ބިލު ކޮމިޓީގައި އިތުރަށް ދިރާސާ ކުރާތީ މި މަހު 15ގައި ވޭޕް އެތެރެކުން މަނާ ނުކުރެވިދާނެ

މި މަހު 15ގެ ފަހުން ރާއްޖެއަށް ވޭޕް އެތެރެ ކުރުން މަނާ ކުރުމަށް ސަރުކާރުން ގާނޫނަށް ހުށަހަޅާއިވާ އިސްލާހު ގެނައުމުގެ ބިލު، އިތުރަށް ދިރާސާ ކުރަން ބޭނުންވާތީ މަޖިލީހުގެ ކޮމިޓީން މުއްދަތު އިތުރު ކޮށްފި އެވެ. އެއާ އެކު، ސަރުކާރުން ނިންމާފައިވާ މުއްދަތުގައި ވޭޕް އެތެރެކުރުން މަނާ ނުވުމުގެ ފުރުސަތު އެބަ އޮތެވެ.

ވީ ކިހިނެއް؟ - ދުންފަތް ކޮންޓްރޯލް ކުރުމުގެ ގާނޫނަށް ސަރުކާރުގެ ފަރާތުން ހުށަހެޅި ބިލު ދިރާސާ ކުރަމުންދާ އިޖްތިމާއީ ކޮމިޓީގެ އިއްޔެގެ ބައްދަލުވުމުގައި ނިންމީ އެ ބިލުގެ މަސައްކަތް ނިންމާނެ ސުންގަޑި މި މަހު 21އަށް އިތުރު ކުރުމަށެވެ. މި ބިލު މި މަހު 15ގެ ކުރިން ތަސްދީގު ކުރަން ޖެހޭތީވެ، ކޮމިޓީން މީގެ ކުރިން ސުންގަޑި ކަނޑައަޅާފައި ވަނީ މާދަމާއަށް ނިންމުމަށެވެ.

ތަފްސީލު - ސަރުކާރު ހިންގާ ޕީއެންސީގެ ފުރިހަމަ ކޮންޓޯލް އޮންނަ އިޖްތިމާއީ ކޮމިޓީގެ އިއްޔެގެ ބައްދަލުވުމުގައި މި ބިލުގެ ސުންގަޑި އިތުރު ކުރުމަށް މަޝްވަރާއަށް ހުޅުވާލެއްވީ އެ ކޮމިޓީގެ މުގައްރިރު، މާފަންނު މެދު ދާއިރާގެ ޕީއެންސީ މެންބަރު އަސްމާ ރަޝީދެވެ.

އެ މަޝްވަރާއަށް ހުޅުވާލުމުން، މާފަންނު ހުޅަނގު ދާއިރާގެ ޕީއެންސީ މެންބަރު މުހައްމަދު މުސްތަފާ އިބްރާހިމް ވިދާޅުވީ، ބިލު އަދިވެސް ދިރާސާ ކުރަން ވަގުތު ދޭން ޖެހޭ ކަމަށެވެ. ސަބަބެއް ކަމަށް އޭނާ ވިދާޅުވީ، ބިލު މިހާރު އޮތް ގޮތުން "ހާސިލް ކުރަން ބޭނުންވާ އަސްލު މަގްސަދު ހާސިލު ނުވެދާނެތީ" ކަމަށެވެ. ނަަމަވެސް އޭގެ ތަފްސީލަކަށް އޭނާ ވަޑައެއްނުގަންނަވަ އެވެ.

އެ ކޮމިޓީގައި އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ހަމައެކަނި މެންބަރު، ގަލޮޅު އުތުރު ދާއިރާގެ މުހައްމަދު އިބްރާހިމް (ކުޑޫ) ވިދާޅުވި ގޮތުގައި، މިދިޔަ ހޯމަ ދުވަހު ބޭއްވި ކޮމިޓީގެ ބައްދަލުވުމުގައި ހެލްތު މިނިސްޓްރީ އާއި އެޗްޕީއޭ އަދި ފުލުހުންގެ ފަރާތުން ވެސް ބިލާ ގުޅޭ ގޮތުން ވަރަށް ބޮޑެތި ކަންބޮޑުވުންތައް ފާހަގަކޮށްފައިވެ އެވެ. އެހެންވެ، އޭނާ ވެސް އެދިވަޑައިގެންނެވީ ބިލު ދިރާސާ ކުރުމަށް އިތުރު ވަގުތު ދިނުމަށެވެ.

"ހާއްސަކޮށް ފަހަގަކޮށްލެވުނު އެ ބޭފުޅުން [ކޮމިޓީއަށް ވަޑައިގެންނެވި މުއައްސަސާތަކުން] ބިލަށް ނުލާ ބައެއް އެއްޗެހި އެބަހުރި ބިލަށް ލާފައި ވެސް. އަޅުގަނޑުމެންނަށް އެޗްޕީއޭ ވެސް މިހާރު އެބަހުރި މިއަށް އިސްލާހުތަކެއް ލިބިފައި. ފުލުހުން އެބަ ވިދާޅުވޭ މީގައި ހުރި ކަންތައްތައް ތަންފީޒު ކުރުމަށް އިޝޫޒްތަކެއް އެބަހުރި ކަމަށް،" މި ބިލު އާންމުންގެ ހިޔާލަށް ވެސް ހުޅުވާލާފައި އޮތްކަން ފާހަގަކުރައްވައި މުހައްމަދު އިބްރާހިމް ވިދާޅުވި އެވެ.

ބިލު އިތުރަށް ދިރާސާ ކުރުމުގައި ކެފޭ އަދި ރެސްޓޯރެންޓް ފަދަ ތަންތަން ހިންގާ ވިޔަފާރިވެރިންނާ ވެސް ވާހަކަ ދެއްކުމަށް އޭނާ އެދިވަޑައިގެންނެވި އެވެ.

ޖުމްލަ 23 މިނެޓަށް ދިގު ދެމިގެން ދިޔަ ކޮމިޓީ ބައްދަލުވުމުގެ ބޮޑު ބައެއް ދެން ދިޔައީ ނުރަސްމީ ބައިގައި މަޝްވަރާ ކުރުމަށެވެ.

ނުރަސްމީ ބައިގައި މެންބަރުން މަޝްވަރާ ކުރެއްވުމަށް ފަހު، މި މަހު 21އަށް ބިލުގެ މަސައްކަތް ނިންމަން ހުށަހެޅުއްވީ މެންބަރު މުސްތަފާ އެވެ. އަދި އެ ހުށަހެޅުމަށް ތާއީދު ކުރެއްވީ މެންބަރު މުހައްމަދު އިބްރާހިމް އެވެ.

އެ ހުށަހެޅުން ހުށަހެޅި ފަހުން ވެސް ފަސް ވަރަކަށް މިނެޓު މެންބަރުން ވަނީ ނުރަސްމީކޮށް މަޝްވަރާ ކުރައްވާފަ އެވެ. އަދި އެންމެ ފަހުން، މި ހުށަހެޅުން ކޮމިޓީގެ އިއްތިފާގުން ފާސްވިކަން ރިޔާސަތުގައި އިންނެވި އަސްމާ އިއުލާން ކުރެއްވި އެވެ. އެއަށް ފަހު، އެ ކޮމިޓީގެ ބައްދަލުވުން ނިންމާލި އެވެ.

ފާހަގަކޮށްލެވޭ ކަމެއް - ބިލުގެ މަސައްކަތް ދިގު ދަންމާލަން ނިންމިއިރު، ރައީސް މުހައްމަދު މުއިއްޒު މިދިޔަ މަހު އިއުލާން ކުރެއްވީ މި މަހު 15 އިން ފެށިގެން ވޭޕް ރާއްޖެ އެތެރެ ކުރުން މަނާކޮށް، އަންނަ މަހުގެ 15 އިން ފެށިގެން ވޭޕް ބޭނުން ކުރުމާއި ވިއްކުން މަނާ ކުރުމަށެވެ. ބިލު ލަސްވުމާ ގުޅިގެން މި ތާރީހުތަކަށް ބަދަލު އައުމަކީ އެކަށީގެންވާ ކަމެވެ.

ސަރުކާރުން އެ ނިންމުން ނިންމާފައި ވަނިކޮށް، ވޭޕް ހިމެނޭ ގޮތަށް ދުންފަތުގެ ބާވަތްތަކުގެ ޑިއުޓީ ބޮޑު ކުރުމަށް ވެސް މަޖިލީހަށް ހުށަހަޅައިގެން އެ ބިލު މިހާރު ވަނީ ތަސްދީގުކޮށްފަ އެވެ. އެއާ އެކު، މިދިޔަ ހުކުރު ދުވަހުން ފެށިގެން އެ ތަކެތީގެ އަގު ވަނީ ބޮޑުވެފަ އެވެ.

ސަރުކާރުން ބުނެފައިވާ ގޮތުން ވޭޕް ހިމަނައިގެެން ޑިއުޓީ ބޮޑު ކުރަން ހުށަހެޅީ މި މަހު 15ގައި ވޭޕް މަނާ ކުރަންދެން ޑިއުޓީ ބޮޑު ކުރުމުގެ ބޭނުމުގަ އެވެ.