ޖަލަށް މަަސްތުވާތަކެތި ވައްދައިގެން ލިބޭ ފައިސާ ލޯންޑަކުރަމުން ދިޔަ މައްސަލާގައި ދައުވާކޮށްފައިވާ ފަސް އޮފިސަރުންގެ ތެރެއިން ހަތަރު އޮފިސަރަކު ދޫނިދޫ ކަސްޓޯޑިއަލުން އޮންލައިންކޮށް ޝަރީއަތުގެ އަޑުއެހުމުގައި ބައިވެރިވަނީ.
ޖަލަށް ޑްރަގް ވެއްދި މައްސަލަ: 3 އޮފިސަރަކާ އެކު އިއުތިރާފު އެއްބަސްވުމެއް ހަދައިފި
ޖަލަށް މަަސްތުވާތަކެތި ވައްދައިގެން ލިބޭ ފައިސާ ލޯންޑަކުރަމުން ދިޔަ މައްސަލާގައި ދައުވާކޮށްފައިވާ ކަރެކްޝަންސްގެ ފަސް އޮފިސަރުންގެ ތެރެއިން ތިން އޮފިސަރަކާ އެކު، ޕްރޮސެކިއުޓަ ޖެނެރަލް (ޕީޖީ)ގެ އޮފީހުން ކުށުގެ އިއުތިރާފު އެއްބަސްވުމެއް ހަދާފައިވާކަން މިއަދު ހާމަވެއްޖެ އެވެ.
ވީ ކިިހިނެއް؟ - މިކަން ހާމަވީ، ކްރިމިނަލް ކޯޓުގައި ޝަރީއަތް ފަށަން މިއަދު ބޭއްވި މައްސަަލައިގެ ފުރަތަމަ އަޑުއެހުމުގައި، މައްސަލަ ބައްލަވާ ގާޒީ އިސްމާއީލް ޝަފީއު އެކަން ފާހަގަ ކުރެއްވުމުންނެވެ.
ތަފްސީލް - ޕީޖީ އޮފީހުގެ ވަކީލުންނާ ގާޒީ ސުވާލުކުރެއްވުމުން، އެ އޮފީހުގެ ވަކީލު ޖިނާން އަބްދުﷲ ވިދާޅުވި ގޮތުގައި، އިއުތިރާފު އެއްބަސްވުމެއް ހަދާފައިވާ ތިން އޮފިސަރުންނަކީ:
-
އަލީ ނާޒިމް، ތަރާނާގެ/ހދ. ނޭކުރެންދޫ
-
މުހައްމަދު ފަތޫހު އަބްދުﷲ، ކުއްޅަވައްގެ/ގއ. ވިލިނގިލި
-
އަލީ އަޝްފާގު، ކާމިނީގެ/ނ. ލަންދޫ
މި ތިން މީހުންގެ މައްޗަށް ދައުލަތުން އުފުލާފައި ވަނީ ދެ ދައުވާއެކެވެ. އެއީ:
-
ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ
-
ނުހައްގު މުއްސަނދިކަން ހޯދައި ލިބިގަތުމުގެ ކުށުގެ ދައުވާ
ދިފާއުގެ ބަސް - ނާޒިމާއި އަޝްފާގުގެ ވަކީލު ޝަޒީމް ވަހީދު ވިދާޅުވީ ތަހުގީގު މަރުހަލާގައި އެއްބަސްވުމެއް ހަދާފައިވީ ނަމަވެސް އެ އެ އެއްބަސްވުން ދަމަހައްޓައި ދައުވާއަށް ޝަރީއަތުގައި އިއުތިރާފުވުމާ މެދު އަދި ވަކި ގޮތެއް ނިންމަން ބޭނުންވަނީ ލިޔެކިޔުންތައް ހަމަކޮށް ދިރާސާކުރުމަށް ފަހު ކަމަށެވެ.
އިއުތިރާފު އެއްބަސްވުން ދެން ހަދާފައިވާ ފަތޫހު އަދި ވަކީލަކު އައްޔަނެއް ނުކުރެ އެވެ. ގާޒީ ވަނީ ވަކީލަކު ހަމަޖައްސަން އޭނާއަށް 10 ދުވަހުގެ ފުރުސަތެއް ދީފަ އެވެ. އެހެން އޮފިސަރުން ދޫނިދޫ ކަސްޓޯޑިއަލްގައި ތިބިއިރު، ފަތޫހު ހުރީ ބަންދަކު ނޫނެވެ.
އެނގުން މުހިންމު - މި މައްސަލާގައި ދެން ހިމެނޭ ދެ އޮފިސަރުންގެ މައްޗަށް އެ ދެ ދައުވާގެ އިތުރަށް މަނީ ލޯންޑަރިންގެ ކުށުގެ ދައުވާ ކޮށްފައިވެ އެވެ. އެ ދެ އޮފިސަރުން ދައުލަތާ އެކު އަދި އިއުތިރާފު އެއްބަސްވުމެއް ނުހަދަ އެވެ.
އެ ދެ އޮފިސަރުންނަކީ:
-
ޖިނާހު އަބްދުއްރަހީމް، އައިވަރީ ހައުސް/ރ. އުނގޫފާރު
-
އަލީ ހިޝާމް، ބީޗްހައުސް/ކ. މާފުށި
މައްސަލައިގެ އިތުރު ހަބަރުތައް
-
ޕީޖީ އޮފީސްޖަލަށް ޑްރަގް ވެއްދުން: ކަރެކްޝަންސްގެ 5 އޮފިސަރަކަށް ދައުވާ
23 އޯގަސްޓު 2024 -
މޯލްޑިވްސް ކަރެކްޝަނަލް ސާވިސްކަރެކްޝަންސްގެ 13 އޮފިސަރުންގެ މައްސަލަ ޕީޖީއަށް
10 އޯގަސްޓު 2024 -
މޯލްޑިވްސް ކަރެކްޝަނަލް ސާވިސް
ކަރެކްޝަންސްގެ 13 އޮފިސަރަކު ހައްޔަރުކޮށްފި
28 ޖޫން 2024 -
މޯލްޑިވްސް ކަރެކްޝަނަލް ސާވިސްކަރެކްޝަންސްގެ 18 އޮފިސަރުންގެ އެކައުންޓަށް 73 މިލިއަން
27 ޖޫން 2024
ފަސްމަންޒަރު - މިދިޔަ ޖޫން މަހު ބޭއްވި ނޫސްވެރިންގެ ބައްދަލުވުމެއްގައި ފުލުހުން ހާމަކޮށްފައިވާ ގޮތުގައި:
-
ކަރެކްޝަންސްގެ ދަށް ލެވަލްގެ 18 އޮފިސަރެއްގެ އެކައުންޓަށް ޝައްކު ކުރެވޭ 73 މިލިއަން ރުފިޔާ ވަނީ ޖަމާކޮށްފައި
-
އެ އޮފިސަރުންގެ އެކައުންޓްތަކަށް ވަދެފައިވާ އެ ފައިސާ ޖަމާކޮށްފައި ވަނީ ޖަލުގައި ތިބި ގައިދީންނާއި އެ މީހުންނާ ގުޅުން ހުރި މީހުންގެ އެކައުންޓްތަކުން
-
އެކަމުގައި ޝާމިލްވާ 13 މީހަކު ހައްޔަރުކޮށް ވަނަވަރު އާންމު ކުރި
ގުޅުން ހުރި - ފުލުހުން ހައްޔަރުކުރި13 އޮފިސަރުންނަށް ވެސް ދައުވާ ކުރުމަށް ޕީޖީ އޮފީހުގައި އެދުނެވެ. ޕީޖީ އޮފީހުން ބުނީ، އެއިން އަށް އޮފިސަރެއްގެ މައްޗަށް ދައުވާކުރެވޭ މިންވަރަށް މި ވަގުތު ހެކި ލިބިފައި ނުވާތީ ދައުވާ ނުކުރަން ނިންމީ ކަމަށެވެ.
އެ މައްސަލައިގެ ތަހުގީގު އަދިވެސް ކުރިއަށްދާތީ، އިތުރު ބައިތަކުގެ ތަހުގީގު ނިމުމުން،އަދި އެއްކުރެވޭ ހެކިތައް ވަޒަންކޮށް، ތުހުމަތުކުރެވޭ އިތުރު މީހުންގެ މައްޗަށް ދައުވާކުރުމާ މެދު ގޮތެއް ނިންމާނެ ކަމަށް ވެސް ޕީޖީން ބުންޏެވެ.
ކޮމެންޓް (1)
އަމަ ނިގަ އަމަ ނިގަ