ޕީއެންސީން ދަނީ ސުޕަ މެޖޯރިޓީ ނާޖާއިޒް ގޮތުގައި ބޭނުން ކުރަމުން: އެމްޑީޕީ

ރައްޔިތުންގެ ކަންބޮޑުވުންތައް ފާޅުކުރުމަށް މަޖިލީހަށް ހުށަހަޅަމުންދާ ކުއްލި މައްސަލަތައް ބޭރުކޮށް، ބާރުގައި އޮތް ޕީއެންސީން ސުޕަ މެޖޯރިޓީގެ ބޭނުން ނާޖާއިޒް ގޮތުގައި ހިފަމުންދާ ކަމަށް ބުނެ، އިދިކޮޅު އެމްޑީޕީ އިން މިއަދު ކަންބޮޑުވުން ފާޅު ކޮށްފި އެވެ.

ވީ ކިހިނެއް؟ - އެމްޑީޕީ އިން މި ދެ ދުވަހު ހުށަހެޅި ކުއްލި ދެ މައްސަލައެއް، ޕީއެންސީގެ މެންބަރުންގެ ވޯޓުން ބޭރުކޮށްލުމުން، އެމްޑީޕީގެ ޕާލިމަންޓްރީ ގްރޫޕް (ޕީޖީ) އިން މިއަދު ހަވީރު ވަނީ މަޖިލީހުގެ އިދާރާގައި ނޫސްވެރިންގެ ބައްދަލުވުމެއް ބާއްވައިފަ އެވެ.

ތަފްސީލު - އެމްޑީޕީގެ ޕީޖީ ގްރޫޕުގެ ތަރުޖަމާނު، ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ، މަޖިލީހުން ބޭރުކޮށްލީ މި ދަނޑިވަޅުގައި މުހިންމު ދެ މައްސަލަ ކަމަށެވެ. އެ ދެ މައްސަލަ ބޭރުކޮށްލުމަކީ ވަރަށް ބޮޑު ހިތާމައެއްގެ ގޮތުގައި ސިފަކުރައްވައި އޭނާ ވިދާޅުވީ:

"މިފަދަ މުހިންމު ކަންކަން މިއީ، އަޅުގަނޑުމެން ވަގުތު ނަގާލަން ކުރާ ކަންތައްތަކެއްގެ ގޮތުގައި ސިފަކޮށް، މަޖިލީހުގެ ސުޕަ މެޖޯރިޓީގެ ބޭނުން ނާޖާއިޒް ގޮތުގައި ހިފަމުންދާކަން ފާހަގަކުރަން،" މައުރޫފް ވިދާޅުވި އެވެ.

މަޖިލީހުގެ އިއްޔެ ޖަލްސާގައި، ސަރުކާރަށް ނިސްބަތްވާ ބައެއް މެންބަރުން ވަނީ ކުއްލި މައްސަލަތައް ހުށަހެޅުމުގެ ފުރުސަތު ހަނި ކުރުމަށް މަޖިލީހުގެ ގަވައިދު އިސްލާހު ކުރުމަށް ބާރު އަޅުއްވައި ވާހަކަ ދައްކަވާފަ އެވެ. އެ ވާހަކަތަކަށް ވެސް މައުރޫފް ފާޑުވިދާޅުވި އެވެ.

"އެއީ، އެމްޑީޕީގެ ޕާލިމަންޓްރީ ގްރޫޕުގެ ފަރާތުން އިންތިހާއަށް ކަންބޮޑުވާ އަދި އެގޮތަށް އެއީ މައިނޯރިޓީގެ އަޑު ކަނޑުވާލުމުގެ އިޝާރާތެއްގެ ގޮތުގައި ފާހަގަ ކުރަން،" އެކަން އެގޮތަށް ވިޔަނުދޭނެކަން ފާހަގަކުރައްވައި އޭނާ ވިދާޅުވި އެވެ.

މައުރޫފް ވިދާޅުވީ މަޖިލީހުގެ ރައީސް އަބްދުރަހީމް އަބްދުﷲ އެ މަގާމަށް ވަޑައިގެން، މިއީ ނަމޫނާ މަޖިލީހަކަށް ވާނެ ކަމަށް ވިދާޅުވި ވިދާޅުވުމާ މެދު މިހާރު ސުވާލު އުފެދޭ ކަމަށެވެ.

މީގެ އިތުރުން، މިފަހުން ބޭއްވި އެމްޑީޕީގެ ހަރުގެ ޖަލްސާއެއްގައި ގުރުއާން ކިޔެވި އެޗްޑީސީގެ މުވައްޒަފަކު ވަޒީފާއިން ވަކިކޮށްފައިވާތީ، އެކަމާ މެދު ވެސް އޭނާ ކަންބޮޑުވުން ފާޅު ކުރެއްވި އެވެ.

އެނގުން މުހިއްމު - މުވައްޒަފު ކަނޑާލި މައްސަލައިގައި އެޗްޑީސީން ބައެއް މީޑިއާތަކަށް ބުނެފައިވަނީ އޭނާ މަގާމުން ވަކިކުރީ ސިޔާސީ ހަރަކާތެއްގައި ބައިވެރިވެގެން ނޫން ކަމަށާއި އެ ފިޔަވަޅު އެޅީ އޭނާ ވަޒީފާއަށް ފަރުވާކުޑަކޮށް، އޮފީހަށް ނުނިކުންނާތީ ކަމަށެވެ.