ޖަލަށް ޑްރަގާއި ފޯން ވެއްދުމުގައި އެހީތެރިވެދިން މައްސަލާގައި ދައުވާކުރި ފަސް މީހުންގެ ތެރެއިން ބަންދުގައި ތިބި ހަތަރު މީހުން: މި އެންމެން ބަންދުން ދޫކޮށްލަން ކޯޓުން ވަނީ އަމުރުކޮށްފައި
ޖަލަށް ޑްރަގް ވެއްދި އޮފިސަރުންގެ މައްސަލަ: އެންމެން ބަންދުން ދޫކޮށްލައިފި
ޖަލުގައި ގައިދީންނަށް ފޯނާއި މަސްތުވާތަކެތި ފޯރުކޮށްދިނުމަށް އެހީތެރިވުމުގެ ތުހުމަތުގައި ދައުވާ އުފުލައި ޝަރީއަތް ނިމެންދެން ބަންދުގައި ތިބި އެންމެން ބަންދުން ދޫކޮށްލަން މިއަދު ކްރިމިނަލް ކޯޓު އަމުރުކޮށްފި އެވެ.
ވީ ކިހިނެއް؟ - މި މައްސަލާގައި ކަރެކްޝަންސްގެ 13 އޮފިސަރަކަށް ދައުވާކޮށްދޭން އެދި ފުލުހުން ޕީޖީ އޮފީހަށް ފޮނުވި ނަމަވެސް، ދައުވާކޮށްފައިވަނީ ފަސް އޮފިސަރެއްގެ މައްޗަށެވެ.
ދައުވާކޮށްފައިވާ ފަސް މީހުންނަކީ:
-
1-
ޖިނާހު އަބްދުއްރަހީމް، އައިވަރީ ހައުސް/ރ.އުނގޫފާރު
-
2-
އަލީ ހިޝާމް، ބީޗްހައުސް/ ކ.މާފުށި
-
3-
އަލީ ނާޒިމް، ތަރާނާގެ/ހދ. ނޭކުރެންދޫ
-
4-
މުހައްމަދު ފަތޫހު އަބްދުﷲ، ކުއްޅަވައްގެ/ގއ. ވިލިނގިލި
-
5-
އަލީ އަޝްފާގު، ކާމިނީގެ/ނ.ލަންދޫ
ކޮށްފައިވާ ދައުވާތަކަކީ:
-
ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ
-
މަނީ ލޯންޑްރިންގެ ކުށުގެ ދައުވާ
-
ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ
ތަފްސީލް - މީގެ ތެރެއިން ފަތޫހު ފިޔަވައި އެންމެން ތިބީ ޝަރީއަތް ނިމެންދެން ބަންދުކޮށްފަ އެވެ. އެ ހަތަރު މީހުން ވެސް ދޫކޮށްލަން މި މައްސަލަ ކްރިމިނަލް ކޯޓުގައި ބައްލަވާ ގާޒީ އިސްމާއިލް ޝަފީއު މިއަދު ނިންމެވީ އެކަމަށް އެ މީހުންގެ ފަރާތުން މިއަދުގެ އަޑުއެހުމުގައި އެދިފައިވާތީ އެވެ. އަދި ދައުލަތުން އެކަމާ ދެކޮޅު ހަދާފައިނުވާތީ އެވެ.
އެ މީހުންގެ ފަރާތުން ބަންދުން ދޫކޮށްދިނުމަށް އެދިފައިވަނީ އެ މައްސަލާގައި މީގެ ކުރިން ހައްޔަރުކުރި މީހަކު ބަންދުކުރީ ގޯސްކޮށް ކަމަށް ހައި ކޯޓުން ނިންމާފައިވާތީ ކަމަށް ބުނެ އެވެ.
މިކަމާ ގުޅޭގޮތުން މިއަދު ކޯޓުގައި ދައުލަތުން ބުނީ:
-
ހައި ކޯޓުގެ އެ ނިންމުމަށް ބަލާއިރު މިހާރު ބަންދުގައި ތިބި މީހުން ވެސް ދޫކޮށްލަންޖެހޭ ކަމަށް
-
ޝަރުތުތަކަކާ އެކު އެމީހުން ބަންދުން ދޫކޮށްލަން އިއުތިރާޒް ނުކުރާ ކަމަށް
ޝަރީއަތް ނިމެންދެން އެ ހަތަރު މީހުން ބަންދުކޮށްފައި ތިބީ މުޖުތަމައުގެ ސަލާމަތަށް ނުރައްކާވެދާނެތީ ކަމަށް ބުނެ ދައުލަތުން އެދިގެން ކަމަށްވާއިރު، މިހާރު އެ މީހުން ދޫކޮށްލަން އެއްބަސްވަނީ ކީއްވެތޯ ގާޒީ އިސްމާއިލް ޝަފީއު ސުވާލުކުރެއްވި އެވެ. ޖަވާބުގައި ދައުލަތުން ބުނީ އެ ނުރައްކާ މިހާރު ކުޑަވެފައިވާ ކަމަށެވެ.
އެނގުން މުހިންމު - ފުލުހުން މި އަހަރުގެ ޖޫން މަހުގެ ތެރޭގައި ބޭއްވި ނޫސްވެރިންގެ ބައްދަލުވުމެއްގައި ހާމަކުރި ގޮތުގައި ގައިދީންނަށް މަސްތުވާތަކެއްޗާއި ފޯން ފަދަ ތަކެތި ޖަލަށް ވައްދައިދީގެން ކަރެކްޝަންސްގެ ދަށް ލެވެލްގެ 18 އޮފިސަރެއްގެ އެކައުންޓަށް ޝައްކު ކުރެވޭ 73 މިލިއަން ރުފިޔާ ވަނީ ޖަމާކޮށްފަ އެވެ.
އެ ފައިސާ ޖަމާކޮށްފައި ވަނީ ޖަލުގައި ތިބި ގައިދީންނާއި އެ މީހުންނާ ގުޅުން ހުރި މީހުންގެ އެކައުންޓްތަކުން ކަމަށް ފުލުހުން ބުނެފައިވެ އެވެ.
ކޮމެންޓް (1)
ވާނުވާ