މީގެ ކުރިން ބޭއްވި ބައި-އިލެކްޝަންގެ ވޯޓު ގުނުމުގެ ތެރެއިން: މި އިންތިހާބުތައް އަހަރަކު ދެ ފަހަރު ބާއްވާ ގޮތަށް ހަދަން މަޖިލީހުން މިއަދު ވަނީ ފާސްކޮށްފައި (ދައުރު ފޮޓޯ/ހުސައިން ސުނޭން)
ކައުންސިލް ބައި-އިލެކްޝަންތައް އަހަރަކު 2 ފަހަރު ބާއްވާ ގޮތަށް ހަދަން ފާސްކޮށްފި
ސިޓީތަކާއި އަތޮޅު އަދި ރަށު ކައުންސިލްތަކުގެ މެންބަރުންގެ ބައި-އިލެކްޝަންތައް ކައިރި ކައިރީގައި ބޭއްވުމުގެ ބަދަލުގައި އަހަރަކު ދެ ފަހަރު އެ އިންތިހާބުތައް ބާއްވާ ގޮތަށް ގާނޫނު އިސްލާހު ކުރުމަށް ސަރުކާރުގެ ފަރާތުން ހުށަހެޅި ދެ ބިލު މަޖިލީހުން މިއަދު ފާސްކޮށްފި އެވެ.
އެނގުން މުހިންމު - މިހާރު ގާނޫނު އޮންނަ ގޮތުން ކައުންސިލް ބައި-އިލެކްޝަނެއް ބާއްވަން ޖެހެނީ އެ މަގާމެއް ހުސްވާތާ ދެ މަސްދުވަހުގެ ތެރޭގަ އެވެ. އެހެންވެ ކައިރި ކައިރީގައި ގިނަ ބައި-އިލެކްޝަންތަކެއް ބާއްވަން ޖެހި، ހަރަދު ބޮޑުވުމުގެ ކަންބޮޑުވުން އިލެކްޝަންސް ކޮމިޝަން އަދި މި ސަރުކާރުގެ ސިޔާސީ ބޭފުޅުން ކުރެ އެވެ.
ވީ ކިހިނެއް؟ - އެ ކަންބޮޑުވުންތަކަށް ކޮންމެވެސް ވަރެެއްގެ ހައްލެއް ހޯދުމަށް ސަރުކާރުގެ ފަރާތުން ލާމަރުކަޒީ ގާނޫނަށް އަދި ލޯކަލް ކައުންސިލް އިންތިހާބުގެ ގާނޫނަށް އިސްލާހު ހުށަހެޅުއްވީ، މިދިޔަ ހަފްތާގެ ހޯމަ ދުވަހުގެ މަަޖިލިސް ޖަލްސާއަށެވެ.
އެ ބިލުގެ މިދިޔަ ބުދަ ދުވަހު މަޖިލީހަށް ބަލައިގެނެ، ދިރާސާ ކުރުމަށް މަޖިލީހުގެ ލާމަަރުކަޒީ ކޮމިޓީއަށް ފޮނުވުމުން ހަފްތާއެއް ތެރޭ ދެ ބިލުގެ މަސައްކަތް ނިންމައި އެ ކޮމިޓީން މިއަދުގެ މަޖިލިސް ޖަލްސާއަށް ކޮމިޓީ ރިޕޯޓު ވަނީ ހުށަހަޅުއްވާފަ އެވެ.
ތަފްސީލު - ކޮމިޓީން ފާސްކޮށްފައި ވަނީ، ބިލު ސަރުކާރުން ހުށަހަޅާފައިވާ ގޮތަށް ފާސް ކުރުމަށެވެ. އިސްލާހުކޮށްފައި ވަނީ ބައެއް ކުށްތަކާއި އިބާރާތްތަކަށް ބައެއް ކުދި ބަދަލުތައް ގެނައުމެވެ.
ކޮމިޓީން ނިންމި ގޮތަށް ދެ ބިލު ފާސްވީ 67 މެންބަރުންގެ ތާއީދާ އެކު އެވެ. ދެކޮޅަށް އިދިކޮޅު އެމްޑީޕީގެ އަށް މެންބަރުން ވޯޓު ދެއްވި އެވެ.
ދެ ބިލުގައި ހުރި ކަންކަން ކުރުކޮށް:
-
ކައުންސިލެއްގެ ގޮނޑި ހުސްވާތާ ގިނަވެގެން 183 ދުވަސް ނުވަތަ ހަ މަސް ތެރޭ އިންތިހާބު ބޭއްވުމަށް
-
ނަމަވެސް ގާނޫނީ އަދަދު ހަމަވާ މިންވަރަށް މެންބަރުން ނެތް ހާލަތެއްގައި ގިނަވެގެން ދެ މަސް ތެރޭ އިންތިހާބު ބޭއްވުމަށް
-
މިގޮތަށް އިސްލާހު ކުރުމުން، އަހަރަކު ދެ ފަހަރު ބައި-އިލެކްޝަންތައް އެކީ އެއްފަހަރާ އިލެކްޝަންސް ކޮމިޝަނަށް ބޭއްވުމުގެ ފުރުސަތު ލިބޭނެ
-
ދެ ބައި-އިލެކްޝަން ދެމެދު އެންމެ ކުރު މުދައްތަކީ 120 ދުވަސް ނުވަތަ ހަތަރު މަސްދުވަސް؛ މި ގޮތަށް ހެދުމުން، އެންމެ އަވަހަށް ވެސް ބޭއްވޭނީ ހަތަރު މަސް ފަހުން
ގުޅުން ހުރި - ގާނޫނު މިހާރު އޮންނަ ގޮތުން، ކައުންސިލަރެއްގެ ދައުރުގެ ބާކީ އެއް އަހަރު އޮވެއްޖެ ނަމަ، އިންތިހާބު ބާއްވާކަށް ނުޖެހެ އެވެ. އަދި ބައި-އިލެކްޝަނަކުން ހޮވޭ ކައުންސިލަރަކަށް އެ މަގާމުގައި ހުރެވޭނީ އެ ކައުންސިލްގެ ދައުރުގެ ބާކީ އޮތް މުއްދަތަށެވެ. މި އިސްލާހުތަކުގައި ވެސް އެކަންކަން ބަޔާންކޮށްފައިވެ އެވެ.
ފާހަގަކޮށްލެވޭ ކަމެއް - ނިމިދިޔަ 19 ވަނަ މަޖިލީހުގައި، އަންހެނުންގެ ކޮމިޓީތަކުގެ ބައި-އިލެކްޝަންތައް ގިނަވަމުންދިއުމާ ގުޅިގެން އަހަރަކު އެއްފަހަރު އެ ބައި-އިލެކްޝަންތައް ބާއްވާ ގޮތަށް ގާނޫނު އިސްލާހުކޮށްފައިވެ އެވެ.