އީސީގެ މިހާރުގެ ރައީސް ފުއާދު (މ). (ދައުރު ފައިލް ފޮޓޯ/ހުސެން ސުނޭން)
އޭސީސީ އާއި އީސީގެ ރައީސާއި ނައިބު ރައީސް އައްޔަންކުރުމުގެ ބާރު ރައީސަށް ދެނީ
އެންޓި-ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަންސް (އީސީ)ގެ ރައީސާއި ނައިބު ރައީސް އައްޔަންކުރެއްވުމުގެ ބާރު ރައީސަށް ލިބޭ ގޮތަށް އޭސީސީގެ ގާނޫނު އަދި އީސީގެ ގާނޫނަށް އިސްލާހު ގެނައުމުގެ ދެ ބިލު ސަރުކާރުން ރައްޔިތުންގެ މަޖިލީހަށް ހުށަހަޅައިފި އެވެ.
ވީ ކިހިނެއް؟ - އެ ދެ ބިލު މަޖިލީހަށް ހުށަހަޅާފައިވަނީ މި މަހުގެ 24 ވަނަ ދުވަހު އެވެ.
-
އޭސީސީގެ ގާނޫނު - އިސްލާހު ހުށަހަޅުއްވާފައިވަނީ ފެލިދޫ ދާއިރާގެ މެންބަރު އާދަމް ޒާހިރު
-
އީސީގެ ގާނޫނު - އިސްލާހު ހުށަހަޅުއްވާފައިވަނީ ކެލާ ދާއިރާގެ މެންބަރު އަބްދުﷲ ޝަރީފް
ތަފްސީލް - މި ދެ ބިލުގެ ފުރަތަމަ ކިއުން މަޖިލީހުގެ މާދަމާގެ ޖަލްސާއަށް ވަނީ އެޖެންޑާކޮށްފަ އެވެ. އެ ދެ ގާނޫނަށް ހުށަހަޅާފައިވާ އިސްލާހުގައިވާ ގޮތުން:
-
ކޮމިޝަންތަކުގެ ރައީސާއި ނައިބު ރައީސަށް، ރައީސް އައްޔަންކުރައްވާ ފަރާތްތަކުގެ ނަންތައް މަޖިލީހަށް ހުށަހަޅައި މަޖިލީހުން ފާސްކުރަން ޖެހޭނެ
-
ކޮމިޝަންގެ ރައީސް ނުވަތަ ނައިބު ރައީސް މަގާމުން އިސްތިއުފާ ދޭން ބޭނުންވެއްޖެ ނަމަ، އެކަން ބަޔާންކޮށް ރައީސަށް ސިޓީއެއް ފޮނުވުމުން މަގާމުން ވަކިވެވޭނެ
-
އޭސީސީގެ ރައީސް ނުވަތަ ނައިބު ރައީސް މަގާމުގެ މަސްއޫލިއްޔަތު އަދާނުކުރާ ކަމަށް ކޮމިޝަނުގެ މެންބަރުންގެ އަގުލަބިއްޔަތުން ފާސްކޮށްފި ނަމަ، މަގާމުން އިސްތިއުފާން ޖެހޭނެ ކަމަށް ބުނާ މާއްދާ އުނިކުރަން ވަނީ އިސްލާހު ހުށަހަޅާފައި
-
އޭސީސީގެ ރައީސް ނުވަތަ ނައިބު ރައީސްގެ މަގާމު ހުސްވެއްޖެ ނަމަ، 72 ގަޑިއިރުގެ ތެރޭގައި މަޖިލީހަށް ނަމެއް ފޮނުވައިގެން ފާސްކުރަން އޮތް މާއްދާ އުވާލަން ވަނީ ހިމަނާފައި
އެނގުން މުހިންމު - ގާނޫނުގައި މިހާރު އޮންނަ ގޮތުން އެ ކޮމިޝަންތަކުގެ ރައީސް ނުވަތަ ނައިބު ރައީސްގެ މަގާމް ހުސްވެއްޖެ ނަމަ، އެ މަގާމުތަކަށް އައްޔަނުކުރަން ބޭނުންވާ ފަރާތްތަކުގެ ނަންތައް މަޖިލީހަށް ރައީސް ފޮނުއްވަން ޖެހިވަޑައިގަންނަވާނެ އެވެ. އަދި އެ މަގާމަށް އައްޔަންކުރެއްވޭނީ މަޖިލީހުގެ އަގުލަބިއްޔަތުން ފާސްކުރާ ނަމެކެވެ.
ގުޅުންހުރި - މި ދެ ގާނޫނަށް އިސްލާހު ހުށަހެޅިއިރު، އީސީގެ ރައީސްގެ މަގާމްގައި ހުންނެވި ފުއާދު ތައުފީގްގެ ދައުރު ހަމަވާތީ އީސީގެ މެންބަރު ކަމަށް ހަމަޖައްސަން އަބްދުލްހަސީބް އިސްމާއީލްގެ ނަން މި މަހުގެ 14ގައި ވަނީ މަޖިލީހަށް ފޮނުވާފަ އެވެ.
ކޮމެންޓް