މާލެ ސަރަހައްދުގައި ގަވާއިދާ ހިލާފައަށް އުޅޭ ބިދޭސީން އަތުލައިގަތުމަށް އިމިގްރޭޝަނުން ކުރިއަށް ގެންދިޔަ އޮޕަރޭޝަނުގެ ތެރެއިން. (ދައުރު ފޮޓޯ/ އަބްދުﷲ އަނޫފް ޖުނައިދް)
ބިދޭސީންގެ ކޯޓާ އުވާލައި، އިހުމާލުވުމުން 50،000ރ. އިން ޖޫރިމަނާ ކުރާ ގޮތަށް ހަދައިފި
އެއް ގައުމަކުން ބިދޭސީ މަސައްކަތްތެރިން ގެނައުމަށް ގާނޫނުގައި ބަޔާންކޮށްފައިވާ އޮތް 100،000 މީހުންގެ އަދަދު އުވާލުމަށާއި އެމީހުން ރާއްޖެ ގެނައުމަށް ފަހު، އިހުމާލުވާ ކޮންމެ މުވައްޒަފަކަށް 50،000ރ.އިން ވަޒީފާ ދޭ ފަރާތް ޖޫރިމަނާކުރެވޭ ގޮތަށް ވަޒީފާއާ ބެހޭ ގާނޫނަށް ގެނެސްފައިވާ އިސްލާހު ރައީސް މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ވީ ކިހިނެއް؟ - މިދިޔަ މަހު 19ގައި މަޖިލީހުން ފާސްކުރި މި ބިލު ރައީސް މިއަދު ތަސްދީގު ކުރެއްވުމާ އެކު މިހާރު އެ ބިލު ވަނީ ސަރުކާރުގެ ގެޒެޓްގައި ޝާއިއުކޮށްފަ އެވެ. އެއާ އެކު މިއަދުން ފެށިގެން އެ އިސްލާހުތަކަށް އަމަލުކުރަން ފެށުނީ އެވެ.
ތަފްސީލު - މި ބިލުގައި އެންމެ ބޮޑު އެއް ބަދަލަކަށް އޮތީ، ގާނޫނުގައި އޮތް ބިދޭސީން ރާއްޖެ އެތެރެ ކުރެވޭ ކޯޓާ އުވާލުމެވެ. އެއް ގައުމަކުން ބިދޭސީން ގެނެވޭނެ އަދަދު ކުރިން އޮތީ ސީދާ ގާނޫނުގައި ކަނޑައަޅައިފަ އެވެ. އެއީ ގިނަވެގެން 100،000 މީހުންނެވެ. ނަމަވެސް އިސްލާހު ހުށަހަޅާފައި ވަނީ، އެ އަދަދު ގާނޫނުގައި ކަނޑައެޅުމުގެ ބަދަލުގައި ގާނޫނުގެ ދަށުން ހަދާ ގަވައިދަކުން އެ އަދަދު ކަނޑައެޅުމަށެވެ. އެގޮތުން، އިސްލާހުގައި ބުނަނީ:
-
އެ ގަވައިދުގައި އަހަރެއްގެ ތެރޭގައި ބިދޭސީން ގެނެވޭނެ އަދަދާއި ދާއިރާތަކާއި އެއް ގައުމަކުން އެންމެ ގިނައިން ބިދޭސީން ގެނެވޭނެ އަދަދާއި ދާއިރާތައް ކަނޑައެޅިދާނެ
-
އެގޮތަށް ކަނޑައެޅުމުގައި އެކިއެކި ސިނާއަތްތަކާއި މަސައްކަތުގެ ބާވަތަށް އަދި ހުނަރުގެ މިންވަރަށް ބިނާކޮށް، ތަފާތު ގިންތިތަކަށް ތަފާތު މިންގަނޑުތަކެއް ކަނޑައެޅިދާނެ
ބިލު ހުށަހެޅި އިރު، ބިދޭސީން ގެނެވޭނެ އަދަދުތައް ގަވައިދުގައި ކަނޑައެޅުމަށް އިހްތިޔާރީ ކަމަކަށް ދޫކޮށްފައި އޮތް ނަމަވެސް، ކޮމިޓީ މަރުހަލާގައި ބިލުގެ އެ މާއްދާތަކުގައި ވަނީ އެއީ ކުރަން ޖެހޭނެ ކަންކަމުގެ ގޮތުގައި ހިމަނައިފަ އެވެ. އަދި އެގޮތަށް އަދަދުތައް ކަނޑައެޅުމަށް ފަހު، ކޮންމެ އަހަރަކު ދެ ފަހަރު އާންމު ކުރަން ވާނެ ކަމަށް ވެސް ކޮމިޓީން ނިންމާފައިވެ އެވެ.
އެ އިސްލާހުތަކާ ގުޅޭ ގަވައިދު އެކުލަވާލުމުގެ ޒިންމާއަކީ ބިދޭސީންގެ ކަންކަން މަތިކޮށްފައިވާ ހޯމްލޭންޑް ސެކިއުރިޓީ މިނިސްޓްރީގެ ޒިންމާކެވެ. އަދި އިސްލާހުގައިވާ ގޮތުން އަންނަ 1ޑިސެމްބަރުގެ ކުރިން ގަވައިދުތައް އެކުލަވާލަން ޖެހެ އެވެ.
މި އިސްލާހުގައި ދެން ބޮޑު ބަދަލަކަށް އޮތީ، ބިދޭސީންނާމެދު އިހުލުވާ ފަރާތްތަކަށް ހަރުކަށި ފިޔަވަޅު އެޅުމަށް ބާރު ދިނުމެވެ. އެގޮތުން ބިދޭސީންނާ މެދު އިހުމާލުވި ކަމަށް ބެލެވޭނެ ހާލަތްތަކާއި އެފަދަ ހާލަތްކުގައި އަޅާނެ ފިޔަވަޅުތައް ބަޔާންކޮށްފައިވެ އެވެ.
އަޅާނެ ފިޔަވަޅުތަކުގައި ހިމެނެނީ:
-
ބިދޭސީ މަސައްކަތްތެރިން ރާއްޖެ ގެނައުމަށް ފަހު، އެ ފަރާތްތަކާ މެދު އިހުމާލުވާ ވަޒީފާ ދޭ ފަރާތްތަކުގެ މައުލޫމާތު އާންމުކުރުން
-
އިހުމާލުވާ ކޮންމެ މުވައްޒަފަކަށް 50،000ރ.ގެ މަގުން ޖޫރިމަނާ ކުރުން
-
ތަކުރާރުކޮށް އިހުލާވުމުގެ އަމަލުތައް ހިންގާ ވަޒީފާ ދޭ ފަރާތްތައް ޖޫރިމަނާ ކުރުމާ އެކު، ގާނޫނުގެ ދަށުން ބިދޭސީ މަސައްކަތްތެރިންނާ ގުޅޭ ގޮތުން ވަޒީފާ ދޭ ފަރާތަށްދޭ ހިދުމަތްތައް ވަކި މުއްދަތަކަށް ހުއްޓާލުން؛ އޭގެ ތަފްސީލު ބަޔާން ކުރުން އޮތީ ގާނޫނުގެ ދަށުން ހަދާ ގަވައިދަކުން
އިހުމާލުގެ އަމަލުތަކުގެ ގޮތުގައި ބަލަނީ:
-
1-
މުސާރަ ނުދިނުން
-
2-
ވަޒީފާ ދޭ ފަރާތުން ފޯރުކޮށްދޭން ޖެހޭ އަސާސީ ކަންކަމުގައި ގާނޫނުގެ ދަށުން ހަދާ ގަވައިދުގައި ކަނޑައަޅާ ކަންކަން ފުރިހަމަނުކުރުން
-
3-
ބިދޭސީ މަސައްކަތްތެރިން ރާއްޖެ ގެނައުމުގައި ނުވަތަ ރާއްޖެ ގެނައުމަށް ފަހު އެ މީހުންނާ މެދު އެކްސްޕްލޮއިޓޭޝަންގެ އަމަލެއް ހިންގުން ނުވަތަ އެ މީހުން ލައްވާ ގާނޫނާއި ގަވައިދާ ހިލާފު އަމަލުތައް ހިންގުން
-
4-
ބިދޭސީ މަސައްކަތްތެރިޔާ ގެންނަ ވަޒީފާ ނޫން އެހެން ވަޒީފާއެއް އަދާ ކުރުވުން؛ ނަމަވެސް ވަޒީފާގެ އެއްބަސްވުމުގެ ދާއިރާގެ ތެރެއިން ކުރާ އެހެނިހެން މަސައްކަތް ކުުރުމަކީ އެހެން ވަޒީއެއް އަދާކުރުން ކަމުގައި ނުބެލެވޭނެ
އެއިން ކަމެއްކޮށް ގާނޫނާ ހިލާފުވެއްޖެ ނަމަ، ވަޒީފާދޭ ފަރާތް 100،000ރ.އަށް ވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު މިނިސްޓްރީއަށް ލިބިގެންވާ ކަމަށް ބިލުގައިވެ އެވެ.
އެ ދެ އިސްލާހުގެ އިތުރުން، ބިދޭސީންގެ ފީތައްވެސް ކޮންމެ ދޮޅު އަހަރަކުން ބޮޑު ކުރެވޭ ގޮތަށް އިސްލާހުކޮށްފައިވެ އެވެ.
