އައިސީޔޫގައި ތިބި ދެ ދަރިވަރުންގެ ހާލު ވެސް މިހާރު އަންނަނީ ރަނގަޅުވަމުން: ފުލުހުން

އައްޑޫގައި ހުންނަ ޕޮލިސް ކޮލެޖުގައި ތަމްރީން ހަދަމުން އަންނަ 32 ދަރިވަރަކު ކާނާ ވިހަވެގެން ހާލު ގޯސްވުމާ ގުޅިގެން ހޮސްޕިޓަލްގައި އެޑްމިޓްކޮށްގެން ފަރުވާދިން ދަރިވަރުންގެ ތެރެއިން އެންމެ ފަހުން ތިބި ދެ ދަރިވަރުންގެ ހާލު ވެސް މިހާރު ރަނގަޅުވަމުން އަންނަ ކަމަަށް ފުލުހުން މިއަދު ބުނެފި އެވެ.

ވީ ކިހިނެއް؟ - ގާތްގަނޑަކަށް 200 އެއްހާ ދަރިވަރުން ކިޔަވަމުން އަންނަ ޕޮލިސް ކޮލެޖްގެ ދަރިވަރުންތަކެއް މިދިޔަ ބުދަ ދުވަހު ކުއްލި ގޮތަކަށް ބަލިވެ، އައްޑޫ އިކުއެޓޯރިއަލް ހޮސްޕިޓަލުގައި އެޑްމިޓްކުރި އެވެ. އޭގެ ފަހުން އިއްޔެ ފުލުހުން ބުނެފައި ގޮތުގައި ދެ މީހަކު ފިޔަވައި އެންމެން ވަނީ ފަރުވާއަށް ފަހު ދޫކޮށްލާފަ އެވެ.

ތަފްސީލު - އެންމެ ފަހުން ހޮސްޕިޓަލުގައި ތިބި ދެ ދަރިވަރުންނަށް ވެސް ފަރުވާދެމުން އައީ އައިސީޔޫގަ އެވެ. ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ، އޭގެ ތެރެއިން އެއް ދަރިވަރަކު މިހާރު ވޯޑަށް ބަދަލުކޮށްފައިވާ ކަމަށެވެ.

"ދެ ދަރިވަރުންގެ ހާލު ވެސް އަންނަނީ ރަނގަޅު ވަމުން،" ފުލުހުން ބުންޏެވެ.