާޒީ ވަނީ އަމުރުކޮށްފަ އެވެ.

އެގޮތަށް ގާޒީ ނިންމެވި ސަބަބެއް ކަމަށް ވިދާޅުވީ ދައުލަތުގެ ގިނަ ހެކިންތަކެއްގެ ހެކިބަސް ނެގިފައިވާތީ އާއި ބާކީ ތިބި ހެކިންނަކީ ބަންދުން ދޫކޮށްލިޔަސް ހެއްކަށް ނުފޫޒު ފޯރުވުމުގެ ފުރުުސަތު ކުޑަ ހެކިތަކަކަށް ވުމުންނެވެ.

ލަމްހާ ބަންދުން ދޫކޮށްލި ޝަރުތުތަކަކީ:

ފާހަގަކޮށްލެވޭ ކަމެއް - ލަމްހާ ބަނދުން ދޫކޮށްލާފައި މިވަނީ އޭނާގެ ފުށުން މުޖުުތަމައުއަށް އޮތް ނުރައްކާ ކުޑަނުވާ ކަމަށް ބުނެ ބަންދުން ދޫކޮށްލަން ދައުލަތުން އިއުތިރާޒް ކޮށްފައި ވަނިކޮށެވެ. 

އެނގުން މުހިންމު - 19 އޮކްޓޫބަރު 2021ގައި މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީ އޭނާގެ ފިރިމީހާ އާއި ފިރިމީހާގެ ލޯބިވެރިޔާ ކަމަށް ބުނާ ލަމްހާ ގުޅިގެން މަރާލި ކަމަށް ދައުލަތުން ތުހުމަތު ކުރަނީ މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެންނެވެ. 

މި މައްސަލާގައި މާވިންގެ މައްޗަށް ގަސްތުގައި މީހަކު މަރާލިކަމުގެ ދައުވާކޮށްފައިވެ އެވެ. އެ މަރުގައި އެހީތެރިވެދިނުމުގެ ދައުވާއާއެކު ލަމްހާގެ މައްޗަށް ތިން ދައުވާ އެެއް ކުރެ އެެވެ.