އީސީ އާއި އޭސީސީގެ މިނިވަންކަން ނަގަހައްޓަން ބިލުތައް ގެންދަން އެމްޑީޕީން ވެސް ގޮވާލައިފި

އިލެކްޝަންސް ކޮމިޝަން (އީސީ) އާއި އެންޓި-ކޮރަޕްޝަން ކޮމިޝަން (އޭސީސީ)ގެ ރައީސުންނާއި ނައިބު ރައީސުން އައްޔަނު ކުރުމުގެ ބާރު ރައީސަށް ލިބިދޭ ގޮތަށް ގާނޫނަށް ބަދަލު ގެންނަން ހުށަހަޅާފައިވާ ބިލުތައް ގެންދަން އެމްޑީޕީން ވެސް މިއަދު ގޮވާލައިފި އެވެ.

ވީ ކިހިނެއް؟ - އެ ދެ ކޮމިޝަންގެ ރައީސާއި ނައިބު ރައީސް، ރައީސް އައްޔަންކުރައްވާ ގޮތަށް އަދި ރައީސް އައްޔަންކުރައްވާ ފަރާތްތަކުގެ ނަންތައް މަޖިލީހަށް ހުށަހަޅައި ފާސްކުރަން ޖެހޭ ގޮތަށް ދެ ބިލު ސަރުކާރުން ވަނީ ހުށަހަޅައިފަ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ދެ ބިލުގެ ފުރަތަމަ ކިއުން އިއްވަން އެޖެންޑާކޮށްފައިވެ އެވެ. އެގޮތުން:

ކީކޭ ބުނީ؟ - އިދިކޮޅު އެންމެ ބޮޑު ޕާޓީ، އެމްޑީޕީން ނެރުނު ބަޔާނެއްގައި ބުނީ، ސަރުކާރުގެ ބިލުތަކަކީ ގާނޫނުއަސާސީން އެކަށައަޅާފައިވާ ފާރަވެރިވުމުގެ ނިޒާމު ފުނޑާލައި ބާރުތައް އެއްކޮށްލުމަށް ކުރެވޭ މަސައްކަތެއްގެ ގޮތުގައި ދެކޭ ކަމަށެވެ.

އީސީ އާއި އޭސީސީގެ އިސް ހިންގުންތެރިން އައްޔަންކޮށް ވަކިކުރުމުގެ ބާރު ގާނޫނުން އެ ކޮމިޝަންތަކަށް ދޫކޮށްލާފައި އޮތީ ގާނޫނުއަސާސީން އެ ކޮމިޝަންތަކަކީ މިނިވަން މުސްތަގިއްލު ކޮމިޝަންތަކަކަށް ވާން ޖެހޭނެ ކަމަށް ކަނޑައަޅާފައި އޮތުމުން ކަމަށް އެމްޑީޕީން ބުންޏެވެ.

"އެ ކޮމިޝަންތަކުގެ އިދާރީ ހިންގުމުގެ ހުރިހާ ޒިންމާއެއް އުފުލާ މީހުންނަކީ ރައީސް ކަނޑައަޅާ ބަޔަކަށް ހެދުމަކީ ވެރިކަން ހިންގާ ބާރުގެ ސީދާ ނުފޫޒު އެ ކޮމިޝަންތަކުގެ މައްޗަށް ފޯރުވުމުގެ ނާތަހުޒީބު އަމަލެކެވެ. އަދި އެއީ ޑިމޮކްރެސީގައި ދިވެހިން މިކުރާ ދަތުރުގައި އެތައް ބައެއްގެ މިންނެތް މަސައްކަތުން އެކަށައެޅި ނިޒާމުގައި ފަހަތަށް އެޅޭ ފިޔަވަޅެކެވެ،" އެމްޑީޕީގެ ބަޔާނުގައިވެ އެވެ.

ރައްޔިތުންގެ މަޖިލީހުގައި އޮތް ސަރުކާރުގެ ސުޕަމެޖޯރިޓީ ބޭނުންކޮށްގެން ރައީސް މުހައްމަދު މުއިއްޒަށް މުޅި ދައުލަތުގެ ހުރިހާ ބާރަކަށް ނުފޫޒު ފޯރުވޭ ގޮތަށް ރައީސް އޮފީހަށް ހުރިހާ ބާރެއް ޖަމާކުރުމަށް މަސައްކަތް ކުރާ ކަމަށް ތުހުމަތުކޮށް، އެ މަސައްކަތް ހުއްޓާލަން އެމްޑީޕީން ގޮވާލާފައިވެ އެވެ.

"ރާއްޖޭގެ ރައްޔިތުން، ގާނޫނުއަސާސީގައި އެކަށައެޅި ފާރަވެރިވުމުގެ ނިޒާމު ހިމާޔަތްކޮށް އެގޮތުގައި ދެމެހެއްޓުމަށް މިޕާޓީ ކުރަންޖެހުނު ކޮންމެ މަސައްކަތެއް ކުރުމުގައި ފަސްނުޖެހޭނޭކަންވެސް ދިވެހި ސަރުކާރަށް ދަންނަވަމެވެ." ސިޔާސީ ޕާޓީތަކުގެ ދަފްތަރުގައި، އެންމެ ގިނަ މެންބަރުން ރަޖިސްޓްރީކޮށްފައިވާ ޕާޓީން ނެރުނު ބަޔާނުގައިވެ އެވެ.

ގުޅުން ހުރި - މި ކަމާ ކަންބޮޑުވުން ފާޅުކޮށް ޑިމޮކްރެޓްސް އިން ވެސް ބަޔާނެއް ނެރުނެވެ. ޑިމޮކްރެޓްސް އަކީ، އެމްޑީޕީގެ ކުރީގެ ލީޑަރު އަދި ރާއްޖޭގެ ކުރީގެ ރައީސް މުހައްމަދު ނަޝީދު އެމްޑީޕީން ވަކިވެވަޑައިގެން އެމަނިކުފާނުގެ އިރުޝާދުން އުފެއްދި ޕާޓީއެކެވެ.