ރައީސް މިނިވަން މުއައްސަސާތަކުގެ ވެރިން އައްޔަނު ކުރާ އިސްލާހަކީ މުއައްސަސާތަކުން ހުށަހެޅި ކަމެއް: ހަބީބު

އިލެކްޝަންސް ކޮމިޝަން (އީސީ) އާއި އެންޓި ކޮރަޕްޝަން ކޮމިޝަން (އޭސީސީ)ގެ ރައީސް އައްޔަނުކުރުމުގެ ބާރު ރައީސަށް ދޭ ގޮތަށް ގާނޫނަށް ގެންނަ އިސްލާހަކީ މިދިޔަ އަހަރު އެ މުއައްސަސާތަކާއި ހިޔުމަން ރައިޓްސް ކޮމިޝަން (އެޗްއާރުސީއެމް) އަދި ސިވިލް ސާވިސް ކޮމިޝަން (ސީއެސްސީ) އިން ރައީސަށާއި މަޖިލީހަށް އަދި އެޓާނީ ޖެނެރަލްއަށް ހުށަހަޅާފައި އޮތް ކަމެއް ކަމަށް އެޗްއާރުސީއެމްގެ މެންބަރު އަދި އިލެކްޝަންސް ކޮމިޝަނުގެ ކުރީގެ ނައިބު ރައީސް އިސްމާއިލް ހަބީބު މިރޭ ވިދާޅުވެއްޖެ އެވެ.

ވީ ކިހިނެއް؟ - އޭސީސީ އާއި އީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސަށް ލިބޭ ގޮތަށް އޭސީސީގެ ގާނޫނާއި އީސީގެ ގާނޫނަށް އިސްލާހު ގެނައުމަށް ދެ ބިލެއް ސަރުކާރުގެ ފަރާތުން ރައްޔިތުންގެ މަޖިލީހަށް ވަނީ ހުށަހަޅައިފަ އެވެ.

އެ އިސްލާހުތަކަށް އިދިކޮޅުގެ ފާޑުކިޔުން އަމާޒުވެފައިވަނިކޮށް ރައީސް މިރޭ އެކްސްގައި ކުރެއްވި ޕޯސްޓެއްގައި ވިދާޅުވީ މިނިވަން މުއައްސަސާއެއްގެ ތެރެއަށް ނުފޫޒު ފޯރުވުމަކީ އެމަނިކުފާނު އެއްވެސް އިރަކު ކުރެއްވި ކަމެއް ނޫން ކަމަށާއި އެފަދަ ކަމެއް ނުކުރައްވާނެ ކަމަށެވެ.

އެމަނިކުފާނު މަސައްކަތް ކުރައްވާނީ އެފަދަ ފަރާތްތަކުން އަދުލުވެރިކަމާއި އިންސާފާއި ހަމަހަމަކަމާ އެކު، ވަކި މީހަކަށް ބެލުމެއްނެތި ހަލުވި ދުވެލީގައި މަސައްކަތްކުރަމުން ދޭތޯ ކަށަވަރުކުރެއްވުމަށް ވެސް ރައީސް ވިދާޅުވި އެވެ.

ތަފްސީލް - މަޖިލީހަށް ހުށަހަޅާފައިވާ އިސްލާހުތަކާ ގުޅޭގޮތުން ހަބީބު އެކްސްގައި ވިދާޅުވީ އެއީ މިނިވަން މުއައްސަސާތަކުން މިދިޔަ އަހަރު ރައީސަށާއި އެޓާނީ ޖެނެރަލްގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް ހުށަހެޅި ކަރުދާހެއްގައި ހިމެނޭ ކަމެއް ކަމަށެވެ.

"އެއީ ދުނިޔޭގެ ކުރިއަރާފައިވާ އެމެރިކާ ފަދަ ގައުމުތަކުން ވެސް އެކަން ކުރަމުން އަންނަ ގޮތް،" އޭނާ ވިދާޅުވި އެވެ.