15 އޮގަސްޓު 2023، މޭރީ މަރުގެ މައްސަލާގެ އަޑުއެހުމުގައި، ދައުވާ ލިބޭ ހަލީމަތު ލަމްހާ އަބްދުއްރަހުމާން
ނަރުހުގެ މަރުގައި ބައިވެރިވި ކަމަށް ބުނާ ލަމްހާ ބަންދުން ދޫކޮށްލައިފި
އައިޖީއެމްއެޗުގައި މަސައްކަތް ކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް އޮނެޑް ޕިނެޑާ (މޭރީ)ގެ މަރުގެ މައްސަލާގައި ދައުވާ ލިބޭ ހަލީމަތު ލަމްހާ އަބްދުއްރަހްމާނު ބަންދުން ދޫކޮށްލުމަށް ކްރިމިނަލް ކޯޓުން މިއަދު އަމުރުކޮށްފި އެވެ.
ވީ ކިހިނެއް؟ - މިއަދު އޮތް އަޑުއެހުމުގައި ދައުލަތުގެ ފަރާތުން ހާޒިރުކުރަން އޮތް ހެކި ހާޒިރުކުރުމަށް އިތުރު ވަގުތު ބޭނުންވާތީ ހެކިބަސް ނެގުން ކުރިއަށް ގެންގޮސްފައެއް ނުވެ އެވެ. ދެން މިއަދު އޮތީ ބަންދުން ދޫކޮށްލުމަށް ލަމްހާގެ ފަރާތުން އެދިފައިވާ އެދުމާ ގުޅޭ ގޮތުން ގޮތެއް ނިންމުމެވެ.
ތަފްސީލް - މި މައްސަލަ ބައްލަވާ ގާޒީ ހުސެއިން ފާއިޒް ރަޝާދު ވިދާޅުވީ، ލަމްހާ ބަންދުން ދޫކޮށްލަން ނިންމެވީ މިހާތަނަށް އައިރު ގިނަ ބައެއްގެ ހެކިބަސް ނަގާފައިވުމާއި ޝަރީއަތް ދިގުލައިގެން ގޮސްފައިވާތީ އެވެ.
އެހެންކަމުން، ތިން މަސްދުވަހުގެ މުއްދަތަކަށް ވަގުތީ ގޮތުން އޭނާ ބަންދުން ދޫކޮށްލަން ގާޒީ ވަނީ އަމުރުކުރައްވާފަ އެވެ.
ލަމްހާ އެދިފައި ވަނީ، މޮނިކޮން އަމުރެއްގެ ދަށުން ފައިގައި ޓެގު އަޅުވައި ހަރުކަށި ޝަރުތުތަކާ އެކު ވިޔަސް ގޭބަންދަށް ދޫކޮށްދިނުމަށެވެ. ނަމަވެސް، މޮނިކޮން އަމުރެއް ނެރުމަށް ކޯޓުން މިއަދު ނިންމާފައެއް ނުވެ އެވެ.
އޭނާ ބަންދުން ދޫކޮށްލަން އަމުރު ކޮށްފައިވަނީ ޝަރުތުތަކާ އެކު އެވެ. އެ ޝަރުތުތަކަކީ:
-
ރޭގަނޑު 10 އިން ހެނދުނު 10އަށް ގޭންބޭރަށް ދިއުން މަނާވުން
-
މާލޭން ބޭރަށް ދާ ނަމަ، ކޯޓުގެ ހުއްދަ ހޯދުން
-
ކޯޓަށް ހާޒިރުވާން އަމުރު ލިބިފައިވާ ނަމަ، ކޯޓަށް ހާޒިރުވުން
އެ ޝަރުތުތަކާ މެދު އެއްވެސް މައްސަލައެއް ނެތް ކަމަށް ލަމްހާ މިއަދު ކޯޓުގައި ވަނީ ބުނެފަ އެވެ.
ބުނީ ކީކޭ؟ - ލަމްހާ ބަންދުން ދޫކޮށްލުމާ ބެހޭ ގޮތުން ދައުލަތުގެ ވަކީލު އައިމިނަތު ޝާމާ ވިދާޅުވީ، ޓެގު އަޅުވާފައި ދޫކުރުމަކީ ޖިނާއީ އިޖުރާއަތުގެ ގާނޫނު ދަންނަ ކަމެއް ނޫން ކަމަށެވެ. އަދި ހާއްސަކޮށް ގަސްތު މަރުތަކުގައި ކަފާލާތުގެ ދަށުން ވެސް ދޫކޮށް ނުލެވޭނެކަން އޭނާ ފާހަގަކުރެއްވި އެވެ.
މީގެ އިތުރުން، އެންމެ ފުރަތަމަ ދުވަހު ލަމްހާއާ ދެކޮޅަށް ހުށަހެޅި ހެކިތައް އެގޮތަށް ހުރެ، ގިނަ ކިތާބީ ހެކިތަކެއް ވެސް ހުރުމުންނާއި ހެކިވެރިންގެ ހެކިބަހުން ވެސް ކުރެވޭ ތުހުމަތު ބަދަލުވެފައި ނުވާތީ އަދި ހެކިންނަށް ނުފޫޒު ފޯރުވުމުގެ އިހުތިމާލު އޮތުމުން ބަންދު މުރާޖައާކޮށް، ބަންދުން ދޫކޮށްލުމަށް ނުފެންނަ ކަމަށް ދައުލަތުން ބުންޏެވެ.
ގާޒީ ހުސެއިން ފާއިޒް ރަޝާދު ވިދާޅުވީ، އޭނާ ބަންދުން ދޫކޮށްލަން ބޭނުން ނުވަނީ ހެއްކަށް ނުފޫޒު ފޯރުވާފާނެތީ ކަަމަށް ދައުލަތުން ބުންޏަސް، މީގެ ކުރީގެ ބަންދު އަމުރުގައި ވެސް އެ ވާހަކަ ފާހަގަކޮށްފައި ނުވާ ކަމަށެވެ. ކުރީގެ ބަންދު އަމުރުތަކުގައި އޮތީ މުޖުތަމައުއަށް ނުރައްކާވެދާނެތީ ބަންދުގައި ބަހައްޓަން ކަމަށް ގާޒީ ވިދާޅުވި އެވެ.
ބަންދުން ދޫކޮށްލަން ގާޒީ ނިންމެވި ސަބަބުތަކުގެ ގޮތުގައި ފާހަގަކުރެއްވީ:
-
ޝަރީއަތް ކުރެވޭނެ މަގު ތަނަވެސްވެފައި ނުވުން
-
ހެކިން ހާޒިރު ކުރުމުގައި ދައުލަތަށް ދަތިތަކެއް ހުރުން
-
މައްސަލައިގެ ޝަރީއަތް ހީކުރި ވަރަށް ވުރެ ދިގުލައިގެން ގޮސްފައިވުން
އެނގުން މުހިންމު - 19 އޮކްޓޫބަރު 2021ގައި މއ. އުދުހޭކޮކާގޭގެ ފުރަތަމަ ފަންގިފިލާގައި ދިރިއުޅެމުން އައި މޭރީގެ ބޮލާއި ކަރަށް ހަމަލާދީގެންނާއި ނޭވާ ހާސްކޮށްލައިގެން މަރާލާފައިވާ ކަމަށް ބުނާ މައްސަލާގައި ލަމްހާގެ އިތުރުން މޭރީގެ ފިރިމީހާ މާވިންގެ މައްޗަށް ވެސް ދައުވާ ވަނީ އުފުލައިފަ އެވެ.
މާވިންގެ ލޯބިވެރިޔާ ކަމަށް ބުނާ ލަމްހާގެ މައްޗަށް ތިން ދައުވާ އެެއް ކުރެ އެެވެ. އެއީ:
-
އެނގި ހުރެ މީހަކު މެރުމުގައި ބައިވެރިވުން - ދައުލަތުން ކޮށްފައިވާ ދައުވާގައިވާ ގޮތުން، މޭރީ މަރާލާފައިވަނީ މާވިން އާއި ލަމްހާ ދުރާލާ ރާވައިގެން އަދި މޭރީ މަރާލުމަށް މާވިންއަށް ލަމްހާ އެހީތެރިވެދީފައިވޭ
-
ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުން - ދައުލަތުން ކޮށްފައިވާ ދައުވާގައިވާ ގޮތުން މޭރީ މަރާލުމަށް ދުރާލާ ތައްޔާރުވެ، އައިޖީއެމްއެޗުން ބޭރުކުރުން މަނާ ކޮންޓްރޯލް ބޭސްތަކެއް ލަމްހާ ގެއަށް ގެންގޮސްފައިވޭ؛ އެ ތަކެތި ލަމްހާގެ ކޮޓަރި ތެރެއިން ފެނިފައިވާ ކަމަށް ދައުލަތުން ބުނޭ
-
އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާ
-
ދައުވާތައް ސާބިތުވެއްޖެ ނަމަ، ދެ މީހުންނަށް ވެސް މަދުވެގެން 10 އަަހަރުގެ ޖަލު ހުކުމެއް އަންނާނެ
ކޮމެންޓް (3)
ފިރާގު
ނަރުހުން
ރިހާކުރުސޭޓު