ރާއްޖޭގެ ރިސޯޓެއް: ރިސޯޓުތައް ކުއްޔަށް ދީފައިވާ މުއްދަތު އިތުރު ކުރުމަށް ދައްކަން ޖެހޭ އަގު 5 މިލިއަން ޑޮލަރަށް ކުޑަ ކުރުމަށް ޓުއަރިޒަމް ގާނޫނު މަޖިލީހުން މިއަދު ވަނީ އިސްލާހުކޮށްފައި
ރިސޯޓުތަކުގެ މުއްދަތު އިތުރުކުރުން 5 މިލިއަން ޑޮލަރަށް ކުޑަކުރަން ފާސްކޮށްފި
ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރުމަށް މިހާރު ދައްކަން ޖެހޭ އަގަށް ވުރެ ދެ ގުނަ ކުޑަ ވާނެ ގޮތަށް ސަރުކާރުގެ ފަރާތުން މިދިޔަ ހަފްތާގައި ޓޫރިޒަމް ގާނޫނަށް ހުށަހެޅި އިސްލާހު މަޖިލީހުން މިއަދު ފާސްކޮށްފި އެވެ.
ވީ ކިހިނެއް؟ - ރިސޯޓުތައް ކުއްޔަށް ދޫކޮށްފައިވާ މުއްދަތު އިތުރުކުރަން ވަކި މުއްދަތަކަށް ކުޑަ އަގެއް ދެއްކޭ ގޮތް ހަދަން ޓޫރިޒަމް ގާނޫނަށް ދަނގެތި ދާއިރާގެ ޕީއެންސީ މެންބަރު އިސްލާހު ހުށަހެޅުއްވީ މިދިޔަ އަންގާރަ ދުވަހު އެވެ.
އެއާ އެކު، އެ ބިލު އަވަސް ކުުރުމުގެ ގޮތުން މުޅި މަޖިލީހުގެ ކޮމިޓީއަށް މިދިޔަ ބުދަ ދުވަހު ފޮނުވައި އެއް ދުވަސް ތެރޭ ބިލުގެ މަސައްކަތް މަޖިލީހުގެ ކޮމިޓީން އޮތީ ނިންމާފަ އެވެ. އެ ކޮމިޓީން ނިންމާފައި އޮތީ ސަރުކާރުން ހުށަހެޅި ގޮތަށް ބިލު ފާސް ކުރުމަށެވެ.
ތަފްސީލު - މިއަދު ބޭއްވި މަޖިލީހުގެ ޖަލްސާގައި ކޮމިޓީ ރިޕޯޓަށް ވޯޓަށް އެހުމުން، އެ ބިލު ފާސްވެފައި ވަނީ 76 މެންބަރުންގެ ވޯޓުންނެވެ. ދެކޮޅަށް އެއްވެސް މެންބަރަކު ވޯޓެއް ނުދެއްވަ އެވެ.
ޓޫރިޒަމާ ބެހޭ ގާނޫނުު މިހާރު އޮންނަ ގޮތުން، ރިސޯޓު ނުވަތަ އިންޓަގްރޭޓަޑް ރިސޯޓު ހަދަން ރަށް ނުވަތަ ބިން ކުއްޔަށް ދޫކުރެވެނީ ގިނަވެގެން 50 އަހަރަށެވެ. އަދި ވަކި ޝަރުތުތަކެއް ފުރިހަމަވާ ނަަމަ، އެ މުއްދަތު 49 އަހަރަށް އަނެއްކާވެސް އިތުރު ކުރެވެ އެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި 27 ޑިސެމްބަރު 2020ގައި ގެނައި އިސްލާހާ އެކު ކުޑަ ކުލި ދައްކައިގެން މުއްދަތު އިތުރު ކުރެވޭ ގޮތަށް ހެދި އެވެ. އެގޮތުން:
-
އެ އިސްލާހަށް އަމަލު ކުރަން ފަށާތާ ފުރަތަމަ ދެ އަހަރުގެ ތެރޭގައި 49 އަހަރަށް މުއްދަތު އިތުރުކުރަން އެދޭ ފަރާތްތަކަށް 5 މިލިއަން ޑޮލަރު އެކީ އެއްފަހަރާ ދައްކައިގެން މުއްދަތު އިތުރު ކުރެވޭ ގޮތަށް ހެދި؛ އޭގެ ފަހުން ދައްކަން ޖެހެނީ 10 މިލިއަން ޑޮލަރު
-
49 އަހަރަށް ވުރެ ކުޑަ މުއްދަތަކަށް އިތުރު ކުރާ ނަމަ، ދައްކަން ޖެހެނީ އަހަރަކަށް 100،000 ޑޮލަރު ދައްކައިގެން؛ އިސްލާހުގެ މުއްދަތަށް ފަހު، އަހަރަށް ދައްކަން އޮންނަނީ 200،000 ޑޮލަރު
ގާނޫނުގައި ބުނާ ދެ އަހަރުގެ މުއްދަތު 27 ޑިސެމްބަރު 2022އަށް ވަނީ ހަމަވެފަ އެވެ. އެހެންވެ، މިހާރު ކުއްޔަށް ނަގާފައިވާ މުއްދަތު 49 އަހަރަށް އިތުރު ކުރާ ނަމަ ދައްކަން ޖެހެނީ 10 މިލިއަން ޑޮލަރެވެ. އެއަށް ވުރެ ކުޑަ މުއްދަތަކަށް ކޮންމެ އަހަރަކަށް ދައްކަން ޖެެހެނީ 200،000 ޑޮލަރެވެ.
މި ސަރުކާރުން ހުށަހެޅި އިސްލާހަކީ، ކުރީގެ ސަރުކާރުން ވެސް ލުއި ދީފައިވާ ގޮތަށް 5 މިލިއަން ޑޮލަރާއި 100،000 ޑޮލަރު ދައްކައިގެން ކުއްޔަށް ދީފައިވާ މުއްދަތު އިތުރުކުރުމަށް ފުރުސަތު ދޭ ގޮތަށެވެ. އެގޮތުން:
-
އިސްލާހުގައި ބުނަނީ، އެ އިސްލާހު ތަސްދީގު ކުރާތާ ހަ މަސް ތެރޭ ކުލީގެ މުއްދަތު 49 އަހަރަށް އިތުރު ކުރާ ނަމަ، ދައްކަން ޖެހެނީ 5 މިލިއަން ޑޮލަރު؛ އެ މުއްދަތަށް ފަހު، އިތުރު ކުރުމަށް ދައްކަން ޖެހޭނީ 10 މިލިއަން ޑޮލަރު
-
49 އަހަރަށް ވުރެ ކުޑަ މުއްދަތަކަށް އިތުރު ކުރާ ނަމަ، ދައްކަން ޖެހެނީ އަހަރަކަށް 100،000 ޑޮލަރު؛ ހަ މަހަށް ފަހު، ދައްކަން ޖެހެނީ 200،000 ޑޮލަރު
ހަ މަހުގެ މުއްދަތު ގުނާނީ، މި އިސްލާހު މަޖިލީހުން ފާސްކޮށް، ރައީސް ތަސްދީގު ކުރެއްވުމާ އެކު ސަރުކާރުގެ ގެޒެޓްގައި ޝާއިއުކުރާ ދުވަހުން ފެށިގެން ކަމަށް ބިލުގައި ބުނެފައިވެ އެވެ.
މިއަދު މަޖިލީހުން މި އިސްލާހު ފާސްކޮށްފައި ވާއިރު، ރައީސް މުހައްމަދު މުއިއްޒު މިއަދު ބިލު ތަސްދީގުކުރައްވައިފި ނަމަ، އަންނަ 19 ފެބްރުއަރީއަށް ކުލީގެ މުއްދަތު އިތުރު ކުރުމަށް ލުއި ލިބޭނެ އެވެ.
ކޮމެންޓް (2)
ސިކުނޑި
ހިތަދޫ ހުސެން