އޭސީސީގެ އިސްލާހު ފާސްކޮށްފި ނަމަ ރައީސްގެ ހިޔާނާތެއް ނުބެލޭނެ: އެމްޑީޕީ މެންބަރުން

އެންޓި-ކޮރަޕްޝަން ކޮމިޝަން (އޭސީސީ)ގެ ގާނޫނަށް ގެންނަން ހުށަހަޅާފައިވާ އިސްލާހުތައް ފާސްކޮށްފި ނަމަ ރައީސްއާ ގުޅުންހުރި މައްސަލަތައް ނުބެލޭނެ ކަމަށް މަޖިލީހުގައި ތިއްބަވާ އިދިކޮޅު އެމްޑިޕީގެ މެންބަރުން މިއަދު ވިދާޅުވެއްޖެ އެވެ.

ވީ ކިހިނެއް؟ - އޭސީސީގެ ރައީސް އާއި ނައިބު ރައީސް އައްޔަންކުރުމުގެ ބާރު ރައީސަށް ލިބޭ ގޮތަށް ގެންނަ އެ އިސްލާހު ސަރުކާރުގެ ފަރާތުން ހުށަހެޅީ ފެލިދޫ ދާއިރާގެ މެންބަރު އާދަމް ޒާހިރު އެވެ. އެ އިސްލާހަށް މިއަދުގެ މަޖިލީހުގައި ވަނީ އިބްތިދާއީ ބަހުސް ކުރިއަށް ގެންގޮސްފަ އެވެ.

ތަފްސީލް - އެ ބަހުސްގައި ވާހަކަ ދައްކަވަމުން ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ މިނިވަން މުސްތަގިއްލު ކޮމިޝަންތަކެއްގެ ގޮތުގައި އޭސީސީ އާއި އިލެކްޝަންސް ކޮމިޝަން (އީސީ) ހިމަނާފައިވަނީ މަގުސަދެއް އޮތުމުން ކަމަށެވެ. 

އޭސީސީގެ ރައީސް އައްޔަންކުރާ ފަރާތަކީ ރައީސަށް ވެއްޖެ ނަމަ، މައްސަލަތައް ބަލާއިރު ރައީސަށް "ބަލައިލަން" ޖެހޭ ކަހަލަ ގޮތަކަށް ބަދަލުވެގެންދާނެ ކަމަށް އޭނާ ވިދާޅުވި އެވެ.

"އެ [އެންޓި-ކޮރަޕްޝަން ކޮމިޝަން] ކޮމިޝަންގެ ބާރު ރައީސުލްޖުމްހޫރިއްޔާ ނެންގެވީމަ، ދެން އިއްޒަތްތެރި ރައީސް އެއްވެސް މައްސަލައެއް ސަރުކާރާ ދެކޮޅަށް އެއިރެއްގައި އޮންނަ ސަރުކާރާ ދެކޮޅަށް ނުވަތަ ރައީސުލްޖުމްހޫރިއްޔާއާ ދެކޮޅަށް ހުށަހެޅޭ މައްސަލަތަކެއް ނުބެލޭނެ،" މައުރޫފް ވިދާޅުވި އެވެ.

މައުރޫފް ވިދާޅުވީ އެ ކޮމިޝަންތަކަށް އައްޔަންކުރާ ފަރާތްތަކަކީ މަގާމް ދަމަހައްޓަން ގިނަ ކަންތައްތަކެއް ކުރާ ބައެއް ކަމަށެވެ.

"މިއިން އެއްވެސް ކޮމިޝަނަކަށް އައްޔަންކޮށްފައިވާ ފަރާތެއް އެ މަގާމު ގެއްލޭކަށް ބޭނުމެއް ނުވޭ. އަޅުގަނޑުމެންނަށް ފެނިގެން މިދިޔައީ މިދިޔަ ސަރުކާރު ނިމެމުން ދިޔައިރު އޭސީސީ ނިދާފައި އޮވެފއި އެކްޓިވް ވެގެން އުޅުނު ގޮތް. ފްލެޓްތައް ބަދަލުކޮށްލީ، ބާތިލްކޮށްލީ އެތައް ކަމެއް ކުއްލިއަކަށް އޭސީސީން ކުރައްވަން ފައްޓަވައިފި. އަމިއްލައަށް ރައްޔިތުންގެ މަޖިލީހަށް ވަޑައިގެން މަޖިލީހުން ދައުވަތެއް ނުދެއްވަނީސް ވަޑައިގެން އެކިކަހަލަ ޝަކުވާތައް މަޖިލިސް ދޮށުގައި ކުރައްވަން ފަށައިފި. މީގެ ބޭނުމަކީ މި ސަރުކާރުގައި މަގާމުގައި ދެމިހުރުން،" އޭނާ ވިދާޅުވި އެވެ.

"އަޅުގަނޑުމެންނަށް މިފެންނަނީ މަގާމް އެ ފަރާތްތަކުން ވަރަށް ބޭނުންވެޔޭ. އެ މަގާމުގެ ކޮންޓްރޯލް ރައީސުލްޖުމްހޫރިއްޔާގެ އަތްމައްޗަށް ދިޔައީމަ މިފަދަ ތަންތަނަށް ހުށަހެޅޭ މައްސަލަތައް ބެލުމުގައި މިފަދަ ތަންތަނުން ރައީސުލްޖުމްހޫރިއްޔާއަށް ބައްލަވަން ޖެހޭ ކަހަލަ ގޮތަކަށް މިބަދަލުތައް ގެނެވެމުން މިދަނީ."

އެ ބަހުސްގައި ވާހަކަ ދައްކަވަމުން އެމްޑީޕީގެ ޕީޖީ ލީޑަރު، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވިދާޅުވީ އޭސީސީގެ ގާނޫނަށް ހުށަހަޅާފައިމިވާ އިސްލާހަކީ ސަރުކާރުގެ ހިޔާނާތުގެ ވާހަކަ ދެއްކުމުގެ ފުރުސަތު ނުދޭން ގެންނަ ބަދަލެއް ކަމަށެވެ.

"މާޒީވި ސަރުކާރުތަކުގެ ވާހަކަ ދައްކައިފި މި ތަނުގައި. ފަސް އަހަރު ނިމިދިޔައިރު 4.2 ބިލިއަން ރުފިޔާގެ ވާހަކަ އެ ދެއްކީ މިއީ 6.9 ބިލިއަން ރުފިޔާ އަދި މިއުޅެނީ އަހަރު ނުފުރިގެން. ފަސް އަހަރު ނިމިދާއިރު މިކަހަލަ ކިތައް ބިލިއަންތޯ ރައްޔިތުން އަތުން ކާލާނީ. މިއީ އަޅުގަނޑުމެން ދައްކަން ޖެހޭ ވާހަކަ، އުފައްދަން ޖެހޭ ސުވާލު. މިވާހަކަ ނުދެއްކެނޭ މަގުން ކަންތައްތައް ކުރަން އޭސީސީއަށް ގެންނަ ބަދަލުތަކާއި އިލެކްޝަންސް ކޮމިޝަނަށް ގެންނަ ބަދަލާއި ހުރިހާ ބަދަލެއް ގެންނަނީ،" ހޯމް މިނިސްޓަރު އަލީ އިހްސާން މަޖިލީހުގެ އިއްޔެ ޖަލްސާއަށް ހާޒިރުކޮށް މެންބަރުން ކުރެއްވި ސުވާލަކަށް ދެއްވި ޖަވާބަކާ ގުޅުވައި ނާޒިލް ވިދާޅުވި އެވެ.

އެ ބިލަށް ވާހަކަ ދައްކަވަމުން ގަލޮޅު ދެކުނު ދާއިރާގެ މެންބަރު މީކާއިލް ނަސީމް ވިދާޅުވީ އެއީ އެތައް ޒަމާނެއް ވަންދެން އެތައް ބަޔަކު ކުރި ބުރަ މަސައްކަތުން ގެނައި ތިން ބާރު ވަކިވެފައިވާ ޑިމޮކްރެޓިކް ނިޒާމެއް ހަލާކުކޮށްލަން ފަހަތަށް އަޅާ ފިޔަވަޅެއް ކަމަށެވެ.

"އަޅުގަނޑު ގަބޫލުކުރާ ގޮތުގައި އިސްލާހު މި ބަސް ވެސް މި ބިލަށް ކިއުން ރަނގަޅެއް ނޫން. އިއްޒަތްތެރި ރައީސް، އިސްލާހަކީ ކުރިއަށް އެޅޭ ފިޔަވަޅެއް. އިސްލާހަކީ ރަނގަޅަކަށް ގެނެވޭ ބަދަލެއް،" މީކާއިލް ވިދާޅުވި އެވެ.

މި ބިލަކީ ހަމައެކަނި ބިލެއް ނޫން ކަމަށާއި މިއީ ރައީސް ބޭނުންވާ ގޮތަށް ކަންތައް ނުކުރާ ނަމަ، މަގާމުން ވަކިކުރާނެ އަންގާ ސިގްނަލެއް ކަމަށް މީކާއީލް ސިފަކުރެއްވި އެވެ.

"2024 ވަނަ އަހަރު އަޅުގަނޑު ލަދުގަނޭ 20 ވަނަ ރައްޔިތުންގެ މަޖިލީހުގައި، އަނެއްކާވެސް އިއްޒަތްތެރި ރައީސް، މީގެ 90ގެ އަހަރުތަކުގެ ތެރޭގައި ރައްޔިތުންގެ މަޖިލީހަށް ހުށަހެޅޭ ފަދަ ބިލުތައް އަނެއްކާވެސް މި މަޖިލީހަށް ހުށަހެޅޭ ކަމީ ހަމަ ލަދުވެތިކަމެއް،" 2014 އިން 2019އަށް ވެސް އޭރުގެ މަޖިލީހުން އެފަދަ ބިލުތައް މަޖިލީހަށް ހުށަހަޅައިގެން ކުރިއަށް ގެންދިޔަކަން ފާހަގަކުރައްވަމުން މީކާއިލް ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި މިއަދު މި ހުށަހެޅޭ އިސްލާހަކީ ހަމައެކަނި ބިލެއް ނޫން. މިއީ ސިގްނަލެއް، އޭސީސީއަށް ވެސް އަދި އެހެން މިނިވަން މުއައްސަސާތަކަށް ވެސް ރައީސް [މުހައްމަދު] މުއިއްޒު ފޮނުއްވާ ސިގްނަލެއް. ތިމަންނާ ބޭނުން ގޮތަށް ތިތަންތަނުން ތި މުއައްސަސާތަކުން އަމަލުނުކުރާ ކަމަށް ވަންޏާ ކަނޑާލާނަމޭ. މިއީ ފުރަތަމަ ފިޔަވަހި. އާދޭސްކޮށްފާ މި ދަންނަވަނީ ތިހައްދަވަނީ ގޯހޭ. ޑިމޮކްރެސީއާ މިހާ ބީރައްޓެހި މިގޮތަށް ފަހަތަށް އެޅޭ ފިޔަވަޅުތަކުގައި ރައްޔިތުން އިންތިހާބްކޮށްފައި ތިބި މެންބަރުން މިކަމަށް އެއްބާރުލުން ނުދިނުމަށް އަޅުގަނޑު ގޮވާލަން."

އެނގުން މުހިންމު - އޭސީސީގެ ގާނޫނަށް ހުށަހަޅާފައިވާ އިސްލާހުގައިވާ ގޮތުން:

ގާނޫނުގައި މިހާރު އޮންނަ ގޮތުން އެ ކޮމިޝަންތަކުގެ ރައީސް ނުވަތަ ނައިބު ރައީސްގެ މަގާމް ހުސްވެއްޖެ ނަމަ، އެ މަގާމުތަކަށް އައްޔަންކުރަން ބޭނުންވާ ފަރާތްތަކުގެ ނަންތައް މަޖިލީހަށް ރައީސް ފޮނުއްވަން ޖެހިވަޑައިގަންނަވާނެ އެވެ. އަދި އެ މަގާމަށް އައްޔަންކުރެއްވޭނީ މަޖިލީހުގެ އަގުލަބިއްޔަތުން ފާސްކުރާ ނަމެކެވެ.