މެދުރާއްޖެ ސަރަހައްދަށް ބޯވިލާގަނޑެއް ޖަމާވާތަން ފެންނަ ރާޑަރުގެ ފޮޓޯ
2 އަހަރަށް ފަހު ރާޑަރު ފޮޓޯއެއް؛ ފެންނަނީ މެދުރާއްޖެތެރެއަށް ބޯވިލާގަނޑެއް ޖަމާވާ ތަން
މަރާމާތަށް ފަހު އަލަށް ބޭނުން ކުރަން ފެށި ޑޮޕްލާ ވެދާ ރާޑަރުގެ އާ ފޮޓޯއެއް މިއަދު މޫސުމާ ބެހޭ ގައުމީ އިދާރާއިން އާއްމުކޮށްފި އެވެ.
ވީ ކިހިނެއް؟ - މީގެ ދެ އަހަރު ކުރިން، ޑޮޕްލާ ރާޑަރަށް ދިމާވި ޓެކްނިކަލް މައްސަލަ ހައްލުކޮށް ބޭނުން ކުރަން ފެށީ މީގެ ތިން ދުވަސް ކުރިންނެވެ. އޭގެ ފަހުން ރާޑަރު ފޮޓޯއެއް މިއަދު ފުރަތަމަ ފަހަރަށް އާއްމު ކުރި އިރު، އެއިން ފެންނަނީ މެދު ރާއްޖެ ތެރޭ ސަރަހައްދަށް ބޯވިލާގަނޑެއް ޖަމާވަމުންދާ ތަނެވެ.
ތަފްސީލް - ގަދަވައި ހުންނާނެ ކަމަށް ޔަގީންކުރެވޭ މި ވިލާގަނޑު ދަތުރުކުރަމުން ދަނީ ހުޅަނގުން އިރަށެވެ.
"މިއިން ދައްކާ ގޮތުން ކުރިއަށް އޮތް ދެ ދުވަހު ވެސް ވަރަށް ވައިގަދަވާނެ،" މެޓުގެ އޮފިޝަލަކު ވިދާޅުވި އެވެ.
އެނގުން މުހިއްމު - މި ރާޑަރުގެ އެހީގައި ހުޅުލެ އިން ފެށިގެން ގާތްގަނޑަކަށް 250 ކިލޯމީޓަރުގެ ރޭޑިއަސްގެ ތެރޭގައި ހިނގާ މޫސުމާ ބެހޭ މައުލޫމާތު ވަގުތުން ވަގުތަށް ދެނެގަނެވޭނެ ކަމަށް މެޓް އޮފީހުން ބުނެ އެވެ. މީގެ އިތުރުން:
-
ވާރޭ ވެހެމުންދާ ސަރަހައްދު، ވާރޭ ވެހެމުންދާ ބޯމިން، ވާރޭ ވެހޭ ވިލާގަނޑު ދަތުރުކުރަމުންދާ މިސްރާބާއި ބާރުމިން ފަދަ މައުލޫމާތުތައް ބަލާލެވޭނެ
-
ވިލާގަނޑު ވަކި ސަރަހައްދަކަށް ލައްވާލާނެ ކަމަށް އަންދާޒާ ކުރެވޭ ވަގުތު ދެނެގަނެވޭނެ
-
އެކި ފަށަލަތަކުގައި ޖެހޭ ވައިގެ މައުލޫމާތު ދެނެގަނެވޭނެ
މެޓުން ބުނާ ގޮތުގައި، މިއީ މޫސުން ކުރިއަށް ލަފާކުރުމުގެ އިތުރުން ވައިގެ ދަތުރުފަތުރުގެ ސަލާމަތާއި ރައްކާތެރި ކަމަށް ފޯރުކޮށްދެވޭ ވަރަށް މުހިއްމު މައުލޫމާތުތަކަކަށް ވެގެންދާނެ ކަމެކެވެ.
އެނގުން މުހިންމު - ރާއްޖެއަށް މިހާރު ކުރަމުން މިދަނީ ހުޅަނގު މޫސުން ނިމެން ދާއިރު ކުރާ ވިއްސާރަ ކަމަށް މެޓުން ބުނެ އެވެ.
މި ވިއްސާރައިގައި ދަނީ ވަރަށް ގަދައަށް ވައިޖެހެމުންނެވެ. އެގޮތުން:
-
ރޭ ފަތިހު ހުޅުލެއަށް 58 މޭލު ބާރުމިނުގައި ވައިޖެހުނު
-
ބ. ދަރަވަންދުއަށް އިއްޔެ 55 މޭލަށް ވައިޖެހުނު
-
މި ވިއްސާރައިގައި ވިލާގަނޑުގައި އާއްމުކޮށް 50 މޭލަށް ވައިޖެހޭނެ ކަމަށް މެޓުން ލަފާ ކުރޭ
