އެންމެ ފަހުން މިދިޔަ އާދިއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި ރައީސް މުއިއްޒު ބައިވެރިވެވަޑައިގަންނަވަނީ (ފޮޓޯ/ ރައީސް އޮފީސް)
ރިސޯޓުތަކުގެ މުއްދަތު އިތުރުކުރުމުގެ ފީ 5 މިލިއަން ޑޮލަރަށް ކުޑަކޮށްފި
ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރުމަށް ކުރިން ދައްކަން ޖެހޭ އަގަށް ވުރެ ދެ ގުނަ ކުޑަ ވާނެ ގޮތަށް ސަރުކާރުގެ ފަރާތުން މިދިޔަ ހަފްތާގައި ޓޫރިޒަމް ގާނޫނަށް ހުށަހެޅި އިސްލާހު، ރައީސް މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ވީ ކިހިނެއް؟ - ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރަން ވަކި މުއްދަތަކަށް ކުޑަ އަގެއް ދެއްކޭ ގޮތް ހަދަން ޓޫރިޒަމް ގާނޫނަށް ސަރުކާރުގެ ފަރާތުން ހުށަހެޅި އިސްލާހުގެ މަސައްކަތް އެއް ދުވަސް ތެރޭ ނިންމައި، މަޖިލީހުން އެ ބިލު ފާސް ކުރީ މިދިޔަ ހަފްތާ ހޯމަ ދުވަހު އެވެ.
އެ ބިލު ރައީސް ތަސްދީގުކުރައްވައި، ގެެޒެޓްގައި މިހާރު ވަނީ ޝާއިއުކޮށްފަ އެވެ. އެއާ އެކު، މިއަދުން ފެށިގެން އެ އިސްލާހަށް އަމަލު ކުރަން ފެށުނީ އެވެ.
ތަފްސީލު- ޓޫރިޒަމް ގާނޫނުުގައިވާ ގޮތުން، ރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކުރެވެނީ ގިނަވެގެން 50 އަހަރަށެވެ. އަދި ވަކި ޝަރުތުތަކެއް ފުރިހަމަވާ ނަަމަ، އެ މުއްދަތު 49 އަހަރަށް އަނެއްކާ ވެސް އިތުރު ކުރެވެ އެވެ. އެގޮތުން:
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި 27 ޑިސެމްބަރު 2020ގައި ގެނައި އިސްލާހާ އެކު ކުޑަ ކުލި ދައްކައިގެން މުއްދަތު އިތުރު ކުރެވޭ ގޮތަށް ހެދި އެވެ. އެގޮތުން:
-
އެ އިސްލާހަށް އަމަލު ކުރަން ފަށާތާ ފުރަތަމަ ދެ އަހަރުގެ ތެރޭގައި 49 އަހަރަށް މުއްދަތު އިތުރުކުރަން އެދޭ ފަރާތްތަކަށް 5 މިލިއަން ޑޮލަރު އެކީ އެއްފަހަރާ ދައްކައިގެން މުއްދަތު އިތުރު ކުރެވޭ ގޮތަށް ހެދި؛ އޭގެ ފަހުން ދައްކަން ޖެހެނީ 10 މިލިއަން ޑޮލަރު
-
49 އަހަރަށް ވުރެ ކުރު މުއްދަތަކަށް އިތުރު ކުރާ ނަމަ، އަހަރަކަށް 100،000 ޑޮލަރު ދައްކައިގެން؛ އިސްލާހުގެ މުއްދަތަށް ފަހު، އަހަރަށް ދައްކަން އޮންނަނީ 200،000 ޑޮލަރު
ގާނޫނުގައި ބުނާ ދެ އަހަރުގެ މުއްދަތު 27 ޑިސެމްބަރު 2022އަށް ވަނީ ހަމަވެފަ އެވެ. އެހެންވެ، މިހާތަނަށް ކުއްޔަށް ނަގާފައިވާ މުއްދަތު 49 އަހަރަށް އިތުރު ކުރާ ނަމަ ދައްކަން ޖެހެނީ 10 މިލިއަން ޑޮލަރެވެ. އެއަށް ވުރެ ކުރު މުއްދަތަކަށް ކޮންމެ އަހަރަކަށް ދައްކަން ޖެެހެނީ 200،000 ޑޮލަރެވެ.
މި ސަރުކާރުން ހުށަހެޅި އިސްލާހަކީ ކުރީގެ ސަރުކާރުން ވެސް ލުއި ދީފައިވާ ގޮތަށް 5 މިލިއަން ޑޮލަރާއި 100،000 ޑޮލަރު ދައްކައިގެން ކުއްޔަށް ދީފައިވާ މުއްދަތު އިތުރުކުރުމަށް ފުރުސަތު ދޭ ގޮތަށެވެ. އެގޮތުން:
-
އިސްލާހުގައި ބުނަނީ އެ އިސްލާހު ތަސްދީގު ކުރާތާ ހަ މަސް ތެރޭ ކުލީގެ މުއްދަތު 49 އަހަރަށް އިތުރު ކުރާ ނަމަ، ދައްކަން ޖެހެނީ 5 މިލިއަން ޑޮލަރު؛ އެ މުއްދަތަށް ފަހު، އިތުރު ކުރުމަށް ދައްކަން ޖެހޭނީ 10 މިލިއަން ޑޮލަރު
-
49 އަހަރަށް ވުރެ ކުޑަ މުއްދަތަކަށް އިތުރު ކުރާ ނަމަ، ދައްކަން ޖެހެނީ އަހަރަކަށް 100،000 ޑޮލަރު؛ ހަ މަހަށް ފަހު، ދައްކަން ޖެހެނީ 200،000 ޑޮލަރު
ހަ މަހުގެ މުއްދަތު ގުނާނީ، ރައީސް ބިލް ތަސްދީގު ކުރެއްވުމާ އެކު ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެން ކަމަށް ބަޔާންކޮށްފައިވެ އެވެ.
އެހެން ކަމުން އަންނަ އަހަރުގެ ފެބްރުއަރީ 29ގެ ނިޔަލަށް ރިސޯޓުތަކުގެ މުއްދަތު އިތުރު ކުރުމަށް ހުށަހަޅާ ހުށެހެޅުންތަކަށް މި ލުއިތައް ލިބޭނެ އެވެ.
ކޮމެންޓް (3)
ނިކަމެތި މީހާ
އިބްރާހިމް
އަބްދު